१ थेस्सलनीकाकरांस 5

5 ¹आता, बंधुभगिनींनो, काळ व समयांविषयी तुम्हांला काही लिहिण्याची गरज नाही. ²आपल्या प्रभू येशूचा दिवस रात्रीच्या चोरासारखा येतो, हे तुम्ही स्वतः चांगले जाणता. ³जेव्हा लोक म्हणतात, “शांती व सुरक्षा,” तेव्हा गर्भवती स्त्रीला जशा प्रसूतिवेदना होतात तसा त्यांच्यावर अकस्मात नाश येतो—आणि ते सुटणार नाहीत. ⁴पण, बंधुभगिनींनो, तुम्ही अंधारात नाही की तो दिवस तुम्हांला चोरासारखा गाठील. ⁵तुम्ही सर्व प्रकाशाची लेकरे व दिवसाची लेकरे आहात; आपण रात्रीचे किंवा अंधाराचे नाही. ⁶म्हणून मग, आपण इतरांसारखे झोपू नये, तर जागरूक व सावध राहावे. ⁷कारण जे झोपतात ते रात्रीच झोपतात, आणि जे धुंद होतात ते रात्रीच धुंद होतात. ⁸पण आपण दिवसाचे असल्यामुळे, आपण सावध राहावे; विश्वास व प्रीती हे उरस्त्राण आणि तारणाची आशा हे शिरस्त्राण घालावे. ⁹कारण आमच्या पित्याने आपल्याला क्रोधासाठी नव्हे, तर आपल्या प्रभू येशू ख्रिस्ताद्वारे तारण मिळवण्यासाठी नेमले आहे, ¹⁰जो आपल्यासाठी मरण पावला, अशासाठी की आपण जागे असो वा झोपलेले असो, त्याच्याबरोबर एकत्र जगावे. ¹¹म्हणून तुम्ही जसे करीत आहात तसेच एकमेकांना उत्तेजन द्या व एकमेकांना उभारी द्या.

प्रकाशाची लेकरे म्हणून जगणे

¹²बंधुभगिनींनो, आम्ही तुम्हांला विनंती करतो की जे तुमच्यामध्ये कष्ट करतात, प्रभूमध्ये तुम्हांला मार्गदर्शन करतात व तुम्हांला ताळ्यावर आणतात, त्यांचा आदर करा. ¹³त्यांच्या कार्यामुळे त्यांना प्रीतीने अत्यंत उच्च मानाने माना. एकमेकांशी शांतीने राहा.

¹⁴बंधुभगिनींनो, आम्ही तुम्हांला आग्रह करतो: आळशी लोकांना ताळ्यावर आणा, खचलेल्यांचे सांत्वन करा, दुर्बलांना आधार द्या, सर्वांशी सहनशील राहा. ¹⁵कोणीही कोणाला वाइटाबद्दल वाईट फेडू नये, तर एकमेकांचे व सर्वांचे नेहमी हित साधण्याचा प्रयत्न करा, याकडे लक्ष द्या.

¹⁶सर्वदा आनंद करा, ¹⁷निरंतर प्रार्थना करा, ¹⁸प्रत्येक गोष्टीत उपकारस्तुती करा; कारण ख्रिस्त येशूमध्ये तुमच्याविषयी आमच्या पित्याची हीच इच्छा आहे. ¹⁹पवित्र आत्म्याला विझवू नका. ²⁰भविष्यवाण्यांना तुच्छ मानू नका, ²¹तर सर्व गोष्टींची पारख करा; जे चांगले आहे ते धरून ठेवा. ²²प्रत्येक प्रकारच्या वाइटापासून दूर राहा.

²³शांतीचा आमचा पिता स्वतः तुम्हांला संपूर्णपणे पवित्र करो, आणि आपल्या प्रभू येशू ख्रिस्ताच्या येण्याच्या वेळी तुमचा संपूर्ण आत्मा, जीव व शरीर निर्दोष राखले जावो. ²⁴जो तुम्हांला पाचारण करतो तो विश्वासू आहे; तो हे खचित घडवून आणील.

²⁵बंधुभगिनींनो, आमच्यासाठी प्रार्थना करा.

²⁶सर्व बंधुभगिनींना पवित्र चुंबनाने सलाम करा. ²⁷हे पत्र सर्व बंधुभगिनींना वाचून दाखवावे, अशी मी तुम्हांला प्रभूसमोर आज्ञा करतो.

²⁸आपल्या प्रभू येशू ख्रिस्ताची कृपा तुमच्याबरोबर असो.