அப்போஸ்தலர் 28

28 ¹நாங்கள் தப்பிப் பத்திரமாய்க் கரைசேர்ந்தபின், அந்தத் தீவு மெலித்தா என்று அழைக்கப்படுகிறதென்று அறிந்தோம். ²அங்குள்ள மக்கள் எங்களுக்கு அசாதாரணமான தயவைக் காண்பித்தார்கள்; மழை பெய்யத் தொடங்கிக் குளிராயிருந்தபடியால், அவர்கள் நெருப்பு மூட்டி எங்கள் அனைவரையும் வரவேற்றார்கள். ³பவுல் ஒரு பிடி விறகுகளைச் சேர்த்து நெருப்பின்மேல் போட்டபோது, வெப்பத்தினால் ஒரு விரியன் பாம்பு வெளியே வந்து அவருடைய கையைக் கவ்விக்கொண்டது. ⁴அந்த ஜந்து அவருடைய கையிலே தொங்குகிறதைக் கண்டு, அங்குள்ள மக்கள் ஒருவரோடொருவர்: “இந்த மனுஷன் நிச்சயமாய்க் கொலைபாதகன்; இவன் கடலிலிருந்து தப்பினாலும், நியாயம் இவனை உயிரோடே வாழவிடாது” என்று பேசிக்கொண்டார்கள். ⁵ஆனாலும் அவர் அந்த ஜந்தை நெருப்பிலே உதறிப்போட்டு, ஒரு தீங்கும் அடையவில்லை. ⁶அவர் வீங்கிப்போவார் அல்லது திடீரென்று செத்து விழுவார் என்று அவர்கள் எதிர்பார்த்தார்கள். ஆனால் வெகுநேரம் காத்திருந்து, அவருக்கு ஒரு கேடும் நேரிடவில்லை என்று கண்டபோது, தங்கள் எண்ணத்தை மாற்றி, அவரை ஒரு தேவன் என்றார்கள்.

⁷அவ்விடத்திற்குச் சமீபத்தில் அந்தத் தீவின் தலைமை அதிகாரியாகிய புபிலியு என்பவனுக்குச் சொந்தமான நிலங்கள் இருந்தன; அவன் எங்களை வரவேற்று, மூன்று நாள் அன்போடு உபசரித்தான். ⁸புபிலியுவின் தகப்பன் ஜுரத்தினாலும் இரத்தபேதியினாலும் வியாதிப்பட்டுக் கிடந்தான். பவுல் உள்ளே போய், ஜெபம்பண்ணி, அவன்மேல் கைகளை வைத்து அவனைச் சொஸ்தமாக்கினார். ⁹இது நடந்தபின், தீவிலுள்ள மற்றவியாதிக்காரரும் வந்து சொஸ்தமாக்கப்பட்டார்கள். ¹⁰அவர்கள் எங்களுக்கு அநேக கனங்களைச் செலுத்தினார்கள்; நாங்கள் கப்பல் ஏறிப் புறப்பட்டபோது, எங்களுக்குத் தேவையானவைகளையெல்லாம் ஏற்றிவைத்தார்கள்.

பவுல் ரோமாபுரி சேர்கிறார்

¹¹மூன்று மாதத்திற்குப்பின், அத்தீவில் மழைக்காலம் தங்கியிருந்த, இரட்டைச் சகோதரர் என்னும் அடையாளமுள்ள அலெக்சந்திரியா பட்டணத்துக் கப்பலில் நாங்கள் ஏறிப் புறப்பட்டோம். ¹²சீரகூசா பட்டணத்தில் கப்பலைத் தரித்து, அங்கே மூன்று நாள் தங்கினோம். ¹³அங்கிருந்து சுற்றிப்போய் ரேகியு பட்டணத்தை அடைந்தோம். ஒருநாள் சென்றபின் தென்றல் காற்று அடித்ததால், இரண்டாம் நாளில் புத்தேயோலி பட்டணத்தை வந்தடைந்தோம். ¹⁴அங்கே சகோதரரையும் சகோதரிகளையும் கண்டோம்; அவர்கள் தங்களோடு ஏழு நாள் தங்கும்படி எங்களை வேண்டிக்கொண்டார்கள்; இவ்விதமாய் ரோமாபுரிக்கு வந்தோம். ¹⁵அங்குள்ள சகோதரரும் சகோதரிகளும் எங்களைப்பற்றிக் கேள்விப்பட்டு, அப்பியுபரம், முச்சத்திரம் என்னும் இடங்கள்மட்டும் எங்களைச் சந்திக்க வந்தார்கள். அவர்களைக் கண்டபோது பவுல் எங்கள் பிதாவுக்கு நன்றி செலுத்தி, தைரியமடைந்தார்.

பவுல் ராஜ்யத்தைப் பிரசங்கிக்கிறார்

¹⁶நாங்கள் ரோமாபுரிக்கு வந்தபோது, பவுல் தன்னைக் காவல்பண்ணின போர்ச்சேவகனோடே தனித்துத் தங்கியிருக்க அனுமதி பெற்றார்.

¹⁷மூன்று நாளைக்குப்பின், அவர் யூதர்களின் தலைவர்களை வரவழைத்தார். அவர்கள் கூடிவந்தபோது, அவர் அவர்களை நோக்கி: “சகோதரரே, நம்முடைய ஜனத்திற்கு விரோதமாகவோ, நம்முடைய முன்னோர்களின் முறைமைகளுக்கு விரோதமாகவோ நான் ஒன்றும் செய்யாதிருந்தும், எருசலேமிலிருந்து ஒரு கைதியாய் ரோமரின் கைகளில் ஒப்புக்கொடுக்கப்பட்டேன். ¹⁸அவர்கள் என்னை விசாரித்தபின், மரணத்திற்கேற்ற குற்றம் ஒன்றும் என்னிடத்தில் இல்லாதபடியால், என்னை விடுதலையாக்க விரும்பினார்கள். ¹⁹யூதர்கள் அதற்கு எதிர்த்துப் பேசினபோது, என் ஜனத்தின்மேல் நான் குற்றம் சாட்டவேண்டியதிருக்காதிருந்தும், இராயனிடத்தில் முறையிடும்படி கட்டாயப்படுத்தப்பட்டேன். ²⁰இதினிமித்தமே நான் உங்களைக் காணவும் உங்களோடே பேசவும் வேண்டிக்கொண்டேன்; இஸ்ரவேலின் நம்பிக்கைக்காகவே இந்தச் சங்கிலியால் கட்டப்பட்டிருக்கிறேன்” என்றார்.

²¹அதற்கு அவர்கள்: “உன்னைக்குறித்து யூதேயாவிலிருந்து எங்களுக்குக் கடிதம் ஒன்றும் வரவில்லை; வந்த சகோதரரில் ஒருவரும் உன்னைக்குறித்துப் பொல்லாங்கானது ஒன்றும் அறிவிக்கவும் இல்லை, சொல்லவும் இல்லை. ²²ஆனாலும் இந்த மதப்பிரிவு எங்கும் விரோதமாய்ப் பேசப்படுகிறதென்று நாங்கள் அறிந்திருக்கிறபடியால், உன் எண்ணம் என்னவென்று உன்னிடத்தில் கேட்க விரும்புகிறோம்” என்றார்கள்.

²³அவர்கள் ஒரு நாளைக் குறித்து, அதிக பேராய் அவருடைய தங்குமிடத்திற்கு வந்தார்கள். காலைமுதல் மாலைவரைக்கும் அவர் எங்கள் பிதாவின் ராஜ்யத்தைக்குறித்துச் சாட்சிகூறி விவரித்து, மோசேயின் நியாயப்பிரமாணத்திலும் தீர்க்கதரிசிகளின் வாக்கியங்களிலுமிருந்து இயேசுவைக்குறித்து அவர்களை நம்பவைக்கப் பிரயத்தனப்பட்டார். ²⁴அவர் சொன்னவைகளினால் சிலர் நம்பினார்கள், மற்றவர்களோ விசுவாசியாதிருந்தார்கள். ²⁵அவர்கள் தங்களுக்குள்ளே ஒருமித்த கருத்தில்லாதிருந்தபடியால், பவுல் ஒரு கடைசி வார்த்தையைச் சொன்னபின் புறப்பட்டுப்போனார்கள்: “பரிசுத்த ஆவியானவர் ஏசாயா தீர்க்கதரிசியின் மூலமாய் உங்கள் முன்னோர்களுக்குச் சரியாகவே சொன்னார்:

²⁶“‘இந்த ஜனத்தினிடத்தில் போய்: நீங்கள் காதாரக் கேட்டும் உணராதேபோவீர்கள்; கண்ணாரக் கண்டும் அறியாதேபோவீர்கள் என்று சொல்லு.

²⁷ஏனெனில் இந்த ஜனத்தின் இருதயம் கொழுத்திருக்கிறது; அவர்கள் காதுகள் மந்தமாய்க் கேட்கிறது; அவர்கள் தங்கள் கண்களை மூடிக்கொண்டார்கள்; இல்லையேல் அவர்கள் தங்கள் கண்களால் கண்டு, தங்கள் காதுகளால் கேட்டு, தங்கள் இருதயத்தால் உணர்ந்து, மனந்திரும்பி, நான் அவர்களைக் குணமாக்குவேனே.’

²⁸ஆகையால், எங்கள் பிதாவின் இரட்சிப்பு புறஜாதிகளுக்கு அனுப்பப்பட்டது என்று அறிந்துகொள்ளுங்கள்; அவர்கள் கேட்பார்கள்” என்றார். ^a a v28 ஆதி காலத்து பிரதிகளில் இங்கே 29-ஆம் வசனம் காணப்படவில்லை; பிற்காலப் பிரதிகள் சேர்ப்பது: “அவர் இதைச் சொன்னபோது, யூதர்கள் தங்களுக்குள்ளே மிகுதியாய் வாக்குவாதம்பண்ணிக்கொண்டு போய்விட்டார்கள்.”

³⁰அவர் தாம் வாடகைக்கு அமர்த்தின சொந்த இடத்தில் இரண்டு வருஷம் முழுவதும் தங்கியிருந்து, தம்மிடத்தில் வந்த யாவரையும் வரவேற்று, ³¹எங்கள் பிதாவின் ராஜ்யத்தைப் பிரசங்கித்து, கர்த்தராகிய இயேசு கிறிஸ்துவைக்குறித்துத் தைரியமாகவும் தடையின்றியும் போதித்துக்கொண்டிருந்தார்.