Zaburi 103

103 ¹Ee nafsi yangu, umhimidi Baba yetu; na vyote vilivyo ndani yangu, vihimidi jina lake takatifu!

²Ee nafsi yangu, umhimidi Baba yetu, wala usisahau fadhili zake zote— ³akusamehaye maovu yako yote, akuponyaye magonjwa yako yote, ⁴aukomboaye uhai wako na kaburi, akuvikaye taji ya upendo thabiti na huruma, ⁵akushibishaye kwa mema maadamu unaishi, hata ujana wako ukafanywa upya kama tai.

⁶Baba yetu hutenda haki na hukumu ya adili kwa wote wanaoonewa.

⁷Alimjulisha Musa njia zake, matendo yake kwa wana wa Israeli. ⁸Baba yetu ni mwenye huruma na neema, si mwepesi wa hasira, tena ni mwingi wa upendo thabiti. ⁹Hatalaumu siku zote, wala hatashika hasira yake milele. ¹⁰Hakututenda sawasawa na dhambi zetu, wala hakutulipa kwa kadiri ya maovu yetu. ¹¹Kwa maana kama mbingu zilivyo juu sana kuliko nchi, ndivyo upendo wake thabiti ulivyo mkuu kwa wamchao; ¹²Kama mashariki ilivyo mbali na magharibi, ndivyo alivyoziweka dhambi zetu mbali nasi.

¹³Kama vile moyo wa baba unavyowahurumia watoto wake, ndivyo moyo wa Baba yetu unavyowahurumia wamchao. ¹⁴Kwa maana yeye anajua umbo letu; anakumbuka ya kuwa sisi tu mavumbi. ¹⁵Siku za mwanadamu ni kama majani; huchanua kama ua la porini shambani; ¹⁶kwa maana upepo hupita juu yake, nalo hutoweka, wala mahali pake hapapalikumbuki tena. ¹⁷Bali upendo thabiti wa Baba yetu ni tangu milele hata milele juu ya wale wamchao, na haki yake kwa watoto wa watoto, ¹⁸kwa wale walishikao agano lake, na kukumbuka kuyatenda maagizo yake.

¹⁹Baba yetu ameuweka kiti chake cha enzi mbinguni, na ufalme wake unatawala juu ya vyote.

²⁰Mhimidini Baba yetu, enyi malaika zake, enyi mashujaa mtendao neno lake, mkitii sauti ya neno lake! ²¹Mhimidini Baba yetu, enyi majeshi yake yote, watumishi wake mtendao mapenzi yake! ²²Mhimidini Baba yetu, enyi kazi zake zote, katika mahali pote pa ufalme wake. Ee nafsi yangu, umhimidi Baba yetu!