Yohana 4

Sura ya 4.

4 ¹Basi Yesu alipojua kwamba Mafarisayo wamesikia ya kuwa yeye anafanya na kubatiza wanafunzi wengi kuliko Yohana ²(ingawa Yesu mwenyewe hakuwa akibatiza, bali wanafunzi wake), ³aliondoka Uyahudi akarudi Galilaya. ⁴Na ilimpasa kupita katikati ya Samaria. ⁵Basi akafika katika mji wa Samaria uitwao Sikari, karibu na lile shamba Yakobo alilompa mwanawe Yusufu. ⁶Kisima cha Yakobo kilikuwako hapo. Naye Yesu, akiwa amechoka kwa safari, akaketi hivi kando ya kisima—yapata saa sita mchana. ^a a v6 Kwa kuhesabu tangu macheo ya jua, saa sita ni yapata adhuhuri.

⁷Mwanamke mmoja Msamaria akaja kuteka maji. Yesu akamwambia, "Nipe maji ninywe."

⁸(Kwa maana wanafunzi wake walikuwa wamekwenda mjini kununua chakula.)

⁹Yule mwanamke Msamaria akamwambia, "Wewe u Myahudi; yakuwaje wataka kunywa kwangu mimi niliye mwanamke Msamaria?" (Kwa maana Wayahudi hawachangamani na Wasamaria.)

¹⁰Yesu akajibu akamwambia, "Kama ungalijua karama ya Baba yetu, naye ni nani akuambiaye, 'Nipe maji ninywe,' ungalimwomba yeye, naye angalikupa maji yaliyo hai."

¹¹Yule mwanamke akamwambia, "Bwana, huna kitu cha kutekea, na kisima ni kirefu. Basi umeyapata wapi hayo maji yaliyo hai? ¹²Je, wewe u mkuu kuliko baba yetu Yakobo, aliyetupa kisima hiki, naye mwenyewe akakinywea, na wanawe, na mifugo yake?"

¹³Yesu akajibu akamwambia, "Kila anywaye maji haya ataona kiu tena; ¹⁴lakini yeye atakayekunywa maji nitakayompa mimi hataona kiu milele; bali yale maji nitakayompa yatakuwa ndani yake chemchemi ya maji yabubujikayo hata uzima wa milele."

¹⁵Yule mwanamke akamwambia, "Bwana, nipe maji hayo, nisipate kiu wala nisije hapa kuteka."

¹⁶Yesu akamwambia, "Nenda ukamwite mumeo, uje naye hapa."

¹⁷Yule mwanamke akajibu akasema, "Sina mume." Yesu akamwambia, "Umesema vema, 'Sina mume';

¹⁸kwa maana umekuwa na waume watano, na huyu uliye naye sasa siye mumeo. Katika hilo umesema kweli."

¹⁹Yule mwanamke akamwambia, "Bwana, naona ya kuwa u nabii. ²⁰Baba zetu waliabudu katika mlima huu, nanyi mwasema ya kwamba Yerusalemu ndipo mahali pawapasapo watu kuabudia."

²¹Yesu akamwambia, "Mama, niamini, saa yaja ambayo hamtamwabudu Baba katika mlima huu, wala kule Yerusalemu. ²²Ninyi mnaabudu msichokijua; sisi tunaabudu tunachokijua—kwa kuwa wokovu watoka kwa Wayahudi. ²³Lakini saa yaja, nayo sasa ipo, ambayo waabuduo halisi watamwabudu Baba katika roho na kweli—kwa maana Baba awatafuta watu wa namna hiyo wamwabudu. ²⁴Baba ni roho, nao wamwabuduo yeye imewapasa kumwabudu katika roho na kweli." ^b b v24 Katika fungu hili lote Yesu afundisha juu ya kumwabudu Baba; yeye ambaye asili yake ni roho ndiye Baba yuleyule awatafutaye waabuduo halisi.

²⁵Yule mwanamke akamwambia, "Najua ya kuwa Masihi—yule aitwaye Kristo—anakuja. Naye atakapokuja, atatuambia mambo yote."

²⁶Yesu akamwambia, "Mimi ndiye—nisemaye nawe."

²⁷Wakati huohuo wanafunzi wake wakaja, wakastaajabu kwa kuwa alikuwa akisema na mwanamke. Lakini hakuna aliyesema, "Wataka nini?" au, "Mbona wasema naye?" ²⁸Basi yule mwanamke akauacha mtungi wake, akaenda zake mjini, akawaambia watu, ²⁹"Njoni, mtazame mtu aliyeniambia mambo yote niliyoyatenda. Je, huyu siye Kristo?" ³⁰Wakatoka mjini, wakawa wakija kwake.

³¹Wakati ule ule wanafunzi wake walikuwa wakimsihi, wakisema, "Rabi, ule chakula."

³²Naye akawaambia, "Mimi ninacho chakula cha kula msichokijua ninyi."

³³Basi wanafunzi wakaambiana, "Je, kuna mtu aliyemletea kitu ale?"

³⁴Yesu akawaambia, "Chakula changu ndicho hiki, niyafanye mapenzi yake yeye aliyenituma, na kuikamilisha kazi yake. ³⁵Je, ninyi hamsemi, 'Bado miezi minne, ndipo mavuno yaja'? Tazameni, nawaambia: inueni macho yenu myatazame mashamba, ya kuwa yamekwisha kuwa meupe, tayari kwa mavuno. ³⁶Naye avunaye tayari apokea ujira, na kukusanya matunda hata uzima wa milele, ili yeye apandaye na yeye avunaye wafurahi pamoja. ³⁷Kwa maana katika hili neno hilo ni kweli, 'Mmoja hupanda na mwingine huvuna.' ³⁸Mimi naliwatuma kuvuna msichokitaabikia; wengine walitaabika, nanyi mmeingia katika taabu yao."

Samaria Yaamini

³⁹Na Wasamaria wengi wa mji ule wakamwamini kwa sababu ya neno la yule mwanamke, aliyeshuhudia akisema, "Aliniambia mambo yote niliyoyatenda." ⁴⁰Basi wale Wasamaria walipomjia, wakamsihi akae kwao; naye akakaa huko siku mbili. ⁴¹Nao wengi zaidi wakaamini kwa sababu ya neno lake. ⁴²Wakamwambia yule mwanamke, "Sasa tunaamini, si kwa sababu ya maneno yako tu—kwa maana sisi wenyewe tumesikia, nasi twajua ya kuwa hakika huyu ndiye Mwokozi wa ulimwengu."

Kurudi Galilaya

⁴³Hata baada ya zile siku mbili aliondoka huko kwenda Galilaya. ⁴⁴(Kwa maana Yesu mwenyewe alishuhudia ya kwamba nabii hana heshima katika nchi yake mwenyewe.) ⁴⁵Basi alipofika Galilaya, Wagalilaya wakamkaribisha, kwa kuwa wameyaona yote aliyoyafanya huko Yerusalemu kwenye sikukuu—maana wao nao walikuwa wamekwenda kwenye sikukuu. ⁴⁶Basi akaja tena Kana ya Galilaya, hapo alipoyafanya yale maji kuwa divai. Palikuwa na diwani mmoja ambaye mwanawe alikuwa hawezi huko Kapernaumu. ⁴⁷Huyu aliposikia ya kwamba Yesu amekuja kutoka Uyahudi mpaka Galilaya, akamwendea, akamsihi ashuke amponye mwanawe, kwa maana alikuwa karibu na kufa.

⁴⁸Basi Yesu akamwambia, "Msipoona ishara na maajabu hamtaamini kamwe."

⁴⁹Yule diwani akamwambia, "Bwana, shuka kabla mwanangu hajafa."

⁵⁰Yesu akamwambia, "Enenda; mwanao yu hai." Yule mtu akaliamini lile neno Yesu alilomwambia, akaenda zake.

⁵¹Hata alipokuwa akishuka, watumishi wake wakamlaki, wakamwambia ya kwamba mtoto wake yu hai. ⁵²Basi akawauliza saa aliyoanza kupata nafuu, wakamwambia, "Jana saa saba homa ilimwacha."

⁵³Basi babaye akafahamu ya kuwa ni saa ile ile Yesu aliyomwambia, "Mwanao yu hai." Akaamini yeye na nyumba yake yote.

⁵⁴Hii ndiyo ilikuwa ishara ya pili aliyoifanya Yesu alipokuja kutoka Uyahudi mpaka Galilaya.