स्तोत्रसंहिता 83

83 ¹हे आमच्या पित्या, तू स्तब्ध राहू नकोस; हे आमच्या पित्या, तू शांत राहू नकोस, स्वस्थ बसू नकोस. ²कारण पाहा, तुझे शत्रू गडबड करत आहेत; तुझा द्वेष करणारे आपली मस्तके उंचावत आहेत. ³तुझ्या लोकांविरुद्ध ते गुप्तपणे कारस्थान करतात; तुला प्रिय असणाऱ्यांविरुद्ध ते एकत्र येऊन कट रचतात. ⁴ते म्हणतात, “चला, आपण त्यांना राष्ट्र म्हणून नष्ट करू या; इस्राएलाचे नाव यापुढे स्मरणात राहू नये.” ⁵एकमताने ते कट रचतात; तुझ्याविरुद्ध ते करार करतात, ⁶अदोमाचे तंबू आणि इश्माएली, मवाब आणि हगारी, ⁷गबाल, अम्मोन आणि अमालेक, पलिष्ट्यांसह सोराचे रहिवासी. ⁸अश्शूरही त्यांना जाऊन मिळाला आहे; ते लोटाच्या वंशजांचा बळकट बाहू झाले आहेत.

⁹जसे तू मिद्यानाचे केलेस, तसे त्यांचे कर, जसे किशोन नदीजवळ सीसरा आणि याबीन यांचे केलेस, ¹⁰जे एन-दोर येथे नष्ट झाले आणि भूमीसाठी खत बनले. ¹¹त्यांच्या प्रतिष्ठितांना ओरेब व जेब यांच्यासारखे कर, त्यांच्या सर्व अधिपतींना जेबह व सलमुन्ना यांच्यासारखे कर, ¹²जे म्हणाले, “आपण देवाची कुरणे आपल्यासाठी घेऊ या.” ¹³हे माझ्या पित्या, त्यांना भोवऱ्यातल्या धुळीसारखे, वाऱ्यापुढील भुसासारखे कर. ¹⁴जसा अग्नी अरण्यातून जाळत जातो, जशी ज्वाला पर्वतांना पेटवते, ¹⁵तसा तू आपल्या वादळाने त्यांचा पाठलाग कर आणि आपल्या झंझावाताने त्यांना घाबरवून सोड. ¹⁶त्यांची तोंडे लज्जेने झाकून टाक, म्हणजे हे आमच्या पित्या, ते तुझे नाव शोधतील. ¹⁷ते सदासर्वकाळ लज्जित व घाबरे होवोत; ते अपमानात नष्ट होवोत, ¹⁸म्हणजे त्यांना कळेल की, ज्याचे नाव आमचा पिता आहे, असा केवळ तूच सर्व पृथ्वीवर परात्पर आहेस.