2 கொரிந்தியர் 9

9 ¹கர்த்தருடைய மக்களுக்குச் செய்யப்படும் ஊழியத்தைக் குறித்து உங்களுக்கு எழுத எனக்கு அவசியமில்லை; ²ஏனெனில் உங்கள் ஆவலை நான் அறிவேன்; அகாயா நாட்டார் போன வருடமே ஆயத்தமாயிருக்கிறார்கள் என்று உங்களைக் குறித்து மக்கெதோனியருக்கு முன்பாக நான் பெருமைபாராட்டுகிறேன்; உங்கள் ஆர்வம் அவர்களில் அநேகரைத் தூண்டிவிட்டது. ³இந்த விஷயத்தில் உங்களைக் குறித்து நாங்கள் பாராட்டின பெருமை வீணாய்ப்போகாதபடிக்கும், நான் சொன்னபடியே நீங்கள் ஆயத்தமாயிருக்கும்படிக்கும், சகோதரர்களை அனுப்புகிறேன். ⁴இல்லாவிட்டால், மக்கெதோனியர் என்னோடே வந்து உங்களை ஆயத்தமில்லாதவர்களாகக் கண்டால், உங்களைச் சொல்ல வேண்டியதில்லை, நாங்களே இந்த நம்பிக்கையின் நிமித்தம் வெட்கப்படவேண்டியதாயிருக்கும். ⁵ஆகையால், நீங்கள் வாக்குப்பண்ணிய தாராளமான அன்பளிப்பை முன்னதாகவே ஆயத்தம்செய்யும்படிக்கும், அது வருத்தத்தோடு கொடுக்கப்படுவதாக அல்ல, மனப்பூர்வமான அன்பளிப்பாய் ஆயத்தமாயிருக்கும்படிக்கும், சகோதரர்கள் உங்களிடம் முந்திச் செல்லும்படி அவர்களை ஏவுவது அவசியமென்று எண்ணினேன்.

⁶இதை நினைத்துக்கொள்ளுங்கள்: சிக்கனமாய் விதைக்கிறவன் சிக்கனமாய் அறுப்பான்; தாராளமாய் விதைக்கிறவன் தாராளமாய் அறுப்பான். ⁷அவனவன் விசனத்தோடாவது கட்டாயத்தோடாவது அல்ல, தன் இருதயத்தில் தீர்மானித்தபடியே கொடுக்கக்கடவன்; ஏனெனில் மனமகிழ்ச்சியுடன் கொடுக்கிறவனிடத்தில் எங்கள் பிதா அன்புகூருகிறார். ⁸எல்லாவற்றிலும் எப்பொழுதும் உங்களுக்குத் தேவையானதெல்லாம் உங்களுக்கு உண்டாயிருந்து, எல்லா நற்கிரியைகளிலும் நீங்கள் பெருகும்படிக்கு, எங்கள் பிதா சகல கிருபையையும் உங்களிடத்தில் பெருகப்பண்ண வல்லவராயிருக்கிறார். ⁹எழுதியிருக்கிறபடி: "அவர் வாரி இறைத்தார், ஏழைகளுக்குக் கொடுத்தார்; அவருடைய நீதி என்றென்றைக்கும் நிலைத்திருக்கும்."

¹⁰விதைக்கிறவனுக்கு விதையையும் புசிக்கிறதற்கு அப்பத்தையும் அளிக்கிறவர், உங்கள் விதையை அளித்துப் பெருகப்பண்ணி, உங்கள் நீதியின் விளைச்சலை வளரச்செய்வார். ¹¹எல்லாவற்றிலும் நீங்கள் செல்வந்தர்களாக்கப்படுவீர்கள்; இந்தத் தாராள குணம் எங்கள் மூலமாய் எங்கள் பிதாவுக்கு ஸ்தோத்திரத்தை உண்டாக்குகிறது. ¹²நீங்கள் செய்கிற இந்த ஊழியம் கர்த்தருடைய மக்களின் குறைவை நிறைவாக்குகிறதுமல்லாமல், எங்கள் பிதாவுக்கு அநேக ஸ்தோத்திரங்களைப் பெருகப்பண்ணுகிறது. ¹³இந்த ஊழியத்தினால் நிரூபிக்கப்பட்டு, கிறிஸ்துவின் சுவிசேஷத்தை நீங்கள் அறிக்கைபண்ணி அதற்குக் கீழ்ப்படிந்ததற்காகவும், அவர்களோடும் மற்ற எல்லாரோடும் நீங்கள் தாராளமாய்ப் பகிர்ந்துகொண்டதற்காகவும், மற்றவர்கள் எங்கள் பிதாவைப் புகழ்வார்கள். ¹⁴எங்கள் பிதா உங்களுக்கு அளித்த மிகுந்த கிருபையின் நிமித்தம், அவர்கள் உங்களுக்காக விண்ணப்பம்பண்ணி, உங்கள்மேல் வாஞ்சையாயிருப்பார்கள். ¹⁵வர்ணிக்கக்கூடாத எங்கள் பிதாவின் அன்பளிப்புக்காக அவருக்கு ஸ்தோத்திரம்!