Ina Nali Katang Machihomana
Ithumwui Avāna, ina iwui mibingli machihomana da, kapāngwui lairik chi kali leida da kathui. Chieina rao chi hānga: kakhanangbingli ringkhangasak tui hāng khavai tamchithei kahai male samphangda, ana kashao, morhā serkhāk, kala machora̱ mashorror, imai mathumla phungkhui, ili khamashunga ngasakpa nganailakhaira da shitsanglaga.
50 1Ithumwui Avāna hithāda hānga: "Ina nava̱li chiho kahai kapāngwui lairik chi kali leikhala? Lah iwui leiman kazangbing khipāli ina nali yorhaikhala? Yanglu, na nawui morei vang eina yorsanghaira, kala nava̱ nawui khangui vang eina chihohaira. 2Ina rā tharan, khisāda khipākha maleimana? Ina kaho tharan, ngahānkā khavai khipākha maleikhala? Ningkhān ngasak khavai iwui pāng shorkar tangda leilā? Lah iwuili kanshok khavai pangshap maleimalā? Yanglu, iwui kakharar eina ina shamadru theng ngasakra, kongla siwuk onngasakra; athumwui khai tara̱ mavātwui vang nganamshihaora, kala ra̱kachangwui vang thihaora. 3Ina kazingramli tangkhamang eina sāri shaksāmira, kala china kachon zika eina fakhamra."
4Iwui Reikhamatai Avāna ili sākhangatha̱wui male mihaira, chieina kakhanangbingli ringkhangasak tui hāng khavai ina theira. Ngathor kachida ana ili khuiung ngasakmi, sākhangatha̱ thāda nganā khavai iwui khanā khuiung ngasakmi. a a v4 Hi Isaiahwui rao laa kathum kanāna — Jishuna khamayona Anaomayara thāda hānga, ana ngathor kachida awui Avāwui eina tamkhui. Jishu chotchāngwui maram khalābingna krush apamli hi chi tākamhaira. 5Iwui Reikhamatai Avāna iwui khanā rak ngasakhaira, kala ina mangakaishimana; ina mangalanmana. 6Ina kashaobingli iwui khanuk mi, kala morhā serkhākbingli iwui maisor mi; maikashi kala machora̱ mashorrorwui eina ina imai mathumhaimana. 7Kha iwui Reikhamatai Avāna ili ngachona; chiwui vang eina ina mapa̱ngapāmana; chiwui vang eina ina imai lungghai thāda haihaira, kala ili maishi mangasakmara da ina thei. 8Ili khamashunga ngasakpa nganailakhaira. Ili ngayātki kaji khipa leikhala? Ithum ngaraichāda nganingsa. Iwui yangkashe khipākhala? Ana iwuili rānganairanu. 9Yanglu, iwui Reikhamatai Avāna ili ngachona; khipāna ili khayon mira? Yanglu, athum saikora kachon thāda chamserhaora; makungna athumli shaiserhaora.
10Nathumwui alungli ithumwui Avāli khangachee kala awui raowui khon khamayona, khipā leikhala? Tangkhamangli kazata kala kahor makhaleia china awui ming eina shitsangda awui Avāli katommiranu. 11Yanglu, mei kasā nathum saikora, meirā kakhuibing: nathumwui meiwui kahorli, kala nathumna kashā meirābing alungli zatlu! Hi nathumna iwui pāng eina samphangra: nathum kachotkachāngli ngayaira.
