መልእክተኛው ለማጥራት ይመጣል

መንገድን የሚያዘጋጅ መልእክተኛ ይመጣል፤ የሚያነጥረው እሳት ግን ምቹ አይደለም። ክሱ በአሥራትና በመባ ዝርፊያ ነው፤ ምላሹም አብ አባታችንን እንድንፈትን የሚጋብዝ ግብዣ ነው። እርሱን የፈሩት እርስ በርሳቸው ይነጋገራሉ፤ የመታሰቢያ መጽሐፍም ይጻፋል።

ምዕራፍ 3።

እነሆ፣ መልእክተኛዬን እልካለሁ፤ እርሱም በፊቴ መንገድን ያዘጋጃል። ከዚያም የምትፈልጉት ጌታ በድንገት ወደ መቅደሱ ይመጣል፤ እርሱም የምትደሰቱበት የኪዳኑ መልእክተኛ ነው። እነሆ፣ ይመጣል፤ ይላል የሰማይ ሠራዊት አባት። ^a “እርሱ በሚመጣበት ቀን ግን ማን ሊጸና ይችላል? እርሱ በሚገለጥበት ጊዜስ ማን ሊቆም ይችላል? እርሱ እንደ አንጥረኛ እሳት፣ እንደ አጣቢ ሳሙና ነው። እርሱ ብሩን እያጠራና እያነጻ ይቀመጣል፤ የሌዊን ልጆች ያነጻል፤ እንደ ወርቅና እንደ ብር ያጠራቸዋል፤ እነርሱም በጽድቅ ለአባታችን መሥዋዕትን ያቀርባሉ። ከዚያም እንደ ቀደሙት ዘመናት፣ እንደ ቀደሙት ዓመታት የይሁዳና የኢየሩሳሌም መሥዋዕት አባታችንን ደስ ያሰኘዋል።”

ልፈርድባችሁ እቀርባለሁ፤ በጠንቋዮች፣ በአመንዝሮች፣ በሐሰት በሚምሉ፣ ሠራተኛውን ደመወዙን በሚያታልሉ፣ መበለቲቱንና ድሀ አደጉን በሚጨቍኑ፣ መጻተኛውን ወደ ጎን በሚያገሉና የማይፈሩኝ ላይ ፈጣን ምስክር እሆናለሁ፤ ይላል የሰማይ ሠራዊት አባት።

ወደ አባታችሁ ተመለሱ

እኔ አባታችሁ አልለወጥምና፤ ስለዚህ እናንተ የያዕቆብ ልጆች አልጠፋችሁም።

ከአባቶቻችሁ ዘመን ጀምሮ ከሥርዐቴ ፈቀቅ ብላችኋል፤ አልጠበቃችኋቸውም። ወደ እኔ ተመለሱ፤ እኔም ወደ እናንተ እመለሳለሁ፤ ይላል የሰማይ ሠራዊት አባት። እናንተ ግን፣ ‘እንዴት እንመለስ?’ ትላላችሁ።

ሰው አባቱን ይሰርቃልን? እናንተ ግን ትሰርቁኛላችሁ። እናንተ ግን፣ ‘እንዴት ሰረቅንህ?’ ትላላችሁ። በዐሥራትና በመባ ነው። እናንተ መላው ሕዝብ ትሰርቁኛላችሁና በእርግማን ተረግማችኋል። በቤቴ ምግብ እንዲኖር ሙሉውን ዐሥራት ወደ ግምጃ ቤት አምጡ። በዚህ ፈትኑኝ፤ ይላል የሰማይ ሠራዊት አባት፤ የሰማይን መስኮቶች ባልከፍትላችሁ፣ የተትረፈረፈ በረከትንም እስኪበቃችሁ ድረስ ባላፈስስላችሁ እዩ። ስለ እናንተ በላዒውን እገሥጸዋለሁ፤ የምድራችሁን ፍሬ አያጠፋም፤ በዕርሻም ያለው ወይናችሁ ፍሬ ማፍራቱ አይቀርም፤ ይላል የሰማይ ሠራዊት አባት። ከዚያም የተወደደች ምድር ትሆናላችሁና አሕዛብ ሁሉ ብፁዓን ይሉአችኋል፤ ይላል የሰማይ ሠራዊት አባት።

ቃላችሁ በእኔ ላይ ጨካኝ ነበር፤ ይላል አባታችን። እናንተ ግን፣ ‘በአንተ ላይ ምን ተናግረናል?’ ትላላችሁ።

እናንተ፣ ‘እግዚአብሔርን ማገልገል ከንቱ ነው። ትእዛዙን በመጠበቃችንና በሰማይ ሠራዊት አባት ፊት እንደ አልቃሾች በመሄዳችን ምን አተረፍን?’ ብላችኋል። አሁንም ትዕቢተኞችን ብፁዓን እንላለን። ክፉ የሚያደርጉ ይለማሉ፤ እግዚአብሔርን እንኳ ይፈትናሉ፤ ያመልጣሉም።

ከዚያም አባታችንን የሚፈሩ እርስ በርሳቸው ተነጋገሩ፤ እርሱም አዳመጠ፤ ሰማም። እርሱን ለሚፈሩትና ስሙን ለሚያከብሩት በፊቱ የመታሰቢያ መጽሐፍ ተጻፈ።

በምሠራበት ቀን እነርሱ የእኔ፣ የተወደደ ርስቴ ይሆናሉ፤ ይላል የሰማይ ሠራዊት አባት። አባት የሚያገለግለውን ልጁን እንደሚራራለት እኔም እራራላቸዋለሁ። ዳግመኛም በጻድቁና በክፉው መካከል፣ አባታችንን በሚያገለግለውና በማያገለግለው መካከል ያለውን ልዩነት ታያላችሁ።