Yohana 21

21 ¹Baadaye Yesu akajidhihirisha tena kwa wanafunzi kando ya Bahari ya Tiberia—na hivi ndivyo alivyojidhihirisha. ²Simoni Petro, Tomaso aliyeitwa Pacha, Nathanaeli kutoka Kana ya Galilaya, wana wa Zebedayo, na wanafunzi wengine wawili walikuwa pamoja. ³Simoni Petro akawaambia, "Ninakwenda kuvua samaki." "Tutakwenda pamoja nawe," wakasema. Basi wakatoka, wakaingia ndani ya mashua, lakini usiku ule hawakupata chochote.

⁴Kulipopambazuka, Yesu akasimama ufuoni, lakini wanafunzi hawakujua ya kuwa ni Yesu.

⁵Yesu akawaambia, "Watoto, je, mna samaki?" Wakamjibu, "La."

⁶Akawaambia, "Tupeni wavu upande wa kuume wa mashua, nanyi mtapata samaki." Basi wakautupa, wasiweze tena kuuvuta kwa sababu ya wingi wa samaki.

⁷Yule mwanafunzi ambaye Yesu alimpenda akamwambia Petro, 'Ni Bwana!' Aliposikia ya kuwa ni Bwana, Simoni Petro akajivika vazi lake—kwa maana alikuwa amelivua ili afanye kazi—akajitupa baharini. ⁸Wanafunzi wengine wakaja kwa mashua, wakiukokota ule wavu uliojaa samaki, kwa maana hawakuwa mbali na nchi kavu, ila kama yadi mia moja tu. ⁹Walipofika ufuoni, wakaona moto wa makaa na samaki juu yake, na mkate.

¹⁰Yesu akawaambia, "Leteni baadhi ya samaki mliovua sasa hivi."

¹¹Basi Simoni Petro akapanda, akaukokota ule wavu mpaka nchi kavu, umejaa samaki wakubwa mia moja hamsini na watatu; na ingawa walikuwa wengi hivyo, wavu haukuchanika.

¹²Yesu akawaambia, "Njooni mle chakula cha asubuhi." Wala hakuna mmoja wa wanafunzi aliyethubutu kumwuliza, "Wewe ni nani?"—kwa maana walijua ya kuwa ni Bwana.

¹³Yesu akaja, akautwaa ule mkate, akawapa, na samaki vilevile. ¹⁴Hii ilikuwa mara ya tatu sasa Yesu kujidhihirisha kwa wanafunzi baada ya kufufuka kutoka kwa wafu.

¹⁵Walipokwisha kula chakula cha asubuhi, Yesu akamwuliza Simoni Petro, "Simoni, mwana wa Yohana, wanipenda kwa moyo wako wote, zaidi ya hawa?" Akamjibu, "Ndiyo, Bwana, wewe wajua ya kuwa nakupenda kama rafiki." Yesu akamwambia, "Lisha wana-kondoo wangu."

¹⁶Mara ya pili Yesu akamwuliza, "Simoni mwana wa Yohana, wanipenda kwa moyo wako wote?" Akamjibu, "Ndiyo, Bwana, wewe wajua ya kuwa nakupenda kama rafiki." Yesu akamwambia, "Chunga kondoo wangu."

¹⁷Mara ya tatu Yesu akamwambia, "Simoni mwana wa Yohana, wanipenda kama rafiki?" Petro akahuzunika kwa sababu Yesu alimwuliza mara ya tatu, "Wanipenda kama rafiki?" akasema, "Bwana, wewe wajua yote; wajua ya kuwa nakupenda kama rafiki." Yesu akamwambia, "Lisha kondoo wangu."

¹⁸"Amin, amin, nakuambia: ulipokuwa kijana, ulijivika mwenyewe na kwenda ulikotaka; lakini utakapokuwa mzee, utanyoosha mikono yako, na mwingine atakuvika na kukupeleka usikotaka kwenda." ¹⁹Yesu alisema hivi ili kuonyesha ni kwa mauti ya namna gani Petro atakavyomtukuza Baba yetu. Kisha akamwambia, "Nifuate."

²⁰Petro akageuka, akamwona yule mwanafunzi ambaye Yesu alimpenda akiwafuata—yule aliyeegemea kifuani mwa Yesu wakati wa chakula cha jioni na kuuliza, "Bwana, ni nani atakayekusaliti?" ²¹Petro alipomwona, akamwambia Yesu, "Bwana, na huyu je?"

²²Yesu akamwambia, "Nikitaka akae hata nitakapokuja, imekuhusu nini wewe? Wewe nifuate." ²³Basi neno hili likaenea miongoni mwa ndugu ya kuwa mwanafunzi huyu hatakufa. Lakini Yesu hakumwambia ya kuwa hatakufa, bali, "Nikitaka akae hata nitakapokuja, imekuhusu nini wewe?"

²⁴Huyu ndiye yule mwanafunzi ashuhudiaye mambo haya na aliyeyaandika; nasi twajua ya kuwa ushuhuda wake ni kweli. ²⁵Yesu alifanya na mambo mengine mengi pia. Kama kila moja lingeandikwa, sidhani ya kuwa ulimwengu wenyewe ungetosha kuvitunza vitabu vingeandikwa.