२ तीमथ्य 1

1 ¹आमच्या पित्याच्या इच्छेने ख्रिस्त येशूचा प्रेषित झालेला पौल, ख्रिस्त येशूमधील जीवनाच्या अभिवचनानुसार, ²तीमथ्याला, माझ्या प्रिय मुला: आमच्या पित्याकडून व आमचा प्रभु ख्रिस्त येशू याच्याकडून कृपा, दया आणि शांती तुला असो.

आमच्या पित्याने तुला दिलेली ज्योत प्रज्वलित कर

³माझ्या पूर्वजांप्रमाणे शुद्ध विवेकभावाने ज्याची मी सेवा करतो, त्या आमच्या पित्याचे मी उपकार मानतो; रात्रंदिवस माझ्या प्रार्थनांमध्ये मी तुझी सतत आठवण करतो. ⁴तुझ्या अश्रूंची आठवण करून, आनंदाने भरून जावे म्हणून मी तुला भेटण्यास उत्कंठित आहे. ⁵तुझ्यातील निष्कपट विश्वासाची मला आठवण होते—जो प्रथम तुझी आजी लोइस व तुझी आई युनीके यांच्यामध्ये जिवंत होता, आणि आता, माझी खात्री आहे की, तुझ्यामध्येही आहे.

⁶म्हणून मी तुला आठवण करून देतो की, माझे हात तुझ्यावर ठेवल्याने तुला मिळालेले आमच्या पित्याचे दान तू ज्योतीसारखे प्रज्वलित कर. ⁷कारण आमच्या पित्याने आपल्याला भीतीचा आत्मा दिला नाही, तर सामर्थ्याचा, प्रेमाचा व संयमाचा आत्मा दिला. ⁸म्हणून आमच्या प्रभूच्या साक्षीविषयी, किंवा त्याचा कैदी असलेल्या माझ्याविषयी लाज बाळगू नकोस, तर आमच्या पित्याच्या सामर्थ्याने सुवार्तेसाठी दुःखात सहभागी हो. ⁹त्याने आपले तारण केले आणि पवित्र पाचारणाने आपल्याला बोलावले, ते आपल्या कृत्यांमुळे नव्हे, तर त्याच्या स्वतःच्या संकल्पामुळे व कृपेमुळे, जी काळाच्या आरंभापूर्वीच ख्रिस्त येशूमध्ये आपल्याला देण्यात आली, ¹⁰आणि आता आमचा तारणारा ख्रिस्त येशू याच्या प्रकट होण्याद्वारे ती प्रगट झाली; त्याने मृत्यू नाहीसा केला आणि सुवार्तेद्वारे जीवन व अमरत्व प्रकाशात आणले. ¹¹या सुवार्तेसाठी माझी उपदेशक, प्रेषित व शिक्षक म्हणून नेमणूक झाली. ¹²याच कारणासाठी मी अशा प्रकारे दुःख भोगतो. पण मला लाज वाटत नाही, कारण मी ज्याच्यावर विश्वास ठेवला आहे त्याला मी ओळखतो, आणि माझी खात्री आहे की, तो परत येण्याच्या दिवसापर्यंत माझ्याकडे सोपवलेले तो जपून ठेवण्यास समर्थ आहे.

¹³माझ्याकडून तू ऐकलेल्या सुवचनांचा नमुना ख्रिस्त येशूमधील विश्वासाने व प्रेमाने धरून ठेव. ¹⁴तुझ्याकडे सोपवलेली ती चांगली ठेव आपल्यामध्ये राहणाऱ्या पवित्र आत्म्याद्वारे जपून ठेव.

¹⁵तुला हे माहीत आहे की, आशिया प्रांतातील सर्वजण माझ्यापासून विन्मुख झाले, त्यांत फुगेल व हर्मुगनेस हेही आहेत. ¹⁶आमचा प्रभु येशू अनेसिफराच्या घराण्यावर दया करो, कारण त्याने पुष्कळदा मला ताजेतवाने केले आणि माझ्या साखळ्यांची त्याला लाज वाटली नाही. ¹⁷उलट, तो रोम येथे आल्यावर मला सापडेपर्यंत त्याने आतुरतेने माझा शोध घेतला. ¹⁸त्या दिवशी त्याला प्रभूकडून दया प्राप्त व्हावी असे आमचा प्रभु येशू करो. इफिसमध्ये त्याने किती सेवा केली हे तुला चांगले ठाऊक आहे.