Ngakarthuilu, Iwui Leikashiva̱, kala Thuivālu
Sha̱naona hānga, awui kakhon, laasāshim, kala awui pheipangna aluili kachuk chi phaninghaoda. Chiwui thili sholungwui eina awui khangakao chi ngayaoluiya: kazing kānhaira, theirongbing hāthaohaira, rāda zatlu. Leikashi ningyāng maungranglakha makharakmialu da Jerusalemwui naongalāva̱bingli khani ngashitmi.
2 1I hi Sharonwui awona, tampākbingwui timrāwona. 2Lenghuibing ngachaili timrāwon thāda, iwui leikashiva̱ ngalānaobing ngachaili chithāda leiya. 3Ngahongwui thingrongbing ngachaili theithuktheirong thāda, iwui leikashia yaronnaobing ngachaili chithāda leiya. Khamathān kahai eina ina awui khaya̱li pama, kala awui athei imazapkhayangli shima. 4Ana ili zātkhāng shimli khuirai, kala awui philān iwuitungli leikashina. 5Drakhāthei eina ili yangmilu, theithukthei eina ili ringphā ngasakmilu, kaja I leishināhaira. 6Awui uipang ikuizingli lei, kala awui yāpāngna ili vamsi. 7O Jerusalemwui naongalāva̱bing, ina nathumli kahāngna, ramwui chaonaowui kala seichui mingsinda: leikashi makharākalu, ningyāng maungranglakha, khamathotla mamathotalu.
8Iwui leikashiwui akhonna! Ana rā, kaphungbing tungli ngalongkāda, phungrābing tungli chakta. 9Iwui leikashia seichui, chaovānao kathāna. Yanglu, ana iniwui phākho khanukli nganinga, charfa eina yangtitta, charfanao eina yangshoka. 10Iwui leikashina ili hānga: Ngakarthuilu, iwui leikashiva̱, iwui khamathāva̱, kala thuihaolu, 11kaja sikachāng kānthuihaira; zingrot kupta latunghaira. 12Awonbing okathuili shokhaira, laasakwui atam rauwa, kala nāsha̱wui akhon iniwui ngaleili nganāhaira. 13Khaorārongna awui khaorāthei mingasaka, kala drakhārong awon wonhaira; athumwui anganam kha̱shoka. Ngakarthuilu, iwui leikashiva̱, iwui khamathāva̱, kala thuihaolu. 14Iwui nāsha̱, lunghārwui amaitarenli, lungkaiwui ngayinpamli, namai ili theingasaklu, nakhon ili shāngasaklu, kaja nakhon shima, kala namai leishirihai. 15Drakhā yāmgui sāshimāna ramfanaobing, ramfabing chi ithumwui vang tukkhuilu, kaja iniwui drakhā yāmguili awon wonhaira. 16Iwui leikashia iwuina, kala I awuina; a timrāwon pamli hompama. 17Kazing mayingranglakha, khaya̱ makānthuiranglakha, iwui leikashe, ngalanlu, kala kaphung kajuibingtungli seichui thāda, chaovānao thāda sālu.
