ਜ਼ਬੂਰ 96

96 ¹ਸਾਡੇ ਪਿਤਾ ਲਈ ਇੱਕ ਨਵਾਂ ਗੀਤ ਗਾਓ; ਹੇ ਸਾਰੀ ਧਰਤੀ, ਸਾਡੇ ਪਿਤਾ ਲਈ ਗਾਓ।

²ਸਾਡੇ ਪਿਤਾ ਲਈ ਗਾਓ, ਉਸ ਦੇ ਨਾਮ ਨੂੰ ਧੰਨ ਆਖੋ; ਦਿਨੋ-ਦਿਨ ਉਸ ਦੀ ਮੁਕਤੀ ਦਾ ਪਰਚਾਰ ਕਰੋ। ³ਕੌਮਾਂ ਵਿੱਚ ਉਸ ਦੇ ਪਰਤਾਪੀ ਕੰਮਾਂ ਦਾ ਵਰਣਨ ਕਰੋ, ਸਾਰੀਆਂ ਉੱਮਤਾਂ ਵਿੱਚ ਉਸ ਦੇ ਅਚਰਜ ਕੰਮਾਂ ਦਾ। ⁴ਕਿਉਂ ਜੋ ਸਾਡਾ ਪਿਤਾ ਮਹਾਨ ਹੈ ਅਤੇ ਅੱਤ ਉਸਤਤ ਦੇ ਯੋਗ ਹੈ; ਸਾਰੇ ਦੇਵਤਿਆਂ ਨਾਲੋਂ ਉਸ ਦਾ ਭੈ ਮੰਨਣਾ ਚਾਹੀਦਾ ਹੈ। ⁵ਕਿਉਂ ਜੋ ਉੱਮਤਾਂ ਦੇ ਸਾਰੇ ਦੇਵਤੇ ਮੂਰਤਾਂ ਹਨ, ਪਰ ਸਾਡੇ ਪਿਤਾ ਨੇ ਅਕਾਸ਼ ਬਣਾਏ। ⁶ਤੇਜ ਅਤੇ ਮਹਿਮਾ ਉਸ ਦੇ ਸਨਮੁਖ ਹਨ; ਸਮਰੱਥਾ ਅਤੇ ਸੁੰਦਰਤਾ ਉਸ ਦੇ ਪਵਿੱਤਰ ਅਸਥਾਨ ਵਿੱਚ ਹਨ।

⁷ਸਾਡੇ ਪਿਤਾ ਦਾ ਆਦਰ ਕਰੋ, ਹੇ ਉੱਮਤਾਂ ਦੇ ਸਾਰੇ ਘਰਾਣਿਓ, ਸਾਡੇ ਪਿਤਾ ਦੀ ਮਹਿਮਾ ਅਤੇ ਸਮਰੱਥਾ ਮੰਨੋ। ⁸ਸਾਡੇ ਪਿਤਾ ਦੇ ਨਾਮ ਦੇ ਯੋਗ ਮਹਿਮਾ ਉਸ ਨੂੰ ਦਿਓ; ਭੇਟ ਲੈ ਕੇ ਆਓ, ਅਤੇ ਉਸ ਦੇ ਵਿਹੜਿਆਂ ਵਿੱਚ ਆਓ। ⁹ਪਵਿੱਤਰਤਾਈ ਦੇ ਤੇਜ ਵਿੱਚ ਸਾਡੇ ਪਿਤਾ ਨੂੰ ਮੱਥਾ ਟੇਕੋ; ਹੇ ਸਾਰੀ ਧਰਤੀ, ਉਸ ਦੇ ਸਨਮੁਖ ਕੰਬੋ। ¹⁰ਕੌਮਾਂ ਵਿੱਚ ਆਖੋ, “ਸਾਡਾ ਪਿਤਾ ਰਾਜ ਕਰਦਾ ਹੈ! ਜਗਤ ਪੱਕਾ ਸਥਾਪਿਤ ਹੈ; ਇਹ ਕਦੇ ਨਾ ਹਿੱਲੇਗਾ। ਉਹ ਉੱਮਤਾਂ ਦਾ ਨਿਆਂ ਨਿਆਈਂ ਨਾਲ ਕਰੇਗਾ।”

¹¹ਅਕਾਸ਼ ਅਨੰਦ ਕਰੇ, ਅਤੇ ਧਰਤੀ ਖੁਸ਼ ਹੋਵੇ; ਸਮੁੰਦਰ ਅਤੇ ਜੋ ਕੁਝ ਉਸ ਵਿੱਚ ਹੈ, ਗਰਜੇ। ¹²ਖੇਤ ਬਾਗ-ਬਾਗ ਹੋਵੇ, ਅਤੇ ਜੋ ਕੁਝ ਉਸ ਵਿੱਚ ਹੈ; ਤਦ ਬਣ ਦੇ ਸਾਰੇ ਰੁੱਖ ਖੁਸ਼ੀ ਨਾਲ ਗਾਉਣਗੇ। ¹³ਸਾਡੇ ਪਿਤਾ ਦੇ ਸਨਮੁਖ, ਕਿਉਂ ਜੋ ਉਹ ਆਉਂਦਾ ਹੈ, ਕਿਉਂ ਜੋ ਉਹ ਧਰਤੀ ਦਾ ਨਿਆਂ ਕਰਨ ਲਈ ਆਉਂਦਾ ਹੈ। ਉਹ ਜਗਤ ਦਾ ਨਿਆਂ ਧਾਰਮਿਕਤਾ ਨਾਲ ਕਰੇਗਾ, ਅਤੇ ਉੱਮਤਾਂ ਦਾ ਆਪਣੀ ਵਫ਼ਾਦਾਰੀ ਨਾਲ।