यशया 23

23 ¹सोरविषयीची देववाणी: तार्शीशच्या जहाजांनो, आक्रोश करा, कारण तुमचे बंदर उद्ध्वस्त झाले आहे, घर किंवा आश्रय काहीच उरले नाही. कुप्र देशातून त्यांच्यापर्यंत ही बातमी पोहोचली आहे. ²समुद्रकिनाऱ्यावर राहणाऱ्यांनो, सीदोनच्या व्यापाऱ्यांनो, स्तब्ध राहा; तुमचे दूत समुद्र ओलांडून जातात. ³विशाल जलाशयांवरून शीहोरचे धान्य, नाईलचे पीक येत असे—हेच तिचे उत्पन्न होते; आणि ती राष्ट्रांची बाजारपेठ बनली. ⁴सीदोना, लज्जित हो, कारण समुद्र बोलला आहे, समुद्राचा दुर्ग म्हणतो: “मी प्रसूतिवेदना भोगल्या नाहीत किंवा जन्म दिला नाही, मी तरुणांना वाढवले नाही किंवा तरुणींना पोसले नाही.” ⁵जेव्हा ही बातमी मिसरला पोहोचेल, तेव्हा सोरविषयीच्या वृत्ताने ते वेदनेने तळमळतील. ⁶तार्शीशला पार जा; समुद्रकिनाऱ्यावर राहणाऱ्यांनो, आक्रोश करा. ⁷हीच का तुमची आनंदाने भरलेली नगरी, जिचा उगम प्राचीन काळापर्यंत मागे जातो, जिच्या पायांनी तिला दूरदूरच्या देशांत वस्ती करण्यास नेले? ⁸सोरविरुद्ध ही योजना कोणी आखली, मुकुट बहाल करणारी ती नगरी, जिचे व्यापारी राजपुत्र होते, जिचे सौदागर पृथ्वीवरील प्रतिष्ठित लोक होते? ⁹स्वर्गातील सैन्यांच्या पित्याने ही योजना आखली —सर्व वैभवशाली गर्व विटाळावा, पृथ्वीवरील सर्व प्रतिष्ठितांना नम्र करावे म्हणून. ¹⁰तार्शीशच्या कन्ये, नाईलप्रमाणे तुझ्या भूमीवर पसरून जा; आता बंदर उरले नाही. ¹¹त्याने समुद्रावर आपला हात पसरला आहे; त्याने राज्ये हादरवली आहेत. आमच्या पित्याने आज्ञा दिली आहे की कनानाचे दुर्ग उद्ध्वस्त करावेत.

¹²तो म्हणाला, “सीदोनच्या भ्रष्ट झालेल्या कुमारी कन्ये, तू यापुढे आनंद करणार नाहीस. ऊठ, कुप्रला पार जा; तेथेही तुला विसावा मिळणार नाही.”

¹³बाबेली लोकांच्या देशाकडे पाहा! हेच ते लोक जे आता उरले नाहीत; अश्शूराने तो देश रानटी पशूंच्या हवाली केला. त्यांनी आपले वेढ्याचे बुरूज उभारले, त्यांनी तिचे राजवाडे उघडे करून लुटले, त्यांनी तिला उजाड बनवले. ^a a v13 इब्री: खास्दी लोक — प्राचीन बाबेलवर राज्य करणारे लोक. ¹⁴तार्शीशच्या जहाजांनो, आक्रोश करा, कारण तुमचा दुर्ग उद्ध्वस्त झाला आहे. ¹⁵त्या दिवशी सोर सत्तर वर्षे विसरली जाईल, एका राजाच्या आयुष्याइतक्या काळापर्यंत. सत्तर वर्षांच्या शेवटी, सोरची अवस्था वेश्येच्या गाण्यासारखी होईल: ¹⁶“वीणा घे, नगरात फिरून ये, विसरल्या गेलेल्या वेश्ये; गोड सूर वाजव, पुष्कळ गाणी गा, म्हणजे तुझी आठवण होईल.” ¹⁷सत्तर वर्षांच्या शेवटी, आमचा पिता सोरकडे आपले लक्ष वळवील, आणि ती पुन्हा आपल्या कमाईकडे वळेल, पृथ्वीवरील जगातील सर्व राज्यांशी वेश्याकर्म करील. ¹⁸पण तिचा नफा व तिची कमाई आमच्या पित्यासाठी पवित्र म्हणून वेगळी ठेवली जाईल. ती साठवली जाणार नाही किंवा जमा केली जाणार नाही; तिचा नफा आमच्या पित्यासमोर राहणाऱ्यांना मिळेल, विपुल अन्न व उत्तम वस्त्रांसाठी.