यशया 33

33 ¹अरे विनाशका, तुला हायहाय! तुझा तर नाश झाला नाही; अरे विश्वासघातक्या, ज्याचा कोणी विश्वासघात केला नाही असा तू! तू विनाश करण्याचे संपवशील तेव्हा तुझा नाश होईल; तू विश्वासघात करणे थांबवशील तेव्हा तुझा विश्वासघात होईल.

²हे आमच्या पित्या, आमच्यावर कृपा कर; आम्ही तुझी वाट पाहतो. दर सकाळी तू आमचे बळ हो, संकटाच्या समयी तू आमचे तारण हो. ³तुझ्या वाणीच्या गडगडाटाने लोक पळून जातात; तू उठतोस तेव्हा राष्ट्रे विखरून जातात. ⁴टोळ गोळा करतात तसे तुमचे लूटधन गोळा केले जाते; थव्याथव्याने येणाऱ्या टोळांप्रमाणे लोक त्यावर तुटून पडतात.

⁵आमचा पिता उंच केला जातो, कारण तो उच्चस्थानी वस्ती करतो; त्याने सीयोन न्याय व नीतिमत्तेने भरून टाकले आहे. ⁶तुझ्या काळांचा तो भक्कम पाया होईल, तारण, ज्ञान व विद्येची समृद्धी होईल; आमच्या पित्याचे भय हाच सीयोनाचा ठेवा आहे.

⁷पाहा, त्यांचे शूर वीर रस्त्यांत आक्रोश करतात; शांतीचे दूत हमसाहमशी रडतात. ⁸महामार्ग ओसाड पडले आहेत; वाटसरू रस्त्यांवरून नाहीसे झाले आहेत. करार मोडला आहे, त्याची नगरे तुच्छ लेखली आहेत, कोणाचाही मान राखला जात नाही. ⁹भूमी शोक करते व क्षीण होते; लबानोन लज्जित होऊन कोमेजतो; शारोन वाळवंटासारखे झाले आहे, आणि बाशान व कर्मेल आपली पाने झाडून टाकतात.

¹⁰“आता मी उठेन,” आमचा पिता म्हणतो, “आता मी उंच केला जाईन, आता मी स्वतःला उचलून धरीन. ¹¹तुम्ही भुसा गर्भात धरता, तुम्ही धसकटास जन्म देता; तुमचा श्वास हाच अग्नी आहे, जो तुम्हांला भस्म करील. ¹²लोक जळून राख होतील, तोडून टाकून पेटवलेल्या काट्यांप्रमाणे. ¹³अहो दूर असणाऱ्यांनो, मी काय केले ते ऐका; आणि जवळ असणाऱ्यांनो, माझे सामर्थ्य मान्य करा.”

¹⁴सीयोनातील पापी घाबरून गेले आहेत; अधर्म्यांना थरकाप सुटला आहे: “आमच्यांपैकी कोण या भस्म करणाऱ्या अग्नीबरोबर राहू शकेल? आमच्यांपैकी कोण सार्वकालिक ज्वालांबरोबर राहू शकेल?” ¹⁵जो नीतीने चालतो व जे योग्य ते बोलतो, जो जुलमाने मिळणारा लाभ नाकारतो व लाच घेण्यापासून आपला हात आवरतो, जो रक्तपाताच्या कारस्थानांकडे कान बंद करतो व दुष्कर्माकडे डोळे झाकतो, ¹⁶हाच तो जो उंचस्थानी वस्ती करील, ज्याचा आश्रय डोंगरांतील गड असतील; त्याला त्याची भाकर दिली जाईल, आणि त्याचे पाणी कधी आटणार नाही.

¹⁷तुझे डोळे राजाला त्याच्या सौंदर्यात पाहतील; ते दूरवर पसरलेला देश पाहतील. ¹⁸तुझे हृदय पूर्वीच्या दहशतीचे स्मरण करील: “मोजणी करणारा कोठे आहे? खंडणीचे वजन करणारा कोठे आहे? बुरुजांची मोजदाद करणारा कोठे आहे?” ¹⁹त्या उर्मट लोकांना तू आता पाहणार नाहीस, ज्यांची बोली इतकी विचित्र की समजत नाही, अशी भाषा जी तुला कळत नाही, तिच्यात ते बडबडतात.

²⁰सीयोनाकडे पाहा, आपल्या नेमलेल्या सणांच्या नगराकडे! तुझे डोळे यरुशलेमेला पाहतील, शांतीच्या निवासस्थानाला, न हलणाऱ्या तंबूला, ज्याच्या मेखा कधी उपटल्या जाणार नाहीत व ज्याच्या दोऱ्या कधी तुटणार नाहीत. ²¹परंतु तेथे आमचा पिता आपल्या वैभवात आमच्यासाठी रुंद नद्या व प्रवाहांचे स्थान होईल, जेथून वल्ह्यांचे कोणतेही तारू जाऊ शकत नाही व कोणतेही बलाढ्य जहाज पार होऊ शकत नाही. ²²कारण आमचा पिता आमचा न्यायाधीश आहे, आमचा पिता आमचा नियमकर्ता आहे, आमचा पिता आमचा राजा आहे; तोच आम्हांला तारील.

²³तुझे दोरखंड सैल लोंबत आहेत: ते डोलकाठी आपल्या जागी धरून ठेवू शकत नाहीत की शीड पसरलेले ठेवू शकत नाहीत. तेव्हा लूटधनाची विपुलता वाटली जाईल, आणि पांगळेदेखील लूट घेऊन जातील. ²⁴आणि सीयोनात राहणारा कोणीही म्हणणार नाही, “मी आजारी आहे”; तेथे वस्ती करणाऱ्या लोकांच्या पापांची क्षमा होईल.