स्तोत्रसंहिता 85

85 ¹हे आमच्या पित्या, तू आपल्या भूमीवर कृपा केलीस; तू याकोबाचे भाग्य पुन्हा स्थापिलेस. ²तू आपल्या लोकांचा अपराध क्षमा केलास; तू त्यांचे सर्व पाप झाकलेस. ³तू आपला सर्व क्रोध मागे घेतलास; तू आपल्या तीव्र रागापासून वळलास.

⁴हे आमच्या पित्या, आमच्या तारणा, आम्हांला पुन्हा स्थापित कर; आमच्यावरचा तुझा संताप दूर कर. ⁵तू आमच्यावर सर्वकाळ रागावशील काय? तू पिढ्यानपिढ्या आपला राग लांबवशील काय? ⁶तू आम्हांला पुन्हा जिवंत करणार नाहीस काय, म्हणजे तुझे लोक तुझ्यामध्ये आनंद करतील? ⁷हे आमच्या पित्या, आम्हांला तुझी प्रेमदया दाखव, आणि आम्हांला तुझे तारण दे.

⁸आमचा पिता काय बोलेल ते मी ऐकतो; कारण तो आपल्या लोकांशी, आपल्या भक्तांशी शांतीचे बोलेल; पण त्यांनी पुन्हा आपल्या मूर्खपणाच्या मार्गांकडे वळू नये. ⁹खरोखर जे त्याचे भय धरतात त्यांच्याजवळ त्याचे तारण आहे, म्हणजे आपल्या भूमीत गौरव वास करील. ¹⁰प्रेमदया व सत्यता एकत्र भेटली आहेत; नीतिमत्ता व शांती यांनी परस्परांचे चुंबन घेतले आहे. ¹¹सत्यता पृथ्वीतून उगवते, आणि नीतिमत्ता आकाशातून खाली पाहते. ¹²होय, आमचा पिता जे चांगले ते देईल, आणि आमची भूमी आपले पीक देईल. ¹³नीतिमत्ता त्याच्यापुढे चालेल आणि त्याच्या पावलांसाठी मार्ग तयार करील.