አብ እስራኤልን ለማዳን ቶላን ያስነሣል

ቶላና ኢያዕር በማዕበሎቹ መካከል በጸጥታ ይፈርዳሉ። ከዚያም እስራኤል የጎረቤቶቹን ሁሉ አማልክት በአንድ ጊዜ ያመልካል፤ አሞንም አሥራ ስምንት ዓመት ያደቅቀዋል። ሲጮኹ አብ ያለፈውን ማዳኑን ሁሉ ዘርዝሮ እምቢ ይላል፤ የመረጣችኋቸውን አማልክት ጥሩ። መከራቸውም ልቡን ያስጨንቀዋል።

ምዕራፍ 10።

ከአቤሜሌክ በኋላ የይሳኮር ሰው የሆነው የዶዶ ልጅ የፉዓ ልጅ ቶላ እስራኤልን ለማዳን ተነሣ፤ እርሱም በኤፍሬም ተራሮች ውስጥ በሳሚር ኖረ። በእስራኤል ላይ ሀያ ሦስት ዓመት ፈረደ፤ ከዚያም ሞተ፣ በሳሚርም ተቀበረ።

ኢያዕር እስራኤልን ይመራል

ከእርሱም በኋላ ገለዓዳዊው ኢያዕር ተነሣ፤ እርሱም በእስራኤል ላይ ሀያ ሁለት ዓመት ፈረደ። በሠላሳ አህዮች ላይ የሚጋልቡ ሠላሳ ወንዶች ልጆች ነበሩት፤ በገለዓድም ሠላሳ ከተሞች ነበሩአቸው፤ እስከ ዛሬም ሐዎት ኢያዕር ተብለው ይጠራሉ። ^a ኢያዕር በሞተ ጊዜ በቃሞን ተቀበረ።

እስራኤል እንደ ገና አብን ይተዋል

እስራኤላውያንም እንደ ገና በአባታችን ፊት ክፉ ነገር አደረጉ፤ በኣሎችንና አስታሮትን፣ የአራምን አማልክት፣ የሲዶናን አማልክት፣ የሞአብን አማልክት፣ የአሞናውያንን አማልክትና የፍልስጥኤማውያንን አማልክት አገለገሉ። አባታችንንም ተዉ፤ ከእንግዲህም አላገለገሉትም። ስለዚህ የአባታችን ቍጣ በእስራኤል ላይ ነደደ፤ ለፍልስጥኤማውያንና ለአሞናውያን እጅም ሸጣቸው። በዚያ ዓመት እስራኤላውያንን ሰባበሩና አደቀቁ፤ በዮርዳኖስ ማዶ በአሞራውያን ምድር በገለዓድ ያሉትን እስራኤላውያንን ሁሉ ዐሥራ ስምንት ዓመት አስጨነቋቸው። አሞናውያንም ደግሞ በይሁዳ፣ በብንያምና በኤፍሬም ቤት ላይ ለመዋጋት ዮርዳኖስን ተሻገሩ፤ እስራኤልም እጅግ ተጨነቀ። እስራኤላውያንም ወደ አባታችን ጮኸው እንዲህ አሉ፤ “አባታችንን ትተን በኣሎችን ስላገለገልን በአንተ ላይ ኀጢአት ሠርተናል።”

አባታችንም እስራኤላውያንን እንዲህ አላቸው፤ “ከግብፃውያን፣ ከአሞራውያን፣ ከአሞናውያንና ከፍልስጥኤማውያን አላዳንኋችሁምን? ሲዶናውያን፣ አማሌቃውያንና ማዖናውያን ባስጨነቋችሁ ጊዜ ወደ እኔ ጮኻችሁ፤ እኔም ከእጃቸው አዳንኋችሁ። ነገር ግን እናንተ ተዋችሁኝ፤ ሌሎች አማልክትንም አገለገላችሁ፤ ስለዚህ ከእንግዲህ አላድናችሁም። ሄዳችሁ ወደ መረጣችኋቸው አማልክት ጩኹ፤ በመከራችሁ ጊዜ እነርሱ ያድኗችሁ።”

እስራኤላውያንም አባታችንን እንዲህ አሉት፤ “ኀጢአት ሠርተናል። መልካም መስሎ የታየህን ሁሉ አድርግብን፤ ዛሬ ብቻ እባክህ አድነን።” የባዕድ አማልክትንም አስወግደው አባታችንን አገለገሉ፤ ልቡም የእስራኤልን መከራ ከእንግዲህ ሊታገሥ አልቻለም።

አሞናውያንም ተሰብስበው በገለዓድ ሰፈሩ፤ እስራኤላውያንም ተሰበሰቡ በምጽጳም ሰፈሩ። ሕዝቡም፣ የገለዓድ አለቆች እርስ በርሳቸው፣ “አሞናውያንን መዋጋት የሚጀምር ሁሉ በገለዓድ ሕዝብ ሁሉ ላይ አለቃ ይሆናል” ተባባሉ።