Psalms 103

103 ¹Bless our Papa, my soul; and everything wey dey inside me, bless im holy name!

²Bless our Papa, my soul, and no forget any of im kindness— ³wey dey forgive all your sin, wey dey heal all your sickness, ⁴wey dey buy your life comot from grave, wey dey put crown for your head with Covenant love and tender mercy wey dey pain belle, ⁵wey dey satisfy you with good things as long as you dey live, so that your young age dey fresh again like eagle own.

⁶Our Papa dey do correct-and-holy way and justice for all people wey dem dey oppress.

⁷E make Moses know im ways, e make di people of Israel know im deeds. ⁸Our Papa na person wey get tender mercy wey dey pain belle and grace, e no dey quick vex and im Covenant love plenty well well. ⁹E no go dey always accuse, and e no go hold im vex forever. ¹⁰E no dey treat us according to our sin, and e no dey pay us back according to our bad-bad deeds. ¹¹For as heaven high reach far pass ground, na so im Covenant love big for those wey dey fear am; ¹²as east far from west, na so e don comot our sin far from us.

¹³As papa im heart dey go out to im pikin dem, na so our Papa im heart dey go out to those wey dey fear am. ¹⁴Because e know how dem take form us; e remember say we na dust. ¹⁵Person days be like grass; e dey flourish like wild flower for field; ¹⁶because wind blow pass am, and e don go, and im place no dey remember am again. ¹⁷But di Covenant love of our Papa dey from everlasting to everlasting for those wey dey fear am, and im correct-and-holy way to pikin pikin, ¹⁸to those wey dey keep im Covenant and remember to do im commandments.

¹⁹Our Papa don set im throne for heaven, and im kingdom dey rule over everything.

²⁰Bless our Papa, una wey be im angels, una mighty ones wey dey do im word, wey dey obey im every word! ²¹Bless our Papa, all im armies, im servants wey dey do wetin e want! ²²Bless our Papa, all im works, everywhere for im kingdom. Bless our Papa, my soul!