Ayubu 8

8 ¹Ndipo Bildadi Mshuhi akajibu: ²"Hata lini utaendelea kunena mambo kama haya? Maneno ya kinywa chako si kitu ila upepo wa kishindo. ³Je, Mungu hupotosha hukumu? Je, Mwenyezi hupotosha haki? ⁴Kama watoto wako wamemtenda dhambi, aliwatia mkononi mwa matokeo ya uasi wao. ⁵Lakini kama utamtafuta Mungu kwa bidii na kumsihi Mwenyezi ili apate kukuhurumia, ⁶kama wewe u safi na mnyofu, bila shaka sasa atajiamsha kwa ajili yako na kukurudisha mahali pako pa haki. ⁷Ingawa mwanzo wako ulikuwa mdogo, miaka yako ya baadaye itasitawi kupita kiasi. ⁸Waulize vizazi vilivyopita zamani, na uyafikirie yale ambayo baba zao waliyachunguza. ⁹Kwa maana sisi tulizaliwa jana tu, wala hatujui neno; siku zetu duniani si kitu ila kivuli. ¹⁰Je, hawatakufundisha na kukuambia, na kutoa maneno yatokayo katika ufahamu wao? ¹¹Je, mafunjo yaweza kukua marefu pasipo pahali penye matope? Je, manyasi yaweza kusitawi bila maji? ¹²Ingali mabichi bila kukatwa, hunyauka upesi kuliko majani yote. ¹³Ndiyo mwisho wa wote wamsahauo Mungu; ndivyo litakavyoangamia tumaini la asiyemcha Mungu. ¹⁴Uthabiti wake ni dhaifu, na matumaini yake ni utando wa buibui. ¹⁵Huitegemea nyumba yake, lakini haisimami; hushikamana nayo, lakini haidumu. ¹⁶Yeye ni kama mmea unyweshwao maji vizuri kwenye jua, ukieneza machipukizi yake bustanini. ¹⁷Mizizi yake hujizungusha juu ya chungu ya mawe na kutafuta mahali pa kushikilia kati ya miamba. ¹⁸Lakini atakapong'olewa mahali pake, mahali pale humkana, pakisema, 'Sikupata kukuona kamwe.' ¹⁹Ndiyo furaha ya njia yake—na kutoka udongoni wengine huchipuka mahali pake. ²⁰Mungu hatamkataa mtu asiye na hatia, wala hatawapa mkono watendao maovu. ²¹Bado atakijaza kinywa chako kicheko, na midomo yako vigelegele vya furaha. ²²Wale wakuchukiao watavikwa aibu, na hema ya waovu haitakuwapo tena."