१ पेत्र 1

1 ¹येशू ख्रिस्ताचा प्रेषित पेत्र, पंत, गलतीया, कप्पदुकिया, आशिया व बिथुनिया येथे विखुरलेल्या, निवडलेल्या परदेशी लोकांस — ²आमच्या पित्याच्या पूर्वज्ञानाने निवडलेले, पवित्र आत्म्याकडून पवित्र केलेले, येशू ख्रिस्ताची आज्ञा पाळण्यासाठी व त्याच्या रक्ताने शिंपडले जाण्यासाठी: तुम्हांला कृपा व शांती विपुल प्रमाणात लाभो.

जिवंत आशेमध्ये जन्मलेले

³आमचा पिता, म्हणजे आपल्या प्रभु येशू ख्रिस्ताचा पिता धन्यवादित असो: आपल्या महान दयेने त्याने येशू ख्रिस्ताच्या मेलेल्यांतून झालेल्या पुनरुत्थानाद्वारे आम्हांला जिवंत आशेमध्ये नवा जन्म दिला, ⁴जे वतन कधीही नष्ट होणार नाही, बिघडणार नाही किंवा कोमेजणार नाही, असे तुमच्यासाठी स्वर्गात राखून ठेवलेले वतन प्राप्त व्हावे म्हणून; ⁵शेवटल्या काळी प्रकट होण्यास सिद्ध असलेल्या तारणासाठी तुम्ही विश्वासाच्या द्वारे आमच्या पित्याच्या सामर्थ्याने राखले जात आहात. ⁶यात तुम्ही मोठ्या आनंदाने उल्लास करता, जरी आता थोडा वेळ नाना प्रकारच्या परीक्षांमुळे तुम्हांला दुःख सोसावे लागले असेल. ⁷ह्या अशासाठी आल्या की, अग्नीत शुद्ध केले तरी नाश पावणाऱ्या सोन्यापेक्षा अधिक मोलवान असलेला तुमचा विश्वास — पारखलेला व खरा ठरलेला — येशू ख्रिस्त प्रकट होईल तेव्हा स्तुती, गौरव व सन्मान आणील. ⁸तुम्ही त्याला कधी पाहिले नाही तरी त्याच्यावर प्रीती करता; आता तुम्ही त्याला पाहत नाही तरी त्याच्यावर विश्वास ठेवता, आणि शब्दांनी वर्णन न करता येणाऱ्या व गौरवाने भरलेल्या आनंदाने उल्लास करता, ⁹कारण तुमच्या विश्वासाचे फळ, म्हणजे तुमच्या जिवांचे तारण, तुम्हांला प्राप्त होत आहे.

¹⁰तुमच्यासाठी असलेल्या कृपेविषयी बोलणाऱ्या संदेष्ट्यांनी ह्या तारणाचा बारकाईने शोध व तपास केला, ¹¹त्यांच्यामध्ये असलेल्या ख्रिस्ताच्या आत्म्याने ख्रिस्ताची दुःखे व त्यानंतरचे गौरव ह्यांविषयी आधीच सांगितले, तेव्हा तो कोणत्या काळाकडे व कोणत्या परिस्थितीकडे निर्देश करीत होता, ह्याचा त्यांनी शोध घेतला. ¹²त्यांना असे प्रकट करण्यात आले की, ह्या गोष्टींविषयी ते बोलले तेव्हा ते स्वतःची नव्हे तर तुमची सेवा करीत होते; त्याच गोष्टी आता स्वर्गातून पाठवलेल्या पवित्र आत्म्याच्या द्वारे तुम्हांला सुवार्ता सांगणाऱ्यांकडून तुम्हांला कळवण्यात आल्या आहेत. ह्या गोष्टींत डोकावून पाहण्याची देवदूतांनाही उत्कंठा आहे.

पवित्र होण्यास पाचारण

¹³म्हणून, कार्यासाठी तुमची मने कसून, पूर्णपणे सावध राहून, येशू ख्रिस्त प्रकट होईल तेव्हा तुम्हांला मिळणाऱ्या कृपेवर पूर्ण आशा ठेवा. ¹⁴आज्ञाधारक मुलांप्रमाणे, पूर्वी आपल्या अज्ञानात तुम्ही ज्या वासनांच्या आहारी गेला होता, त्यांच्याकडून स्वतःला घडवू देऊ नका. ¹⁵तर तुम्हांला बोलावणारा जसा पवित्र आहे, तसे तुम्हीही आपल्या सर्व वागणुकीत पवित्र व्हा;

¹⁶कारण असे लिहिले आहे: “पवित्र असा, कारण मी पवित्र आहे.”

¹⁷प्रत्येकाच्या कृत्याप्रमाणे पक्षपात न करता न्याय करणाऱ्या पित्याला तुम्ही हाक मारता, म्हणून येथील तुमचा प्रवासकाळ आदरयुक्त भयाने घालवा. ¹⁸तुम्हांला ठाऊक आहे की, तुमच्या पूर्वजांकडून चालत आलेल्या निरर्थक जीवनातून रुपे व सोने ह्या नाशवंत वस्तूंनी तुम्हांला सोडवले नाही, ¹⁹तर निर्दोष व निष्कलंक अशा कोकराच्या, म्हणजे ख्रिस्ताच्या मोलवान रक्ताने सोडवले. ²⁰जगाच्या स्थापनेपूर्वीच तो निवडला गेला होता, पण तुमच्यासाठी ह्या शेवटल्या काळी प्रकट झाला. ²¹त्याच्या द्वारे तुम्ही आमच्या पित्यावर विश्वास ठेवता, ज्याने त्याला मेलेल्यांतून उठवले व त्याचे गौरव केले, ह्यासाठी की तुमचा विश्वास व आशा आमच्या पित्यावर असावी.

²²बंधुप्रेमाच्या निर्व्याज प्रीतीसाठी सत्याचे पालन करून तुम्ही आपले जीव शुद्ध केले आहेत, म्हणून शुद्ध अंतःकरणाने एकमेकांवर मनापासून उत्कट प्रीती करा. ²³कारण तुम्ही नव्याने जन्मलेले आहात — नाशवंत बीजापासून नव्हे तर अविनाशी बीजापासून — आमच्या पित्याच्या जिवंत व टिकणाऱ्या वचनाच्या द्वारे. ²⁴कारण, “सर्व माणसे गवतासारखी आहेत, आणि त्यांचे सर्व वैभव रानफुलांसारखे आहे; गवत सुकून जाते व फुले गळून पडतात, ²⁵परंतु आमच्या पित्याचे वचन सर्वकाळ टिकते.” आणि हेच ते वचन आहे जे तुम्हांला घोषित करण्यात आले.