Ha Po sio la thiyi
Haggai mu Zecharia-e züpra die, Zerubabel mu Jeshua sio sütha yita. Jüde kekhi Angh Tattenai sopü neko ce hio thiyi küve node die tso, vele ha Po mhü-o Israelmi mehiko ce pe bata, süla mipüri uko chokha mota. Tattenai Darius ce thova, kede lesi thaka za ta sala thite die ri tso.
5 1Süsa saju kepo Haggai mu Iddo nu Zecharia ni, Judah mu Jerusalem lü kebao Jews mikoce, ha Po, Israel Jihova za lü, uko mhü lü saju pota. 2Süsa Shealtiel nu Zerubabel mu Jozadak nu Jeshua sütha yita die, Jerusalem lü ha Po sio la thiyi swüdü; ha Po saju kepoko uko püzü die, uko thomelu bata.
3Süsa jüde kekhi Angh Tattenai, Shethar-bozenai, mu uko kekhrühiko vori die ketso, Sopü neko ce hio sio thiyi mu hio cetho thitsüyi küve node? zita. 4Uko sheri ketso die, Hio cetho thi kebako thümako za sopü ta? zita. 5Vele u Po mhü-o Jews mehiko ce pe bata, süla mha hio Darius ce vori die, lesilü thopü püfü-o la ta sala kümothe, mipüri uko chokha mota.
Darius kedeo ce lesi
6Jüde kekhi Angh Tattenai mu Shethar-bozenai, uko jüde kekhi kemeleko püzü die, Darius kedeo ce süpü lesi thaka hihi: 7Uko püce theju süpü, hibide thosü: Darius kedeo ce, keku vezhochü bayite.
8Kedeo, se hite: hani Judah State lü, Jihova kezho sio-o lü vo. Süo ketsü kezhoko mu sa zho lü süpü süh-o lü thi keta. Mhatho hio khameve thi keta die, uko be lü pühthiyi. 9Süla hani mehiko ce ketso, Sopü neko ce hio sio thiyi mu hio cetho thitsüyi küve node? zita. 10Hani uko za sheri ketso, no ce se süyi ketola, mu kezhoko za thopü ketola. 11Uko hani fü kela, Hani tüyo mu cejü Jihova, ha Po rapeco kemi zo; mu Israel kedeo kezho-o thajü tütse kropü lü thisü mu thitsü sio-o, hani la thi keta. 12Vele ha upotsa tüyo Jihova, ha Po püngo süta kekrelamori, pü uko Babylon kedeo Nebuchadnezzar, Babylon mi be lü khata; süo sio hio meka va die, thüma Babylon lü vota süta. 13Vele Babylon kedeo Cyrus theratho tütse lü, Cyrus kedeo-o ha Po sio hio la thiyi küto lie kha metasü. 14Nebuchadnezzar Jerusalem kereshücelü yi die Babylon kereshüce lü khipü ta, ha Po sio suna mu rüka mhabüko, Cyrus kedeo-o sheri Babylon kereshücelü yi la vori die, pü Angh thi kütao Sheshbazzar za kemipü be lü khata, 15püce poti die, Mhabü hiko tatate, vo die Jerusalem kereshüce lü sü hite, mu Jihova sio-o püthethi lü la thi hite, zita. 16Süsa Sheshbazzar hio vori die, Jerusalem lü ha Po sio bodü sü; süce lüno küba kümothe thi keta zori, thitso mo zo, zita.
17Süla, kedeo nü lize, Babylon lü kede lesithopü kemetalü phu hite, Cyrus kedeo-o Jerusalem lü Jihova sio hio la thiyi küto lie kha metasü me, pe küto la. Süsa kedeo-o mha hio na pü tarho hani ce süte.
