२ थेस्सलनीकाकरांस 3

3 ¹शेवटी, बंधुभगिनींनो, आमच्यासाठी प्रार्थना करा की, आपल्या प्रभु येशूचे वचन जसे तुमच्यामध्ये गौरवले गेले तसे ते वेगाने पुढे धावावे व त्याचा सन्मान व्हावा, ²आणि विपरीत व दुष्ट माणसांपासून आमची सुटका व्हावी; कारण सर्वच जण विश्वास ठेवणारे नाहीत. ³पण प्रभु विश्वासू आहे, तो तुम्हांला बळकट करील व त्या दुष्टापासून तुमचे रक्षण करील. ⁴आम्ही प्रभूमध्ये विश्वास ठेवतो की, आम्ही जी आज्ञा देतो ती तुम्ही करत आहात व करत राहाल. ⁵प्रभु तुमची अंतःकरणे आमच्या पित्याच्या प्रीतीकडे व ख्रिस्ताच्या सहनशीलतेकडे मार्गदर्शित करो.

आळशीपणाविरुद्ध ताकीद

⁶बंधुभगिनींनो, आपल्या प्रभु येशू ख्रिस्ताच्या नावाने आम्ही तुम्हांला आज्ञा देतो: जो कोणी बंधू आळशीपणात राहतो व तुम्हांला आमच्याकडून मिळालेल्या परंपरेविरुद्ध वागतो, त्याच्यापासून दूर राहा. ⁷तुम्ही स्वतः जाणता की तुम्ही आमचे अनुकरण केले पाहिजे, कारण आम्ही तुमच्यामध्ये आळशी नव्हतो. ⁸आम्ही कोणाचेही अन्न फुकट खाल्ले नाही; उलट, तुमच्यापैकी कोणावरही भार पडू नये म्हणून आम्ही कष्ट व श्रम करून रात्रंदिवस काम केले. ⁹आम्हांला तसा अधिकार नाही असे नाही, तर तुम्ही अनुकरण करावे म्हणून आम्ही स्वतःला तुमच्यासाठी आदर्श बनवावे, यासाठी असे केले. ¹⁰आम्ही तुमच्याबरोबर होतो तेव्हाही आम्ही तुम्हांला अशी आज्ञा दिली की, जो कोणी काम करण्याचे नाकारतो त्याने खाऊ नये. ¹¹कारण आम्ही ऐकतो की, तुमच्यापैकी काही जण आळशीपणात राहतात; ते कामात गुंतलेले नसून लुडबुड करणारे आहेत. ¹²अशा माणसांना आम्ही प्रभु येशू ख्रिस्तामध्ये आज्ञा देतो व आग्रह करतो की, त्यांनी शांतपणे काम करावे व स्वतःची भाकर खावी. ¹³आणि तुम्ही, बंधुभगिनींनो, चांगले करण्यात कंटाळू नका. ¹⁴या पत्रातील आमच्या वचनाचे जो कोणी पालन करत नाही, त्याला ओळखून ठेवा व त्याच्याशी संबंध ठेवू नका, म्हणजे त्याला लाज वाटेल. ¹⁵तरी त्याला शत्रू समजू नका, तर बंधू म्हणून त्याला ताकीद द्या.

शांती, अभिवादन आणि कृपा

¹⁶शांतीचा प्रभु स्वतः तुम्हांला सर्वदा, सर्व प्रकारे शांती देवो. प्रभु तुम्हा सर्वांबरोबर असो.

¹⁷मी, पौल, हे अभिवादन स्वतःच्या हाताने लिहितो—माझ्याकडून येणारे प्रत्येक पत्र खरे आहे याची ही खूण आहे; मी असेच लिहितो. ¹⁸आपल्या प्रभु येशू ख्रिस्ताची कृपा तुम्हा सर्वांबरोबर असो.