Mikas 4 FHB Father's Heart Bible™

4 ¹Sa ulihi nga mga adlaw ang bukid nga ginatindugan sang balay sang aton Amay pagatukuron sing malig-on subong nga pinakamataas sa mga bukid, kag pagabayawon sing mataas labaw sa mga bungyod; kag magailig sa sini ang mga katawohan. ²Magakari ang madamo nga kapungsuran kag magasiling, “Kari kamo, magtaklad kita sa bukid sang aton Amay, sa balay sang Dios ni Jacob, agud nga tudloan niya kita sang iya mga dalan kag maglakat kita sa iya mga banas.” Kay magaguwa ang pagpanudlo halin sa Sion, kag ang pulong sang aton Amay halin sa Jerusalem. ³Magahukom sia sa tunga sang madamo nga katawohan, kag magahusay sang mga ginaawayan sang mabaskog nga kapungsuran sa malayo. Pagapandayon nila ang ila mga espada nga mangin mga punta sang arado, kag ang ila mga bangkaw nga mangin mga galab; ang pungsod indi magbayaw sing espada batok sa pungsod, kag indi na sila magtuon sing inaway. ⁴Magapungko ang tagsatagsa sa idalom sang iya kaugalingon nga ubas kag sa idalom sang iya kaugalingon nga kahoy nga higera, kag wala sing bisan sin-o nga magapahadlok sa ila, kay ang Amay sang mga panong sang langit mismo ang naghambal. ⁵Kay ang tanan nga katawohan nagalakat sa ngalan sang ila kaugalingon nga dios, apang kita magalakat sa ngalan sang aton Amay tubtub sa walay katapusan.

Ginatipon sang Aton Amay ang Iya Nagkalalapta nga mga Anak

⁶Sa sina nga adlaw, siling sang aton Amay, tipunon ko ang mga piang kag tilingon ko ang mga gintabog, sila nga akon ginpasakitan. ⁷Himuon ko ang mga piang nga isa ka nabilin, kag ang mga gintabog sa malayo nga isa ka mabaskog nga pungsod; kag magahari ang aton Amay sa ila sa Bukid sang Sion halin subong kag tubtub sa walay katapusan.

⁸Kag ikaw, torre sang panong, bungyod sang anak nga babayi sang Sion, sa imo ini magaabut—magabalik ang nahauna nga paggahom, ang ginharian sang anak nga babayi sang Jerusalem.

⁹Karon ngaa nagasinggit ka sing mabaskog? Wala bala sing hari sa tunga mo? Napatay bala ang imo manuglaygay, nga gindakup ka sang kasakit subong sang babayi nga nagabata? ¹⁰Magbalingkawot ka kag mag-ugayong, anak nga babayi sang Sion, subong sang babayi nga nagabata, kay karon magaguwa ka sa siudad kag magapuyo sa latagon nga uma; makadto ka sa Babilonia. Didto pagaluwason ka; didto tubuson ka sang aton Amay halin sa kamot sang imo mga kaaway.

¹¹Karon madamo nga kapungsuran ang nagtilipon batok sa imo, nga nagasiling, “Pagahigkon sia, kag magpanglipay ang aton mga mata sa Sion.” ¹²Apang wala nila mahibaloi ang mga hunahuna sang aton Amay; wala nila maintiendihi ang iya plano, nga gintipon niya sila subong sang mga binugkos sa linas-an. ¹³Magbangon ka kag maglinas, anak nga babayi sang Sion, kay himuon ko nga salsalon ang imo sungay kag saway ang imo mga kuko; dugmukon mo ang madamo nga katawohan, kag ihalad mo ang ila ginansia sa aton Amay, ang ila manggad sa Nagagahum sa bug-os nga duta.