एस्तेर 5

5 ¹तिसऱ्या दिवशी एस्तेरने राजवस्त्रे परिधान केली आणि राजवाड्याच्या आतल्या अंगणात, राजाच्या दरबारासमोर उभी राहिली. राजा दरबारात आपल्या राजसिंहासनावर बसला होता, राजवाड्याच्या प्रवेशद्वाराकडे तोंड करून. ²राजाने राणी एस्तेरला अंगणात उभी असलेली पाहिली, तेव्हा तिच्यावर त्याची कृपादृष्टी झाली आणि त्याने आपल्या हातातील सोन्याचा राजदंड तिच्याकडे पुढे केला. ती जवळ आली आणि तिने त्याच्या टोकाला स्पर्श केला.

³राजाने विचारले, “राणी एस्तेर, काय झाले? तुझी काय विनंती आहे? अर्ध्या राज्यापर्यंत तुला दिले जाईल.”

⁴एस्तेर म्हणाली, “राजाची मर्जी असल्यास, राजा आणि हामान यांनी आज मी तयार केलेल्या मेजवानीला यावे.”

⁵राजा म्हणाला, “एस्तेरने सांगितल्याप्रमाणे करण्यासाठी हामानाला लवकर आणा.” मग राजा आणि हामान एस्तेरने तयार केलेल्या मेजवानीला आले.

⁶द्राक्षारस पीत असताना राजाने विचारले, “एस्तेर, तुझी काय मागणी आहे? ती मंजूर केली जाईल. आणि तुझी काय विनंती आहे? अर्धे राज्य असले तरी—ते तुझे आहे.”

⁷एस्तेरने उत्तर दिले, “माझी मागणी आणि माझी विनंती हीच आहे: ⁸जर राजाची माझ्यावर कृपादृष्टी झाली असेल, आणि माझी मागणी मंजूर करून माझी विनंती पूर्ण करणे राजाला योग्य वाटत असेल, तर राजा आणि हामान यांनी मी त्यांच्यासाठी तयार करणार असलेल्या मेजवानीला यावे. उद्या मी राजा सांगेल त्याप्रमाणे करीन.”

हामानाचा राग मर्दखयावर वळतो

⁹त्या दिवशी हामान आनंदित आणि प्रफुल्लित होऊन निघाला. पण राजाच्या दरवाजाजवळ मर्दखय आपल्यासमोर उठलादेखील नाही व थरथरलादेखील नाही, हे पाहून हामान मर्दखयावर संतापला. ¹⁰तरीही हामानाने स्वतःला आवरले आणि घरी गेला. त्याने आपल्या मित्रांना व आपली पत्नी जेरेश हिला बोलावून घेतले, ¹¹आणि हामानाने त्यांना आपल्या संपत्तीचे वैभव, आपले पुष्कळ पुत्र, आणि राजाने आपणाला कसा सन्मान देऊन राजाच्या सर्व सरदारांहून व सेवकांहून वर बढती दिली, हे सांगितले.

¹²हामान पुढे म्हणाला, “एवढेच नाही. राणी एस्तेरने राजासोबत फक्त मलाच आपल्या मेजवानीला निमंत्रित केले, आणि उद्याही राजासोबत मलाच निमंत्रित केले आहे. ¹³तरी जोपर्यंत तो यहूदी मर्दखय राजाच्या दरवाजाजवळ बसलेला मी पाहतो, तोपर्यंत या सर्वाचा मला काहीच उपयोग नाही.”

¹⁴तेव्हा त्याची पत्नी जेरेश व त्याचे सर्व मित्र त्याला म्हणाले, “पंच्याहत्तर फूट उंच एक खांब उभारायला लाव. सकाळी राजाला विनंती कर की मर्दखयाला त्यावर टांगावे. मग आनंदाने राजासोबत मेजवानीला जा.” हामानाला हे आवडले आणि त्याने तो खांब उभारून घेतला.