Elîhû Dîsa Diaxive
Elîhû dibêje ku gunehê mirov û qenciya mirov ji bo Xwedê, yê ku ji ewran bilindtir e, tiştekî naguherînin; ew li ser mirovên din dikevin. Yên bindest hawarê dikin, lê kes napirse ka Afirînerê wan li ku ye, yê ku di şevê de stranan dide. Loma Eyûb bêyî zanînê peyvan zêde dike.
35 1Paşê Elîhû berdewam kir û got: 2“Tu difikirî ku ev rast e? Tu dibêjî, ‘Rastiya min ji ya Xwedê zêdetir e.’ 3Çimkî tu dipirsî, ‘Ji te re çi feydê dide? Bi gunehnekirinê ez çi bi dest dixim?’ 4Ezê bersiva te bidim, û ya hevalên te jî bi te re. 5Çavê xwe bide ezmanan û binêre; li ewran binihêre, yên ku ji te bilindtir in. 6Heke tu guneh bikî, tu li dijî wî çi pêk tînî? Û heke serhildanên te pir bin, tu çi li wî dikî? 7Heke tu rast bî, tu çi didî wî? An ew ji destê te çi distîne? 8Xerabiya te tenê li mirovekî wekî te dikeve, û rastiya te jî tenê li hevalekî mirov. 9Mirov di bin giraniya pir zordestiyan de dikin qîrîn; ew li dijî milê bihêzan hewarê dikin. 10Lê tu kes nabêje, ‘Ku da ye Xwedê, Afirînerê min, yê ku di şevê de stranan dide, 11yê ku ji heywanên erdê zêdetir me hîn dike û me ji çûkên ezmên aqiltir dike?’ 12Li wir ew dikin qîrîn, lê ew bersivê nade, ji ber pozbilindiya mirovên xerab. 13Bi rastî Xwedê guhdariya qîrîneke vala nake; Yê Karîndar guh nade wê. 14Îcar çiqasî kêmtir, ewê bersivê bide gava tu dibêjî ku tu wî nabînî— her çend doza te li ber wî be û divê tu li benda wî bimînî. 15Û niha, ji ber ku hêrsa wî hê ceza nekiriye, û wî kêm guh daye bêaqiliyê. 16Eyûb devê xwe bi axaftina vala vedike; ew bêyî zanînê peyvan zêde dike.”
