Ginhuyop ang Ikalima nga Budyong

Nabuksan ang kadadalman kag ang mga dulon nga may nawong sang tawo nagpaantos sa tanan nga wala sing tatak sang aton Amay sa sulod sang lima ka bulan; ginapangita sang mga tawo ang kamatayon apang indi sila mapatay. Dayon duha ka gatos ka milyon nga mangangabayo ang nagpatay sa ikatlo nga bahin sang katawhan. Ang mga nagkalabilin nagpadayon sa ila mga diosdios, pagpamatay kag pagpangawat. Wala sing bisan ano diri nga nagdala sa bisan sin-o sa paghinulsol.

Kapitulo 9.

Naghuyop sang budyong ang ikalima nga anghel, kag nakita ko ang isa ka bituon nga nahulog halin sa langit pakadto sa duta, kag gintugyan sa iya ang yabi sang lungib sang kadadalman. Ginbuksan niya ang lungib sang kadadalman, kag nagbutwa ang aso halin sa lungib pareho sang aso sang isa ka dako nga hurno; nagdulom ang adlaw kag ang hangin tungud sa aso sang lungib. Kag halin sa aso nagguwa ang mga dulon pakadto sa duta, kag ginhatagan sila sing gahum pareho sang gahum sang mga tibalas sang duta. Ginsilingan sila nga indi pagsakiton ang hilamon sang duta, ang lunhaw nga mga tanum, ukon ang mga kahoy—kondi ang mga tawo lamang nga wala sing tatak sang aton Amay sa ila mga agtang. ^a Wala sila pagtugoti nga patyon sila, kondi pasakitan lamang sila sing lima ka bulan—kasakit nga pareho sa kasakit sang pagtugsok sang tibalas kon magtugsok ini sa isa ka tawo. Sa amo nga mga adlaw pangitaon sang mga tawo ang kamatayon apang indi nila ini makita; handumon nila ang mapatay, apang magapalagyo ang kamatayon sa ila.

Ang mga dulon kaangay sang mga kabayo nga handa sa inaway; sa ila mga ulo may mga korona nga daw bulawan, kag ang ila mga nawong daw mga nawong sang tawo. May buhok sila nga daw buhok sang mga babayi, kag ang ila mga ngipon daw mga ngipon sang mga leon. May mga salipod sila sa dughan nga daw salsalon, kag ang tingog sang ila mga pakpak daw tingog sang madamo nga kabayo kag karo nga nagadalagan sa inaway. Ang ila mga ikog kaangay sang sa mga tibalas kag may mga tugsok; sa ila mga ikog yara ang gahum nga makasakit sa mga tawo sing lima ka bulan. Ang ila hari amo ang anghel sang kadadalman—Kalaglagan sa Hebreo, Apolion sa Griego. ^b

Nagligad na ang nahauna nga kailo; yari karon, may duha pa ka kailo nga magaabut human sining mga butang.

Niyan naghuyop sang iya budyong ang ikaanum nga anghel, kag nabatian ko ang isa ka tingog halin sa apat ka sungay sang bulawan nga halaran nga yara sa atubangan sang aton Amay, nga nagsiling sa ikaanum nga anghel nga may budyong, “Buhii ang apat ka anghel nga gingapos sa dako nga suba sang Eufrates.”

Ginbuhian ang apat ka anghel nga ginpreparar para sa sina nga oras, adlaw, bulan, kag tuig, agud patyon nila ang ikatlo nga bahin sang katawohan. Ang kadamuon sang mga soldado nga nagasakay sa kabayo duha ka gatos ka milyon; nabatian ko ang ila kadamuon. Amo ini ang pagkakita ko sa mga kabayo sa palanan-awon kag sa mga nagasakay sa ila: may mga salipod sila sa dughan nga ang kolor daw kalayo, sapiro, kag asupre; ang mga ulo sang mga kabayo daw mga ulo sang mga leon, kag nagaguwa sa ila mga baba ang kalayo, aso, kag asupre. Ginpatay sining tatlo ka kalalat-an ang ikatlo nga bahin sang katawohan—ang kalayo, aso, kag asupre nga nagaguwa sa ila mga baba. Ang gahum sang mga kabayo yara sa ila mga baba kag sa ila mga ikog—ang ila mga ikog, pareho sang mga man-og, may mga ulo, kag amo ini ang ginagamit nila sa pagpasakit.

Ang nabilin sang katawohan, nga wala mapatay sining mga kalalat-an, nagdumili gihapon sa pagbiya sa mga butang nga ginhimo sang ila mga kamut—ang pagsimba sa mga demonyo kag sa mga diosdios nga bulawan, pilak, saway, bato, kag kahoy, nga indi makakita, makabati, ukon makalakat. Wala man sila maghinulsol sang ila mga pagpamatay, sang ila mga pagpanghiwit, sang ila pagpakighilawas, ukon sang ila mga pagpangawat.