ਜ਼ਬੂਰ 86

86 ¹ਹੇ ਮੇਰੇ ਪਿਤਾ, ਝੁਕ ਕੇ ਮੇਰੀ ਸੁਣੋ; ਮੈਨੂੰ ਉੱਤਰ ਦਿਓ, ਕਿਉਂ ਜੋ ਮੈਂ ਗਰੀਬ ਅਤੇ ਲੋੜਵੰਦ ਹਾਂ।

²ਮੇਰੀ ਜਾਨ ਦੀ ਰਾਖੀ ਕਰੋ, ਕਿਉਂ ਜੋ ਮੈਂ ਤੁਹਾਡਾ ਭਗਤ ਹਾਂ; ਆਪਣੇ ਦਾਸ ਨੂੰ ਬਚਾਓ ਜੋ ਤੁਹਾਡੇ ਉੱਤੇ ਭਰੋਸਾ ਰੱਖਦਾ ਹੈ—ਤੁਸੀਂ ਮੇਰੇ ਪਿਤਾ ਹੋ। ³ਹੇ ਮੇਰੇ ਪ੍ਰਭੂ ਪਿਤਾ, ਮੇਰੇ ਉੱਤੇ ਦਯਾ ਕਰੋ, ਕਿਉਂ ਜੋ ਮੈਂ ਸਾਰਾ ਦਿਨ ਤੁਹਾਨੂੰ ਪੁਕਾਰਦਾ ਹਾਂ। ⁴ਆਪਣੇ ਦਾਸ ਦੀ ਜਾਨ ਨੂੰ ਅਨੰਦ ਦਿਓ, ਕਿਉਂ ਜੋ ਹੇ ਮੇਰੇ ਪ੍ਰਭੂ ਪਿਤਾ, ਮੈਂ ਆਪਣੀ ਜਾਨ ਤੁਹਾਡੇ ਵੱਲ ਉੱਚੀ ਕਰਦਾ ਹਾਂ।

⁵ਕਿਉਂ ਜੋ ਹੇ ਮੇਰੇ ਪ੍ਰਭੂ ਪਿਤਾ, ਤੁਸੀਂ ਭਲੇ ਅਤੇ ਮਾਫ਼ ਕਰਨ ਵਾਲੇ ਹੋ, ਅਤੇ ਉਨ੍ਹਾਂ ਸਭਨਾਂ ਲਈ ਜੋ ਤੁਹਾਨੂੰ ਪੁਕਾਰਦੇ ਹਨ ਨੇਮ ਦੇ ਪ੍ਰੇਮ ਵਿੱਚ ਭਰਪੂਰ ਹੋ। ⁶ਹੇ ਮੇਰੇ ਪਿਤਾ, ਮੇਰੀ ਪ੍ਰਾਰਥਨਾ ਸੁਣੋ; ਮੇਰੀਆਂ ਦਯਾ ਲਈ ਬੇਨਤੀਆਂ ਵੱਲ ਧਿਆਨ ਦਿਓ। ⁷ਜਦੋਂ ਮੈਂ ਬਿਪਤਾ ਵਿੱਚ ਹੁੰਦਾ ਹਾਂ, ਮੈਂ ਤੁਹਾਨੂੰ ਪੁਕਾਰਦਾ ਹਾਂ, ਅਤੇ ਤੁਸੀਂ ਮੈਨੂੰ ਉੱਤਰ ਦਿੰਦੇ ਹੋ।

⁸ਦੇਵਤਿਆਂ ਵਿੱਚ ਤੁਹਾਡੇ ਵਰਗਾ ਕੋਈ ਨਹੀਂ, ਹੇ ਮੇਰੇ ਪ੍ਰਭੂ ਪਿਤਾ, ਅਤੇ ਤੁਹਾਡੇ ਕੰਮਾਂ ਵਰਗੇ ਕੋਈ ਕੰਮ ਨਹੀਂ। ⁹ਸਾਰੀਆਂ ਕੌਮਾਂ ਜਿਨ੍ਹਾਂ ਨੂੰ ਤੁਸੀਂ ਬਣਾਇਆ ਹੈ ਆਉਣਗੀਆਂ ਅਤੇ ਹੇ ਮੇਰੇ ਪ੍ਰਭੂ ਪਿਤਾ, ਤੁਹਾਡੇ ਅੱਗੇ ਮੱਥਾ ਟੇਕਣਗੀਆਂ, ਅਤੇ ਤੁਹਾਡੇ ਨਾਮ ਦੀ ਵਡਿਆਈ ਕਰਨਗੀਆਂ। ¹⁰ਕਿਉਂ ਜੋ ਤੁਸੀਂ ਮਹਾਨ ਹੋ ਅਤੇ ਅਚਰਜ ਕੰਮ ਕਰਦੇ ਹੋ; ਕੇਵਲ ਤੁਸੀਂ ਹੀ ਮੇਰੇ ਪਿਤਾ ਹੋ।

¹¹ਹੇ ਮੇਰੇ ਪਿਤਾ, ਮੈਨੂੰ ਆਪਣਾ ਰਾਹ ਸਿਖਾਓ, ਤਾਂ ਜੋ ਮੈਂ ਤੁਹਾਡੀ ਸਚਿਆਈ ਵਿੱਚ ਚੱਲਾਂ; ਮੈਨੂੰ ਇੱਕ ਅਟੁੱਟ ਦਿਲ ਦਿਓ ਤਾਂ ਜੋ ਮੈਂ ਤੁਹਾਡੇ ਨਾਮ ਦਾ ਭੈ ਮੰਨਾਂ। ¹²ਹੇ ਮੇਰੇ ਪ੍ਰਭੂ ਪਿਤਾ, ਮੈਂ ਆਪਣੇ ਸਾਰੇ ਦਿਲ ਨਾਲ ਤੁਹਾਡੀ ਉਸਤਤ ਕਰਾਂਗਾ, ਅਤੇ ਸਦਾ ਲਈ ਤੁਹਾਡੇ ਨਾਮ ਦੀ ਵਡਿਆਈ ਕਰਾਂਗਾ। ¹³ਕਿਉਂ ਜੋ ਮੇਰੇ ਵੱਲ ਤੁਹਾਡਾ ਨੇਮ ਦਾ ਪ੍ਰੇਮ ਮਹਾਨ ਹੈ; ਤੁਸੀਂ ਮੇਰੀ ਜਾਨ ਨੂੰ ਪਤਾਲ ਦੀਆਂ ਗਹਿਰਾਈਆਂ ਤੋਂ ਛੁਡਾਇਆ ਹੈ। ^a a v13 ਸ਼ਿਓਲ ਮੁਰਦਿਆਂ ਦੇ ਲੋਕ ਦਾ ਇਬਰਾਨੀ ਨਾਮ ਹੈ, ਜਿਸ ਨੂੰ ਕਲਪਨਾ ਵਿੱਚ ਸਭ ਤੋਂ ਗਹਿਰਾ ਸਥਾਨ ਦਰਸਾਇਆ ਗਿਆ ਹੈ।

¹⁴ਹੇ ਮੇਰੇ ਪਿਤਾ, ਹੰਕਾਰੀ ਲੋਕ ਮੇਰੇ ਵਿਰੁੱਧ ਉੱਠ ਖੜੇ ਹੋਏ ਹਨ; ਜ਼ਾਲਮਾਂ ਦਾ ਇੱਕ ਟੋਲਾ ਮੇਰੀ ਜਾਨ ਦੇ ਪਿੱਛੇ ਪਿਆ ਹੈ, ਅਤੇ ਉਹ ਤੁਹਾਡੀ ਕੋਈ ਪਰਵਾਹ ਨਹੀਂ ਕਰਦੇ। ¹⁵ਪਰ ਹੇ ਮੇਰੇ ਪ੍ਰਭੂ ਪਿਤਾ, ਤੁਸੀਂ ਇੱਕ ਤਰਸਵਾਨ ਅਤੇ ਦਯਾਲੂ ਪਿਤਾ ਹੋ, ਕ੍ਰੋਧ ਵਿੱਚ ਧੀਮੇ ਅਤੇ ਨੇਮ ਦੇ ਪ੍ਰੇਮ ਅਤੇ ਵਫ਼ਾਦਾਰੀ ਵਿੱਚ ਭਰਪੂਰ। ¹⁶ਮੇਰੇ ਵੱਲ ਮੁੜੋ ਅਤੇ ਮੇਰੇ ਉੱਤੇ ਦਯਾ ਕਰੋ; ਆਪਣੇ ਦਾਸ ਨੂੰ ਆਪਣੀ ਸ਼ਕਤੀ ਬਖ਼ਸ਼ੋ, ਅਤੇ ਆਪਣੀ ਦਾਸੀ ਦੇ ਪੁੱਤਰ ਨੂੰ ਬਚਾਓ। ¹⁷ਮੈਨੂੰ ਆਪਣੀ ਕਿਰਪਾ ਦਾ ਕੋਈ ਨਿਸ਼ਾਨ ਵਿਖਾਓ, ਤਾਂ ਜੋ ਮੇਰੇ ਨਾਲ ਵੈਰ ਰੱਖਣ ਵਾਲੇ ਵੇਖਣ ਅਤੇ ਸ਼ਰਮਿੰਦੇ ਹੋਣ, ਕਿਉਂ ਜੋ ਹੇ ਮੇਰੇ ਪਿਤਾ, ਤੁਸੀਂ ਮੇਰੀ ਸਹਾਇਤਾ ਕੀਤੀ ਅਤੇ ਮੈਨੂੰ ਦਿਲਾਸਾ ਦਿੱਤਾ ਹੈ।