Mithali 16

16 ¹Mipango ya moyo ni ya mwanadamu, lakini jawabu la ulimi latoka kwa Baba yetu. ²Njia zote za mtu ni safi machoni pake mwenyewe, lakini Baba yetu huyapima makusudi ya moyo. ³Mkabidhi Baba yetu kazi zako, nayo mipango yako itathibitika. ⁴Baba yetu amefanya kila kitu kwa kusudi lake, naam, hata mwovu kwa siku ya taabu. ⁵Kila mwenye moyo wa kiburi ni chukizo kwa Baba yetu; jua hakika, hataepuka adhabu. ⁶Upendo na uaminifu huufunika dhambi, na kwa kumcha Baba yetu mtu hujiepusha na uovu. ⁷Njia za mtu zinapompendeza Baba yetu, Baba yetu huwafanya hata adui zake wakae naye kwa amani. ⁸Afadhali kidogo pamoja na haki kuliko mapato mengi pamoja na udhalimu. ⁹Moyo wa mtu huipanga njia yake, lakini Baba yetu huzithibitisha hatua zake. ¹⁰Hukumu ya Mungu iko midomoni mwa mfalme; kinywa chake hakiihini haki. ¹¹Mizani na vipimo vya haki ni vya Baba yetu; kila uzito na kipimo ni kazi yake. ¹²Ni chukizo kwa wafalme kutenda uovu, kwa maana kiti cha enzi hufanywa imara kwa haki. ¹³Midomo ya haki ni furaha ya wafalme, nao humpenda yeye anenaye yaliyo sawa. ¹⁴Ghadhabu ya mfalme ni mjumbe wa mauti, lakini mtu mwenye hekima ataituliza. ¹⁵Katika nuru ya uso wa mfalme mna uzima, na upendeleo wake ni kama wingu liletalo mvua ya masika. ¹⁶Bora kupata hekima kuliko dhahabu! Kupata ufahamu ni bora kuliko fedha. ¹⁷Njia kuu ya wanyofu hujiepusha na uovu; yeye ailindaye njia yake huhifadhi nafsi yake. ¹⁸Kiburi hutangulia uangamivu, na roho ya majivuno hutangulia anguko. ¹⁹Afadhali kuwa mnyenyekevu wa roho miongoni mwa maskini kuliko kugawana nyara pamoja na wenye kiburi. ²⁰Yeye alishikiliaye neno atapata mema, na heri mtu yule amtumainiye Baba yetu. ²¹Mwenye moyo wa hekima huitwa mwenye busara, na maneno matamu huongeza ushawishi. ²²Ufahamu ni chemchemi ya uzima kwa yeye aliye nao, lakini wapumbavu hurudiwa na upumbavu wao wenyewe. ²³Moyo wa mwenye hekima hukifanya kinywa chake kuwa na hekima na huongeza ushawishi midomoni mwake. ²⁴Maneno matamu ni sega la asali, matamu nafsini na kuiponya mifupa. ²⁵Iko njia ionekanayo kuwa sawa machoni pa mtu, lakini mwisho wake ni njia za mauti. ²⁶Njaa ya mfanyakazi humfanyia kazi; njaa yake humsukuma mbele. ²⁷Mtu asiyefaa huchimbua uovu, na midomoni mwake mna moto uunguzao. ²⁸Mtu mpotovu hueneza ugomvi, na msengenyaji hutenganisha marafiki wa karibu. ²⁹Mtu mkatili humshawishi jirani yake na kumwongoza katika njia isiyo njema. ³⁰Yeye akonyezaye macho yake hupanga upotovu; yeye akazaye midomo yake amenuia uovu. ³¹Mvi ni taji ya utukufu; hupatikana katika njia ya haki. ³²Afadhali mtu mstahimilivu kuliko shujaa, na yeye aitawalaye roho yake kuliko yeye autekaye mji. ³³Kura hutupwa mapajani, lakini kila uamuzi wake hutoka kwa Baba yetu.