Psalms 66

66 ¹Make una shout for joy give our Papa, all di earth! ²Sing di glory of im name; make im praise dey shine. ³Tell our Papa say, “How your work dey make person fear! By your mighty power your enemies dey shake for your front. ⁴All di earth dey worship you, dem dey sing praise give you; dem dey sing praise give your name.” Selah

⁵Make una come see di works of our Papa, im deeds dey make person fear as e dey do for all people. ⁶E turn di sea into dry land; dem waka pass di river for dia leg. Na dia we rejoice for inside am. ⁷E dey rule with im power forever; im eyes dey watch di nations— make dem wey dey rebel no lift dem sef up. Selah

⁸Make una bless our Papa, all una people; make di sound of im praise dey hear, ⁹na im keep our life, e no gree make our leg slip. ¹⁰Because you, our Papa, don test us; you don refine us as dem dey refine silver. ¹¹You bring us enter di net; you put heavy load wey dey crush us for our back. ¹²You allow men ride pass our head; we pass through fire and through water, but you don bring us comot go place wey plenty things dey. ^a a v12 “Ride pass our head” na old-old expression for when dem conquer and rule person completely.

¹³I go come enter your house with burnt offerings; I go pay my vows give you, ¹⁴di vows wey my lips talk and my mouth promise wen I dey inside trouble. ¹⁵I go offer you burnt offerings of fat animals, with di smoke of rams wey dem sacrifice; I go offer bulls and goats. Selah

¹⁶Make una come hear, all una wey dey fear our Papa, and I go tell wetin e don do for my soul. ¹⁷I cry out give am with my mouth, and high praise dey for my tongue. ¹⁸If I bin dey keep bad thing for my heart, di Sovereign Papa for no listen. ¹⁹But true-true our Papa don listen; e don hear my prayer. ²⁰Make praise dey for our Papa, wey no reject my prayer or take im Covenant love comot from me!