Ayubu 20

20 ¹Ndipo Sofari, Mnaamathi, akajibu: ²"Ndiyo sababu mawazo yangu yenye machafuko yananilazimu kujibu, kwa sababu ya msukosuko ulio ndani yangu. ³Nasikia karipio linalonivunjia heshima, na kutokana na ufahamu wangu roho hunichochea kujibu. ⁴Hakika wewe wajua jinsi ilivyokuwa tangu zamani za kale, tangu mwanadamu alipowekwa juu ya nchi: ⁵ushindi wa waovu ni wa muda mfupi, na furaha ya wasiomcha Mungu hudumu kitambo kimoja tu. ⁶Ijapokuwa kiburi chake hufika mbinguni, na kichwa chake hugusa mawingu, ⁷ataangamia milele, kama mavi yake mwenyewe; wale waliomwona watauliza, 'Yuko wapi?' ⁸Atatoweka kama ndoto, wala hatapatikana tena, akifukuzwa kama maono ya usiku. ⁹Jicho lililomwona halitamwona tena; wala mahali pake hapatamtazama tena. ¹⁰Watoto wake watawaomba maskini; na mikono yake mwenyewe itairudisha mali yake. ¹¹Nguvu za ujana zijazazo mifupa yake zitalala pamoja naye mavumbini. ¹²Ijapokuwa uovu ni mtamu kinywani mwake, naye huuficha chini ya ulimi wake, ¹³ijapokuwa hataki kuuachilia, bali huushika kinywani mwake, ¹⁴lakini chakula chake huchacha tumboni mwake; huwa sumu ya fira ndani yake. ¹⁵Amezimeza mali, lakini atazitapika; Mungu atazitoa tumboni mwake. ¹⁶Atanyonya sumu ya fira; ncha ya nyoka itamwua. ¹⁷Hatayaona kamwe vijito, mito itiririkayo asali na maziwa mgando. ¹⁸Ni lazima airudishe tunda la taabu yake bila kulimeza; hatafurahia faida ya biashara yake. ¹⁹Kwa maana aliwaonea na kuwaacha maskini; ameinyakua nyumba asiyoijenga. ²⁰Kwa sababu tumbo lake halikujua amani, hatapona pamoja na vitu alivyovitamani. ²¹Hakuna kilichosalia ambacho angekula; kwa hiyo ufanisi wake hautadumu. ²²Katika wingi wa utajiri wake, dhiki itamfikia; uzito wote wa taabu utamjilia. ²³Atakapokuwa ameshiba tumbo lake, Mungu atamfyatulia hasira yake iwakayo, na kuinyeshea juu yake iwe chakula chake. ²⁴Ijapokuwa hukimbia silaha ya chuma, mshale wa shaba utamchoma. ²⁵Auchomoa, nao hutoka mwilini mwake; ncha ing'aayo hutoka kwenye nyongo yake. Vitisho humwangukia. ²⁶Giza totoro linawavizia hazina zake; moto usiowashwa na mtu utamteketeza na kula kila kilichosalia hemani mwake. ²⁷Mbingu zitaidhihirisha hatia yake, na nchi itainuka juu yake. ²⁸Utajiri wote wa nyumba yake utachukuliwa, ukafagiliwa mbali katika siku ya ghadhabu ya Mungu. ²⁹Hii ndiyo sehemu ya mtu mwovu itokayo kwa Mungu, urithi aliowekewa na Mungu."