Mga Awit 66

66 ¹Sumigaw sa galak sa ating Ama, buong daigdig! ²Awitin ninyo ang kaluwalhatian ng kaniyang pangalan; gawing maluwalhati ang papuri sa kaniya. ³Sabihin ninyo sa ating Ama, “Kay tindi ng iyong mga gawa! Sa pamamagitan ng iyong dakilang kapangyarihan ang iyong mga kaaway ay yumuyukod nang may takot sa harap mo. ⁴Buong daigdig ay sumasamba sa iyo at umaawit ng mga papuri sa iyo; umaawit sila ng papuri sa iyong pangalan.” Selah

⁵Halikayo at tingnan ang mga gawa ng ating Ama, kahanga-hanga sa kaniyang mga gawa sa lahat ng tao. ⁶Ginawa niyang tuyong lupa ang dagat; tumawid sila sa ilog nang naglalakad. Doon kami nagalak sa kaniya. ⁷Naghahari siya sa pamamagitan ng kaniyang lakas magpakailanman; ang kaniyang mga mata ay nagbabantay sa mga bansa— huwag hayaang magmapuri ang mga mapaghimagsik. Selah

⁸Purihin ninyo ang ating Ama, lahat ng mga bayan; iparinig ninyo ang tunog ng papuri sa kaniya, ⁹na nag-ingat sa amin sa piling ng mga buhay at hindi hinayaang madulas ang aming mga paa. ¹⁰Sapagkat ikaw, ating Ama, ay sumubok sa amin; dinalisay mo kami tulad ng pagdadalisay sa pilak. ¹¹Dinala mo kami sa lambat; naglagay ka ng mabigat na pasanin sa aming mga likod. ¹²Hinayaan mong tumakbo ang mga tao sa aming mga ulo; dumaan kami sa apoy at sa tubig, ngunit inilabas mo kami tungo sa isang lugar ng kasaganaan. ^a a v12 Ang “tumakbo sa aming mga ulo” ay isang sinaunang pananalita para sa lubusang pananakop at pagpapasakop.

¹³Papasok ako sa iyong bahay dala ang mga handog na susunugin; tutuparin ko sa iyo ang aking mga panata, ¹⁴ang mga panatang binigkas ng aking mga labi at ipinangako ng aking bibig nang ako'y nasa kagipitan. ¹⁵Maghahandog ako sa iyo ng mga handog na susunugin mula sa mga pinatabang hayop, kasama ng usok ng mga tupang lalaking inihandog; maghahandog ako ng mga toro at mga kambing. Selah

¹⁶Halikayo at makinig, kayong lahat na may takot sa ating Ama, at isasalaysay ko ang ginawa niya para sa aking kaluluwa. ¹⁷Tumawag ako sa kaniya ng aking bibig, at ang mataas na papuri ay nasa aking dila. ¹⁸Kung pinahalagahan ko ang kasamaan sa aking puso, hindi sana nakinig ang Panginoong Ama. ¹⁹Ngunit tunay na nakinig ang ating Ama; pinakinggan niya ang aking panalangin. ²⁰Purihin ang ating Ama, na hindi tumanggi sa aking panalangin ni nag-alis ng kaniyang tipang pag-ibig sa akin!