1 Mambo ya Nyakati 12

12 ¹Hawa ndio watu waliomjia Daudi huko Siklagi alipokuwa bado amefukuzwa mbele ya Sauli mwana wa Kishi—mashujaa hodari waliomsaidia vitani. ²Wenye silaha za pinde, walioweza kutupa mawe kwa kombeo au kupiga mishale kwa mkono wa kuume au wa kushoto—Wabenyamini, jamaa zake Sauli. ³Ahiezeri mkuu, kisha Yoashi, wana wa Shemaa wa Gibea; Yezieli na Peleti, wana wa Azmawethi; Beraka; Yehu wa Anathothi; ⁴Ishmaya wa Gibeoni, shujaa hodari miongoni mwa wale thelathini, jemadari juu ya wale thelathini; Yeremia, Yahazieli, Yohanani, Yozabadi wa Gedera; ⁵Eluzai, Yerimothi, Bealia, Shemaria, na Shefatia Mharufi; ⁶Elkana, Ishia, Azareli, Yoezeri, na Yashobeamu, Wakora; ⁷na Yoela na Zebadia, wana wa Yerohamu wa Gedori.

⁸Baadhi ya Wagadi wakamwendea Daudi katika ngome ya jangwani—mashujaa hodari waliozoezwa vita, hodari kwa ngao na mkuki, nyuso zao kama nyuso za simba, na wepesi kama paa milimani. ⁹Ezeri alikuwa mkuu, Obadia wa pili, Eliabu wa tatu, ¹⁰Mishmana wa nne, Yeremia wa tano, ¹¹Atai wa sita, Elieli wa saba, ¹²Yohanani wa nane, Elzabadi wa tisa, ¹³Yeremia wa kumi, Makbanai wa kumi na moja. ¹⁴Wagadi hawa walikuwa majemadari wa jeshi; aliye mdogo kabisa aliweza kupambana na watu 100, na aliye mkuu kabisa watu 1,000. ¹⁵Hawa ndio watu waliovuka Yordani mwezi wa kwanza, ilipofurika kingo zake zote, wakawafukuza wote waliokuwa mabondeni, upande wa mashariki na wa magharibi.

¹⁶Baadhi ya watu wa Benyamini na Yuda pia wakamjia Daudi katika ngome. ¹⁷Daudi akatoka kuwalaki, akawaambia, "Kama mmenijia kwa amani ili kunisaidia, moyo wangu utaungana nanyi; lakini kama mmekuja kunisaliti kwa adui zangu, ijapokuwa mikono yangu haina dhuluma, Mungu wa baba zetu aone na kuwahukumu." ¹⁸Ndipo Roho wa Baba yetu akamvaa Amasai, mkuu wa wale thelathini, aliyesema: "Sisi tu wako, Daudi! Tu pamoja nawe, mwana wa Yese! Amani, amani iwe kwako, na amani iwe kwa wasaidizi wako, kwa maana Baba yako anakusaidia." Daudi akawapokea, akawafanya viongozi wa vikosi vyake vya mashambulizi.

¹⁹Baadhi kutoka Manase wakamwendea Daudi alipoenda pamoja na Wafilisti kupigana na Sauli. Lakini Daudi na watu wake hawakuwasaidia Wafilisti—baada ya kushauriana, watawala wa Wafilisti wakamwondoa Daudi, wakisema, "Ataenda kwa bwana wake Sauli, jambo litakalotugharimu vichwa vyetu." ²⁰Alipokuwa akienda Siklagi, hawa kutoka Manase wakamwendea: Adna, Yozabadi, Yediaeli, Mikaeli, Yozabadi, Elihu, Silethai—majemadari wa maelfu ya Manase. ²¹Wakamsaidia Daudi dhidi ya wale wavamizi, kwa maana wote walikuwa mashujaa hodari, nao wakawa majemadari katika jeshi lake. ²²Siku baada ya siku watu walikuja kumsaidia Daudi, hata akawa na jeshi kubwa kama jeshi la Baba yetu.

²³Hii ndiyo hesabu ya watu wenye silaha za vita waliomjia Daudi huko Hebroni ili kumkabidhi ufalme wa Sauli, kama vile Baba yetu alivyokuwa amesema, ²⁴kutoka Yuda, wachukua ngao na mkuki—6,800 wenye silaha za vita; ²⁵kutoka Simeoni, mashujaa hodari waliokuwa tayari kwa vita—7,100; ²⁶kutoka Lawi—4,600, ²⁷pamoja na Yehoyada, kiongozi wa jamaa ya Aroni, na 3,700 pamoja naye, ²⁸na Sadoki, kijana shujaa hodari, pamoja na maakida ishirini na wawili kutoka jamaa yake mwenyewe. ²⁹Kutoka Benyamini, jamaa zake Sauli—3,000; wengi wao walikuwa bado wameshika ulinzi kwa ajili ya nyumba ya Sauli, ³⁰kutoka Efraimu—20,800, mashujaa hodari, watu mashuhuri katika jamaa zao; ³¹kutoka nusu ya kabila la Manase—18,000, walioteuliwa kwa majina ili kuja kumfanya Daudi mfalme; ³²kutoka Isakari: wakuu 200 walioyafahamu majira, wakajua Israeli inapaswa kufanya nini, pamoja na jamaa zao wote chini ya amri yao. ³³Kutoka Zabuloni: askari 50,000 wenye uzoefu, waliokuwa na silaha zote za vita, tayari kumsaidia Daudi kwa moyo wote, ³⁴kutoka Naftali—maakida 1,000, na pamoja nao watu 37,000 wachukua ngao na mkuki; ³⁵kutoka Dani—28,600 watu waliokuwa tayari kwa vita; ³⁶kutoka Asheri—40,000 askari wenye uzoefu waliokuwa tayari kwa vita; ³⁷kutoka mashariki ya Yordani—Reubeni, Gadi, nusu ya kabila la Manase—120,000, wenye silaha zote za vita.

³⁸Wote hawa walikuwa askari wa vita waliopangwa tayari kwa vita, waliokuja Hebroni kwa moyo wote ili kumfanya Daudi mfalme juu ya Israeli yote; na Israeli wengine wote pia walikuwa na nia moja ya kumfanya Daudi mfalme. ³⁹Wakakaa huko siku tatu pamoja na Daudi, wakila na kunywa; kwa maana jamaa zao walikuwa wamewaandalia chakula. ⁴⁰Tena majirani zao mpaka Isakari, Zabuloni, na Naftali walileta chakula kwa punda, ngamia, nyumbu, na maksai—unga, maandazi ya tini, maandazi ya zabibu, divai, mafuta, ng'ombe, na kondoo tele, kwa maana kulikuwa na furaha katika Israeli.