ወደ እኔ ውጣ

ሙሴ ኪዳኑን ጮክ ብሎ ያነብባል፤ ሕዝቡም እናደርገዋለን ብለው ይመልሳሉ፤ እርሱም የኪዳኑን ደም ይረጭባቸዋል። ሽማግሌዎቹ ወደ ተራራው ይወጣሉ፤ ከእግሩ በታች የሰንፔር ንጣፍ ያለውን የእስራኤልን አብ ያያሉ፤ ይበላሉ ይጠጣሉም። ሙሴ ወደ ደመናው ይገባል።

ምዕራፍ 24።

ሙሴንም እንዲህ አለው፤ “አንተና አሮን፣ ናዳብና አብዩድ፣ ከእስራኤልም ሽማግሌዎች ሰባ ወደ እኔ ውጡ፤ በሩቅ ሆናችሁም ስገዱ። ወደ እኔ የሚቀርበው ሙሴ ብቻ ነው፤ ሌሎቹ ግን አይቅረቡ፤ ሕዝቡም ከእርሱ ጋራ አይውጡ።”

ሙሴም መጥቶ የአባታችንን ቃላት ሁሉና ሥርዐቱን ሁሉ ለሕዝቡ ነገረ። ሕዝቡም ሁሉ በአንድ ድምፅ፣ “አባታችን የተናገረውን ሁሉ እናደርጋለን” ብለው መለሱ።

ሙሴም የአባታችንን ቃላት ሁሉ ጻፈ፤ በማለዳም ተነሥቶ በተራራው ግርጌ መሠዊያ ሠራ፤ ለእስራኤልም ዐሥራ ሁለት ነገዶች ዐሥራ ሁለት ዐምዶችን አቆመ። ከእስራኤልም ጎልማሶችን ላከ፤ እነርሱም የሚቃጠል መሥዋዕት አቀረቡ፤ ለአባታችንም የሰላም መሥዋዕት አድርገው በሬዎችን ሠዉ። ሙሴም ከደሙ እኩሌታውን ወስዶ በሳሕኖች ውስጥ አኖረ፤ ቀሪውን እኩሌታ ግን በመሠዊያው ላይ ረጨ። ከዚያም የኪዳኑን መጽሐፍ ወስዶ ለሕዝቡ ጮኾ አነበበ። እነርሱም፣ “አባታችን የተናገረውን ሁሉ እናደርጋለን፤ እንታዘዛለንም” አሉ።

ሙሴም ደሙን ወስዶ በሕዝቡ ላይ ረጨ፤ እንዲህም አለ፤ “እነሆ፣ አባታችን በእነዚህ ቃላት ሁሉ መሠረት ከእናንተ ጋራ ያደረገው የኪዳን ደም ይህ ነው።” ^a

ከዚያም ሙሴና አሮን፣ ናዳብና አብዩድ፣ ከእስራኤልም ሽማግሌዎች ሰባ ወጡ። የእስራኤልንም አባት አዩ፤ ከእግሮቹም በታች እንደ ሰንፔር ድንጋይ ንጣፍ የሆነ፣ እንደ ሰማዩ ራሱ ጥሩ የሆነ ነገር ነበረ። በእስራኤልም መሪዎች ላይ እጁን አልጫነም፤ አባታችንንም አዩ፤ በሉም፤ ጠጡም።

አባታችንም ሙሴን እንዲህ አለው፤ “ወደ ተራራው ወደ እኔ ውጣ፤ በዚያም ቈይ፤ እነርሱን ለማስተማር የጻፍሁትን ሕግና ትእዛዝ ያለባቸውን የድንጋይ ጽላቶች እሰጥሃለሁ።”

ሙሴም ከረዳቱ ከኢያሱ ጋራ ተነሥቶ ወጣ፤ ሙሴም ወደ አባታችን ተራራ ወጣ። ሽማግሌዎቹንም እንዲህ አላቸው፤ “ወደ እናንተ እስክንመለስ ድረስ እዚህ ጠብቁን። አሮንና ሆር ከእናንተ ጋራ ናቸው፤ ክርክር ያለው ሁሉ ወደ እነርሱ ይሂድ።”

ሙሴም ወደ ተራራው በወጣ ጊዜ ደመናው ተራራውን ሸፈነው፤ የአባታችንም ክብር በሲና ተራራ ላይ ዐረፈ፤ ደመናውም ለስድስት ቀን ሸፈነው፤ በሰባተኛውም ቀን ከደመናው ውስጥ ሆኖ ሙሴን ጠራው። ለእስራኤል ልጆችም የአባታችን ክብር በተራራው ጫፍ ላይ እንደሚበላ እሳት ሆኖ ታያቸው። ሙሴም ወደ ደመናው ገብቶ ተራራውን ወጣ፤ ሙሴም በተራራው ላይ አርባ ቀንና አርባ ሌሊት ቈየ።