2 Mambo ya Nyakati 18

18 ¹Basi Yehoshafati alikuwa na mali nyingi na heshima kubwa, naye akaungana na Ahabu kwa ndoa. ²Baada ya miaka kadhaa akashuka kwa Ahabu huko Samaria, ambako Ahabu akamchinjia kondoo na ng'ombe wengi yeye na watu waliokuwa pamoja naye, akimshawishi ashambulie Ramoth-gileadi. ³Ahabu mfalme wa Israeli akamwuliza Yehoshafati mfalme wa Yuda, "Je, utakwenda pamoja nami hadi Ramoth-gileadi?" Akajibu, "Mimi ni kama wewe, na watu wangu ni kama watu wako; tutaungana nawe katika vita."

⁴Lakini Yehoshafati akamwambia mfalme wa Israeli, "Kwanza tafuta neno la Baba yetu."

⁵Basi mfalme wa Israeli akawakusanya manabii, watu 400, akawauliza, "Je, tuende Ramoth-gileadi kupigana, au tujizuie?" Wakasema, "Panda, kwa maana Mungu atautia mkononi mwa mfalme."

⁶Lakini Yehoshafati akasema, "Je, hakuna hapa tena nabii wa Baba yetu ambaye tunaweza kumuuliza?"

⁷Mfalme wa Israeli akamwambia Yehoshafati, "Yupo mtu mmoja ambaye kupitia yeye tunaweza kumuuliza Baba yetu, lakini mimi namchukia—hanitabirii jema kamwe, ila baya tu. Yeye ni Mikaya mwana wa Imla." Yehoshafati akajibu, "Mfalme asiseme hivyo."

⁸Ndipo mfalme wa Israeli akamwita afisa mmoja akasema, "Mlete Mikaya mwana wa Imla kwa haraka."

⁹Mfalme wa Israeli na Yehoshafati mfalme wa Yuda waliketi kila mmoja katika kiti chake cha enzi, wamevaa mavazi yao, sakafuni pa kupuria nafaka penye ingilio la lango la Samaria, na manabii wote wakitabiri mbele yao. ¹⁰Sedekia mwana wa Kenaana akatengeneza pembe za chuma akasema, "Mungu asema: 'Kwa hizi utawachoma Waaramu hata wateketee.'"

¹¹Manabii wote wakatabiri vivyo hivyo, wakisema: "Panda Ramoth-gileadi ushinde; Baba yetu atautia mkononi mwa mfalme."

¹²Yule mjumbe aliyekwenda kumwita Mikaya akamwambia, "Maneno ya manabii yote yanampendelea mfalme. Neno lako na liwe sawa na lao—nena jema."

¹³Lakini Mikaya akasema, "Kama Baba yetu aishivyo, nitanena tu lile Baba yangu asemalo."

¹⁴Alipokuja, mfalme akamwuliza, "Mikaya, je, tuende vitani Ramoth-gileadi, au nijizuie?" Akasema, "Panda ushinde; watatiwa mikononi mwenu."

¹⁵Lakini mfalme akamwambia, "Mara ngapi nikuapishe usiniambie ila kweli tu kwa jina la Baba yetu?"

¹⁶Mikaya akasema, "Nimeona Israeli wote wametawanyika milimani, kama kondoo wasio na mchungaji. Na Baba yetu akasema, 'Hawa hawana bwana; kila mmoja na arudi nyumbani kwake kwa amani.'"

¹⁷Mfalme wa Israeli akamwambia Yehoshafati, "Je, sikukuambia kwamba hatanitabiria jema, ila baya tu?"

¹⁸Mikaya akasema, "Basi sikieni neno la Baba yetu: Nimemwona Baba yetu ameketi katika kiti chake cha enzi, na majeshi yote ya mbinguni wamesimama upande wake wa kuume na wa kushoto.

¹⁹Na Baba yetu akasema, 'Ni nani atakayemshawishi Ahabu mfalme wa Israeli apande akaanguke huko Ramoth-gileadi?' Mmoja akasema hivi, mwingine hivi.

²⁰Kisha roho akatokea, akasimama mbele ya Baba yetu, akasema, 'Mimi nitamshawishi.' Na Baba yetu akamwuliza, 'Kwa njia gani?'

²¹Akasema, 'Nitakwenda niwe roho ya uongo katika vinywa vya manabii wake wote.' Ndipo Baba yetu akasema, 'Utamshawishi na pia utafanikiwa. Nenda ukafanye hivyo.'

²²Basi sasa, Baba yetu ametia roho ya uongo katika vinywa vya hawa manabii wako, na Baba yetu ametamka maafa juu yako."

²³Ndipo Sedekia mwana wa Kenaana akakaribia, akampiga Mikaya shavuni, akasema, "Je, Roho wa Mungu alipita njia gani kutoka kwangu ili aseme nawe?"

²⁴Mikaya akasema, "Utaliona siku ile utakapoingia chumba cha ndani kujificha."

²⁵Mfalme wa Israeli akasema, "Mrudisheni Mikaya kwa Amoni mkuu wa mji na kwa Yoashi mwana wa mfalme, ²⁶mkaseme, 'Mfalme asema: Mtieni mtu huyu gerezani na kumpa mgao kidogo wa mkate na maji hata nitakaporudi salama.'"

²⁷Mikaya akasema, "Kama utarudi salama, basi Baba yetu hakunena kwa kinywa changu." Kisha akasema, "Sikilizeni, enyi watu wote!"

Ahabu Aanguka Kama Baba Alivyotabiri

²⁸Basi mfalme wa Israeli na Yehoshafati mfalme wa Yuda wakapanda hadi Ramoth-gileadi. ²⁹Mfalme wa Israeli akamwambia Yehoshafati, "Nitajigeuza sura niingie vitani, lakini wewe vaa mavazi yako." Basi mfalme wa Israeli akajigeuza sura, wakaingia vitani. ³⁰Mfalme wa Aramu alikuwa amewaamuru majemadari wa magari yake, "Msipigane na mtu ye yote, mdogo au mkubwa, ila mfalme wa Israeli peke yake."

³¹Majemadari wa magari walipomwona Yehoshafati, wakasema, "Huyo ndiye mfalme wa Israeli," wakageuka kupigana naye. Lakini Yehoshafati akapiga kelele, na Baba yetu akamsaidia, akawaondoa mbali naye. ³²Majemadari wa magari walipoona kwamba si mfalme wa Israeli, wakaacha kumfuatia. ³³Mtu mmoja akavuta upinde wake bila kulenga akampiga mfalme wa Israeli kati ya viungo vya deraya yake. Akamwambia mwendesha gari lake, "Geuza uniondoe vitani; nimejeruhiwa." ³⁴Vita vikawa vikali siku ile. Mfalme wa Israeli akawekwa wima katika gari lake akiwaelekea Waaramu hata jioni, kisha akafa wakati wa machweo ya jua.