አባታችን የተጨቈኑትን ጩኸት ያያል

የአጫጆች የተከለከለ ደመወዝ ይጮኻል፤ ወደ ሰማይ ሠራዊት አብ ጆሮም ይደርሳል፤ ያከማቹ ባለጠጎች እንዲያለቅሱ ይነገራቸዋል። ሌሎቹ ሁሉ እንደ ገበሬ እንዲጠብቁ፣ መከራ ሲደርስባቸው እንዲጸልዩ፣ እርስ በርሳቸው እንዲናዘዙ፣ የሳተውንም እንዲፈልጉ ይነገራቸዋል።

ምዕራፍ 5።

እናንተ ባለጠጎች ሆይ፣ አሁን ኑ፤ በሚመጣባችሁ መከራ ምክንያት ዐልቅሱ፤ ዋይ ዋይ በሉ። ሀብታችሁ በስብሷል፤ ልብሳችሁንም ብል በልቶታል። ወርቃችሁና ብራችሁ ዝጎባቸዋል፤ ዝገታቸውም በእናንተ ላይ ይመሰክራል፤ ሥጋችሁንም እንደ እሳት ያቃጥላል። በመጨረሻው ዘመን ሀብት አከማችታችኋል። እነሆ፣ ዕርሻችሁን ላጨዱ ሠራተኞች ያልከፈላችሁት ዋጋ ይጮኻል፤ የአጫጆችም ጩኸት የሰማይ ሠራዊት አባት ጆሮ ደርሷል። በምድር ላይ በቅንጦትና በፈንጠዝያ ኖራችሁ፤ ለእርድ ቀን ልባችሁን አወፈራችሁ። የማይቃወማችሁን ጻድቅ ኰነናችሁት፤ ገደላችሁትም።

በትዕግሥተኛ ልብ ጠብቁ

እንግዲህ ወንድሞችና እኅቶች ሆይ፣ ጌታ እስኪመጣ ድረስ ታገሡ። ገበሬውን ተመልከቱ፤ የፊተኛውንና የኋለኛውን ዝናብ እስኪያገኝ ድረስ፣ የምድርን ክቡር ፍሬ በትዕግሥት ይጠብቃል። እናንተም ደግሞ ታገሡ፤ የጌታ መምጣት ቀርቧልና ልባችሁን አጽኑ። ወንድሞችና እኅቶች ሆይ፣ እንዳይፈረድባችሁ እርስ በርሳችሁ አታጉረምርሙ። እነሆ፣ ፈራጁ በደጆች ፊት ቆሟል። ወንድሞችና እኅቶች ሆይ፣ በአባታችን ስም የተናገሩትን ነቢያት የመከራና የትዕግሥት ምሳሌ አድርጋችሁ ውሰዱ። እነሆ፣ የጸኑትን ብፁዓን እንላቸዋለን። የኢዮብን መጽናት ሰምታችኋል፤ አባታችንም ያደረገውን አይታችኋል፤ አባታችን በርኅራኄና በምሕረት የበለጸገ ነውና።

ወንድሞቼና እኅቶቼ ሆይ፣ ከሁሉ በፊት አትማሉ፤ በሰማይም ቢሆን፣ በምድርም ቢሆን፣ በሌላ በማንኛውም መሐላ አትማሉ። ፍርድ እንዳይደርስባችሁ፣ አዎ ያላችሁት አዎ፣ አይደለም ያላችሁት አይደለም ይሁን።

የእምነት ጸሎት ይፈውሳል

ከእናንተ መካከል መከራ የሚቀበል ሰው አለ? ይጸልይ። ደስ የሚለው ሰው አለ? የምስጋና መዝሙር ይዘምር። ከእናንተ መካከል የታመመ ሰው አለ? የቤተ ክርስቲያንን ሽማግሌዎች ይጥራ፤ እነርሱም በጌታ ስም ዘይት እየቀቡት ይጸልዩለት። የእምነት ጸሎት የታመመውን ያድነዋል፤ ጌታም ያስነሣዋል። ኀጢአትም ሠርቶ እንደ ሆነ ይቅር ይባልለታል። እንግዲህ ትፈወሱ ዘንድ፣ ኀጢአታችሁን እርስ በርሳችሁ ተናዘዙ፤ እርስ በርሳችሁም ጸልዩ። የጻድቅ ሰው ጸሎት በሥራ ላይ ሲውል እጅግ ኀይለኛ ነው። ኤልያስ እንደ እኛ ሰው ነበር፤ ዝናብ እንዳይዘንብም አጥብቆ ጸለየ፤ በምድርም ላይ ሦስት ዓመት ከስድስት ወር አልዘነበም። ዳግመኛም ጸለየ፤ ሰማይም ዝናብ ሰጠ፤ ምድርም ፍሬዋን አፈራች።

ወንድሞቼና እኅቶቼ ሆይ፣ ከእናንተ መካከል ማንም ከእውነት ቢስት፣ አንዱም ቢመልሰው፣ ይህን ዕወቁ፤ ኀጢአተኛን ከተሳሳተ መንገዱ የሚመልስ ሁሉ ነፍሱን ከሞት ያድናል፤ የብዙ ኀጢአትንም ይሸፍናል።