Qanûna Kahîntiyê 6 FHB Father's Heart Bible™

6 ¹Bavê me ji Mûsa re got:

²“Heke kesek guneh bike û li Bavê we bêbextî bike, bi vê yekê ku derheqê emanetekê, gerewekê an malê diziyê de cîranê xwe bixapîne, yan jî bi hîleyê heqê wî bixwe, ³yan jî tiştekî windabûyî bibîne û derheqê wî de derewan bike û bi derewan sond bixwe, her tiştê wisa yê ku mirov pê guneh dike, ⁴gava ku guneh bike û sûcdar be, divê tiştê ku diziye, yan bi zorê standiye, yan emaneta ku jê re hatibû emanetkirin, yan tiştê windabûyî yê ku dîtiye, vegerîne, ⁵yan jî her tiştê ku li ser wî bi derewan sond xwariye. Divê wî bi tevahî bide, ji pêncan yekê jî deyne ser û di roja ku li sûcê xwe mikur tê de, bide xweyê wî. ⁶Divê ew pêşkêşiya xwe ya berdêlê ji Bavê we re, ji kahin re bîne: beranekî bêqisûr ji keriyê, li gorî berdêla ku tu diyar dikî, wekî pêşkêşiya berdêlê. ⁷Wê kahin li hizûra Bavê we ji bo wî kefaretê bide û ji bo her tiştê ku kiriye û pê sûcdar bûye, wê bê bexişandin.”

Qurbana Şewitandinê

⁸Paşê Bavê me ji Mûsa re got:

⁹“Li Harûn û kurên wî emir bike: Ev e qanûna qurbana şewitandinê. Divê qurbana şewitandinê hemû şev heta sibê li ser ocaxa gorîgehê bimîne û divê agirê gorîgehê li ser wê pêketî bimîne. ¹⁰Wê kahin kincê xwe yê kitan li xwe bike û derpiyên kitanî li ser bedena xwe li xwe bike. Paşê wê xweliya ku piştî ku agir qurbana şewitandinê li ser gorîgehê dişewitîne dimîne, rake û li kêleka gorîgehê deyne. ¹¹Paşê wê kincên xwe ji xwe bike, kincên din li xwe bike û xweliyê bibe derveyî wargehê, cihekî paqij. ¹²Divê agirê li ser gorîgehê pêketî bimîne; divê netefe. Her sibe wê kahin daran deyne ser, qurbana şewitandinê li ser rêz bike û bezê qurbanên aştiyê li ser bişewitîne. ¹³Divê agir li ser gorîgehê hergav pêketî bimîne; divê netefe.

Pêşkêşiya Dexlê

¹⁴“Qanûna pêşkêşiya dexlê ev e: Divê kurên Harûn wê li hizûra Bavê we, li ber gorîgehê bînin. ¹⁵Wê kahin ji arvanê hûr û zeyta pêşkêşiya dexlê kulmekê bi tevahiya guniya wê ve hilîne û vê para diyarkirî li ser gorîgehê bişewitîne, ku bêhna wê bi Bavê we xweş bê. ¹⁶Harûn û kurên wî wê ya mayî bixwin. Divê bêhevîrtirş li cihekî pîroz bê xwarin; divê li hewşa Konê Hevdîtinê bê xwarin. ¹⁷Divê ew bi hevîrtirş neyê pehtin. Min ew ji pêşkêşiyên xwe yên şewitandinê wekî para wan daye wan. Wekî pêşkêşiya paqijiyê û pêşkêşiya berdêlê, ew herî pîroz e. ¹⁸Her mêrê ji dûndana Harûn dikare wê bixwe; ev ji pêşkêşiyên şewitandinê yên Bavê we di nav nifşên we de pareke herheyî ye. Her tiştê ku bi wan bikeve, wê pîroz bibe.”

¹⁹Bavê me ji Mûsa re got:

²⁰“Pêşkêşiya ku Harûn û kurên wî wê di roja meshkirina wî de ji Bavê we re pêşkêş bikin ev e: nêzîkî du lître arvanê hûr wekî pêşkêşiya dexlê ya rojane, nîvê wê serê sibê û nîvê wê êvarê. ²¹Wê bi zeytê li ser sêlê amade bike, baş hevîrkirî bîne û pêşkêşiya dexlê perçe perçe pêşkêş bike, ku bêhna wê bi Bavê we xweş bê. ²²Divê kahinê meshkirî yê ku ji nav kurên wî di şûna wî de tê, wê amade bike. Ev li hizûra Bavê we qanûneke herheyî ye: divê bi tevahî bê şewitandin. ²³Divê her pêşkêşiya dexlê ya kahinekî bi tevahî bê şewitandin; divê neyê xwarin.”

Pêşkêşiya Paqijiyê

²⁴Bavê me dîsa ji Mûsa re got:

²⁵“Ji Harûn û kurên wî re bêje: Qanûna pêşkêşiya paqijiyê ev e: Li cihê ku qurbana şewitandinê tê serjêkirin, wê li hizûra Bavê we serjê bikin; ew herî pîroz e. ²⁶Divê kahinê ku wê ji bo guneh pêşkêş dike, wê bixwe. Divê li cihekî pîroz, li hewşa Konê Hevdîtinê bê xwarin. ²⁷Her tiştê ku bi goştê wê bikeve, wê pîroz bibe. Heke xwîna wê bi kincekî ve bipijiqe, cihê ku pê pijiqiye li cihekî pîroz bişon. ²⁸Divê dîzika ku ew tê de tê kelandin bê şikandin. Heke di firaxekî tûnc de hatibe kelandin, divê bê xurandin û bi avê bê şûştin. ²⁹Her mêrê di nav kahinan de dikare wê bixwe; ew herî pîroz e. ³⁰Pêşkêşiya paqijiyê ya ku xwîna wê ji bo kefaretdayînê li Cihê Pîroz tê birin Konê Hevdîtinê, nabe ku bê xwarin; divê bi agir bê şewitandin.”