स्तोत्रसंहिता 58

58 ¹अहो अधिकाऱ्यांनो, तुम्ही खरोखर न्याय्य गोष्टींचा निर्णय करता का? तुम्ही मनुष्यांच्या मुलांचा न्याय निष्पक्षपणे करता का? ^a a v1 “नाश करू नको” हे या स्तोत्राच्या गायनाच्या सुराचे नाव आहे. ²नाही, तुम्ही आपल्या मनात अन्यायाचे बेत रचता; तुमचे हात देशभर हिंसाचार पसरवतात. ³दुष्ट लोक गर्भापासूनच परके झालेले असतात; ते जन्मापासूनच बहकतात, खोटे बोलतात. ⁴त्यांचे विष सर्पाच्या विषासारखे आहे, आपले कान बंद करणाऱ्या बहिऱ्या नागासारखे, ⁵म्हणजे त्याला गारुड्यांचा आवाज किंवा चतुर मांत्रिकाचा आवाज ऐकू येऊ नये. ⁶हे आमच्या पित्या, त्यांच्या तोंडांतील दात मोडून टाक; हे आमच्या पित्या, त्या तरुण सिंहांच्या दाढा उपटून काढ! ⁷वाहून जाणाऱ्या पाण्यासारखे ते नाहीसे होवोत; आमचा पिता जेव्हा आपले बाण नेम धरतो, तेव्हा ते छाटले जावोत. ⁸सरपटताना विरघळून जाणाऱ्या गोगलगायीसारखे, ज्याने कधी सूर्य पाहिला नाही अशा मृतावस्थेत जन्मलेल्या बाळासारखे. ⁹तुमच्या भांड्यांना काट्यांची धग जाणवण्याआधीच, ते हिरवे असोत वा जळत असोत, तो त्यांना वाहून नेईल. ¹⁰नीतिमान आनंद करतील जेव्हा त्यांना न्याय झालेला दिसेल; ते दुष्टांच्या रक्तात आपले पाय धुतील. ¹¹आणि लोक म्हणतील, “खरोखर नीतिमानांसाठी प्रतिफळ आहे; खरोखर आमचा पिता पृथ्वीचा न्याय करतो.”