Yohana 19

19 ¹Ndipo Pilato akamtwaa Yesu, akamwamuru apigwe mijeledi. ²Askari wakasokota taji ya miiba, wakamvika kichwani, wakamvika na joho la rangi ya zambarau. ³Wakawa wakija kwake, wakisema, "Salamu, Mfalme wa Wayahudi!" nao wakampiga makofi usoni.

⁴Pilato akatoka nje tena, akawaambia, "Tazameni, namleta kwenu nje, mpate kujua ya kuwa sioni hatia yoyote kwake." ⁵Basi Yesu akatoka nje, amevaa ile taji ya miiba na lile joho la zambarau. Pilato akawaambia, "Tazameni, mtu huyu!"

⁶Wakuu wa makuhani na walinzi walipomwona, wakapiga kelele, wakisema, "Msulubishe! Msulubishe!" Pilato akawaambia, "Mtwaeni ninyi wenyewe mkamsulubishe, kwa maana mimi sioni hatia kwake."

⁷Wayahudi wakamjibu, "Sisi tunayo sheria, na kwa sheria hiyo yampasa kufa, kwa sababu alijifanya kuwa Mwana wa Mungu."

⁸Pilato aliposikia neno hilo, akazidi kuogopa. ⁹Akaingia tena ndani ya makao yake, akamwuliza Yesu, "Wewe umetoka wapi?" Lakini Yesu hakumpa jibu. ¹⁰Basi Pilato akamwambia, "Hunisemi mimi? Hujui ya kuwa nina mamlaka ya kukufungua, nami nina mamlaka ya kukusulubisha?"

¹¹Yesu akamjibu, "Usingekuwa na mamlaka yoyote juu yangu kama usingepewa kutoka juu. Kwa sababu hiyo yeye aliyenitia mikononi mwako ana dhambi kubwa zaidi."

¹²Tangu hapo Pilato akatafuta njia ya kumfungua, lakini Wayahudi wakapiga kelele, wakisema, "Ukimfungua huyu, wewe si rafiki wa Kaisari. Kila mtu ajifanyaye kuwa mfalme humpinga Kaisari."

¹³Pilato aliposikia maneno hayo, akamleta Yesu nje, akaketi katika kiti cha hukumu mahali paitwapo Sakafu ya Mawe, kwa Kiaramu Gabatha. ¹⁴Ilikuwa ni siku ya Maandalio ya Pasaka, yapata saa sita mchana. Akawaambia Wayahudi, "Tazameni, Mfalme wenu!"

¹⁵Wao wakapiga kelele, "Mwondoe! Mwondoe! Msulubishe!" Pilato akawauliza, "Nimsulubishe mfalme wenu?" Wakuu wa makuhani wakajibu, "Sisi hatuna mfalme ila Kaisari."

Atolewa

¹⁶Basi ndipo akawatia mikononi mwao ili asulubishwe. Nao wakamtwaa Yesu, ¹⁷Naye akiuchukua msalaba wake mwenyewe, akatoka nje kwenda mahali paitwapo Fuvu la Kichwa, kwa Kiaramu paitwapo Golgotha. ¹⁸Hapo wakamsulubisha, na wengine wawili pamoja naye, mmoja upande huu na mmoja upande huu, na Yesu katikati. ¹⁹Pilato akaandika tangazo, akaliweka juu ya msalaba, likisema: Yesu wa Nazareti, Mfalme wa Wayahudi. ²⁰Wayahudi wengi walilisoma tangazo hilo, kwa sababu mahali aliposulubishwa Yesu palikuwa karibu na mji; nalo liliandikwa kwa Kiaramu, na Kilatini, na Kiyunani. ²¹Basi wakuu wa makuhani wa Wayahudi wakamwambia Pilato, "Usiandike, 'Mfalme wa Wayahudi,' bali, 'Mtu huyu alisema, Mimi ni Mfalme wa Wayahudi.'"

²²Pilato akajibu, "Niliyoyaandika nimeyaandika."

²³Askari walipokwisha kumsulubisha Yesu, wakayatwaa mavazi yake, wakayagawa mafungu manne, kila askari fungu lake, na kanzu pia. Kanzu ile haikuwa na mshono, ilikuwa imefumwa yote pia toka juu hata chini. ²⁴Basi wakaambiana, "Tusiipasue, bali na tuipigie kura, ni nani atakayeipata" — ili litimie Andiko lisemalo: "Waligawana mavazi yangu wao kwa wao, na nguo yangu wakaipigia kura." Basi askari wakafanya hayo.

²⁵Karibu na msalaba wa Yesu walikuwa wamesimama mama yake, na dada wa mama yake, Mariamu mke wa Klopa, na Mariamu Magdalene.

²⁶Yesu alipomwona mama yake, na yule mwanafunzi aliyempenda amesimama karibu, akamwambia mama yake, "Mama, tazama, mwanao!" ²⁷Kisha akamwambia yule mwanafunzi, "Tazama, mama yako!" Na tangu saa ile mwanafunzi yule akamchukua nyumbani kwake.

Imekwisha Kumalizika

²⁸Baada ya hayo, Yesu akijua ya kuwa yote yamekwisha kumalizika, ili Andiko litimie, akasema, "Naona kiu."

²⁹Palikuwa na chombo kimewekwa hapo, kimejaa siki; basi wakaitia sifongo iwe imelowa siki, wakaiweka juu ya ufito wa hisopo, wakaikaribisha kinywani mwake.

³⁰Basi Yesu alipokwisha kuipokea ile siki, akasema, "Imekwisha kumalizika." Akainama kichwa, akaisalimisha roho yake.

³¹Basi kwa sababu ilikuwa ni siku ya Maandalio, ili miili isikae msalabani siku ya Sabato—kwa maana Sabato ile ilikuwa siku kuu—Wayahudi wakamwomba Pilato miguu yao ivunjwe, na miili iondolewe. ³²Basi askari wakaja, wakamvunja miguu wa kwanza, na yule mwingine aliyesulubishwa pamoja naye. ³³Lakini walipomfikia Yesu, walipoona ya kuwa amekwisha kufa, hawakumvunja miguu yake. ³⁴Ila askari mmoja akamchoma ubavuni kwa mkuki, na mara ikatoka damu na maji. ³⁵Naye aliyeona ameshuhudia—na ushuhuda wake ni kweli, naye anajua ya kuwa anasema kweli—ili nanyi mpate kuamini. ³⁶Kwa maana mambo haya yalitokea ili Andiko litimie, lisemalo: "Hapana mfupa wake utakaovunjwa." ³⁷Na tena, Andiko lingine lasema, "Watamtazama yeye waliyemchoma."

Yusufu na Nikodemo

³⁸Baada ya hayo, Yusufu wa Arimathaya—naye alikuwa mwanafunzi wa Yesu, lakini kwa siri, kwa kuwaogopa Wayahudi—akamwomba Pilato ampe ruhusa auondoe mwili wa Yesu. Pilato akamruhusu. Basi akaenda, akauondoa mwili wake. ³⁹Naye Nikodemo, yeye aliyemwendea Yesu usiku hapo kwanza, akaja pia, akileta mchanganyiko wa manemane na uudi, wapata ratili sabini na tano. ⁴⁰Basi wakautwaa mwili wa Yesu, wakaufunga sanda za kitani pamoja na manukato, kama ilivyo desturi ya Wayahudi kuzika. ⁴¹Na mahali pale aliposulubishwa palikuwa na bustani, na ndani ya bustani palikuwa na kaburi jipya ambalo hata mtu hakuwekwa ndani yake bado. ⁴²Basi kwa sababu ya siku ya Maandalio ya Wayahudi, na kwa kuwa kaburi lile lilikuwa karibu, wakamlaza Yesu humo.