प्रकटीकरण 10

10 ¹मग मी आणखी एक सामर्थ्यवान देवदूत स्वर्गातून खाली येताना पाहिला; तो ढगाने वेढलेला होता, त्याच्या डोक्यावर मेघधनुष्य होते, त्याचे मुख सूर्यासारखे आणि त्याचे पाय अग्नीच्या खांबांसारखे होते. ²त्याच्या हातात एक लहान उघडलेली गुंडाळी होती; त्याने आपला उजवा पाय समुद्रावर आणि डावा पाय भूमीवर ठेवला, ³आणि सिंहाच्या गर्जनेसारखा तो मोठ्याने ओरडला. जेव्हा तो ओरडला, तेव्हा सात मेघगर्जना बोलल्या.

⁴जेव्हा त्या सात मेघगर्जना बोलल्या, तेव्हा मी लिहिणार होतो, पण मला स्वर्गातून एक वाणी ऐकू आली: “त्या ज्या बोलल्या ते बंद करून ठेव; ते लिहू नकोस.”

⁵मग जो देवदूत समुद्रावर व भूमीवर उभा असलेला मी पाहिला होता, त्याने आपला उजवा हात स्वर्गाकडे उंच केला, ⁶आणि जो युगानुयुग सदासर्वकाळ जिवंत आहे, ज्याने स्वर्ग व त्यातील सर्व काही, पृथ्वी व तिच्यातील सर्व काही, आणि समुद्र व त्यातील सर्व काही निर्माण केले, त्या आमच्या पित्याची शपथ वाहून तो म्हणाला: “आता आणखी विलंब होणार नाही! ⁷जेव्हा सातवा देवदूत आपला कर्णा वाजवणार आहे, तेव्हा आमच्या पित्याचे रहस्य पूर्ण होईल, जसे त्याने आपल्या सेवक संदेष्ट्यांना जाहीर केले होते.” ^a a v7 आमच्या पित्याने संदेष्ट्यांद्वारे जाहीर केलेले रहस्य त्याच्या पुत्रामध्ये आपल्या पूर्णतेला पोहोचते — सर्व लोकांना कळवलेली सुवार्ता (इफिसकर ३:८-९; कलस्सैकर १:२६-२७).

⁸स्वर्गातून आलेली ती वाणी पुन्हा माझ्याशी बोलली: “जा, समुद्रावर व भूमीवर उभ्या असलेल्या देवदूताच्या हातातली ती उघडलेली गुंडाळी घे.”

⁹म्हणून मी त्या देवदूताकडे गेलो आणि ती लहान गुंडाळी मला दे, असे मागितले. तो मला म्हणाला, “ती घे आणि खा. ती तुझे पोट कडू करेल, पण तुझ्या तोंडात मधासारखी गोड लागेल.”

¹⁰मी ती लहान गुंडाळी देवदूताच्या हातातून घेतली आणि खाल्ली. माझ्या तोंडात ती मधासारखी गोड लागली; पण खाल्ल्यावर माझे पोट कडू झाले. ¹¹मग त्यांनी मला सांगितले, “अनेक लोक, राष्ट्रे, भाषा व राजे यांच्याविषयी तू पुन्हा संदेश दिला पाहिजेस.”