स्तोत्रसंहिता 73

73 ¹खरोखर आमचा पिता इस्राएलाशी चांगला आहे, जे अंतःकरणाने शुद्ध आहेत त्यांच्याशी चांगला आहे.

²पण माझ्याविषयी म्हणाल तर, माझे पाय जवळजवळ अडखळले होते; माझी पावले घसरण्याच्या बेतात होती. ³कारण दुष्टांची भरभराट पाहून मी गर्विष्ठांचा हेवा केला. ⁴कारण मरतानाही त्यांना वेदना होत नाहीत; त्यांची शरीरे धष्टपुष्ट व निरोगी असतात. ⁵इतरांप्रमाणे ते संकटात नसतात; इतर मनुष्यांप्रमाणे त्यांच्यावर आघात होत नाही. ⁶म्हणून गर्व हा त्यांचा गळ्यातील हार आहे; हिंसा त्यांना वस्त्राप्रमाणे झाकते. ⁷स्थूलपणामुळे त्यांचे डोळे बाहेर आले आहेत; त्यांच्या अंतःकरणातील कल्पना मर्यादेपलीकडे धावतात. ⁸ते थट्टा करतात व द्वेषाने बोलतात; उच्चस्थानावरून ते जुलमाची धमकी देतात. ⁹ते आपली तोंडे आकाशाविरुद्ध लावतात, आणि त्यांची जीभ पृथ्वीभर ऐटीने फिरते. ¹⁰म्हणून त्याचे लोक त्यांच्याकडे वळतात, आणि विपुल पाणी पिऊन टाकतात. ¹¹आणि ते म्हणतात, “देवाला कसे कळते? परात्परामध्ये ज्ञान आहे काय?” ¹²पाहा—हेच ते दुष्ट आहेत; नेहमी निर्धास्त राहून ते धनसंपत्तीत वाढतात.

¹³खरोखर मी व्यर्थच माझे अंतःकरण शुद्ध राखले आणि निर्दोषपणे माझे हात धुतले. ¹⁴कारण दिवसभर माझ्यावर आघात होत राहिला आणि प्रत्येक सकाळी मला शासन झाले.

¹⁵जर मी म्हटले असते, “मी असे बोलेन,” तर तुझ्या मुलांच्या पिढीचा मी विश्वासघात केला असता. ¹⁶जेव्हा मी हे सर्व समजून घेण्याचा प्रयत्न केला, तेव्हा ते माझ्या दृष्टीने कष्टप्रद काम वाटले, ¹⁷जोपर्यंत मी आमच्या पित्याच्या पवित्रस्थानात गेलो नाही तोपर्यंत; मग मला त्यांचा शेवट समजला. ¹⁸खरोखर तू त्यांना निसरड्या जागी ठेवतोस; तू त्यांना नाशात पाडतोस. ¹⁹क्षणात त्यांचा कसा नाश होतो, भयंकर संकटांनी ते पूर्णपणे वाहून जातात! ²⁰कोणी जागे झाल्यावर स्वप्नाप्रमाणे, हे सार्वभौम पित्या, जेव्हा तू जागृत होशील, तेव्हा तू त्यांना भासांप्रमाणे तुच्छ मानशील.

²¹जेव्हा माझे अंतःकरण कडवट झाले आणि माझ्या आतमध्ये मला वेदना झाल्या, ²²मी मूर्ख व अज्ञानी होतो; तुझ्यापुढे मी पशूसारखा होतो. ²³तरीही, मी निरंतर तुझ्याजवळ आहे; तू माझा उजवा हात धरतोस. ²⁴तू तुझ्या सल्ल्याने मला मार्गदर्शन करतोस, आणि नंतर तू मला गौरवात घेशील. ²⁵स्वर्गात तुझ्यावाचून मला कोण आहे? आणि तुझ्याखेरीज पृथ्वीवर मला कशाचीही इच्छा नाही. ²⁶माझे शरीर व माझे अंतःकरण खचून जावो, पण आमचा पिता माझ्या अंतःकरणाचे बळ आणि सर्वकाळचे माझे वतन आहे.

²⁷कारण जे तुझ्यापासून दूर आहेत ते नाश पावतील; जो कोणी तुझ्याशी अविश्वासू आहे त्याचा तू अंत करतोस. ²⁸पण माझ्यासाठी, आमच्या पित्याजवळ राहणे हेच चांगले आहे; मी सार्वभौम पित्याला माझा आश्रय केले आहे, म्हणजे मी तुझ्या सर्व कृत्यांचे वर्णन करू शकेन.