स्तोत्रसंहिता 101

101 ¹करार-प्रेमाविषयी व न्यायाविषयी मी गाईन; हे माझ्या पित्या, मी तुझ्यासाठी स्तुतिगान करीन. ²मी निर्दोष मार्गाचे काळजीपूर्वक अनुसरण करीन. तू माझ्याकडे कधी येशील? मी माझ्या घरात मनाच्या प्रामाणिकपणाने चालेन. ³मी कोणतीही निरर्थक गोष्ट माझ्या डोळ्यांपुढे ठेवणार नाही. मार्गभ्रष्ट होणाऱ्यांचे कृत्य मी तिरस्कारतो; ते मला चिकटणार नाही. ⁴कुटिल मन माझ्यापासून दूर जाईल; दुष्टतेचे मला काहीच कळणार नाही. ⁵जो कोणी गुप्तपणे आपल्या शेजाऱ्याची निंदा करतो, त्याला मी शांत करीन; गर्विष्ठ डोळे व अहंकारी मन असणाऱ्याला मी सहन करणार नाही. ⁶माझी दृष्टी देशातील विश्वासू लोकांवर आहे, यासाठी की त्यांनी माझ्याजवळ राहावे; जो निर्दोष मार्गाने चालतो तो माझी सेवा करील. ⁷कपट करणारा कोणीही माझ्या घरात राहणार नाही; खोटे बोलणारा कोणीही माझ्या डोळ्यांपुढे टिकणार नाही. ⁸प्रत्येक सकाळी मी देशातील सर्व दुष्टांना शांत करीन, आमच्या पित्याच्या नगरातून प्रत्येक दुष्कर्म्याला उच्छेदून टाकीन.