யாத்திராகமம் 20

20 ¹அப்பொழுது எங்கள் பிதா இந்த வார்த்தைகளையெல்லாம் சொன்னார்:

²“நான் உன்னை எகிப்து தேசத்திலிருந்து, அடிமைத்தன வீட்டிலிருந்து புறப்படப்பண்ணின உன் பிதா.

³“எனக்கு முன்பாக வேறே தேவர்கள் உனக்கு இருக்கவேண்டாம்.

⁴“செதுக்கப்பட்ட விக்கிரகத்தையாவது, மேலே வானத்திலும், கீழே பூமியிலும், பூமியின் கீழே தண்ணீரிலும் உள்ளவைகளின் எந்தச் சாயலையாவது உனக்கு உண்டாக்கவேண்டாம். ⁵அவைகளை நமஸ்கரிக்கவும் சேவிக்கவும் வேண்டாம்; உன் பிதாவாகிய நான் எரிச்சலுள்ள பிதா; என்னைப் பகைக்கிறவர்களைப் பொறுத்தமட்டில் பெற்றோருடைய பாவத்தைப் பிள்ளைகளிடத்தில் மூன்றாம் நான்காம் தலைமுறைவரைக்கும் விசாரிக்கிறவர். ⁶என்னிடத்தில் அன்புகூர்ந்து, என் கற்பனைகளைக் கைக்கொள்ளுகிறவர்களுக்கோ ஆயிரம் தலைமுறைவரைக்கும் உடன்படிக்கை அன்பைக் காண்பிக்கிறவர்.

⁷“உன் பிதாவின் நாமத்தை வீணாய் வழங்காதே; தம்முடைய நாமத்தை வீணாய் வழங்குகிறவனை எங்கள் பிதா தண்டியாமல் விடார்.

⁸“ஓய்வுநாளைப் பரிசுத்தமாய் ஆசரிக்கும்படி அதை நினைத்துக்கொள். ⁹ஆறுநாளும் நீ பிரயாசப்பட்டு, உன் வேலைகளையெல்லாம் செய்வாயாக; ¹⁰ஏழாம்நாளோ உன் பிதாவுக்கென்று ஓய்வுநாள். அதில் நீயும், உன் குமாரனும், உன் குமாரத்தியும், உன் வேலைக்காரனும், உன் வேலைக்காரியும், உன் மிருகஜீவன்களும், உன் வாசல்களில் இருக்கிற அந்நியனும் யாதொரு வேலையும் செய்யவேண்டாம். ¹¹எங்கள் பிதா ஆறுநாளைக்குள்ளே வானத்தையும், பூமியையும், சமுத்திரத்தையும், அவைகளிலுள்ள யாவையும் உண்டாக்கி, ஏழாம்நாளில் ஓய்ந்திருந்தார்; ஆகையால் எங்கள் பிதா ஓய்வுநாளை ஆசீர்வதித்து, அதைப் பரிசுத்தமாக்கினார்.

¹²“உன் தகப்பனையும் உன் தாயையும் கனம்பண்ணு; அப்பொழுது உன் பிதா உனக்குக் கொடுக்கும் தேசத்திலே உன் நாட்கள் நீடித்திருக்கும்.

¹³“கொலை செய்யாதே.

¹⁴“விபசாரம் செய்யாதே.

¹⁵“களவு செய்யாதே.

¹⁶“பிறனுக்கு விரோதமாய்ப் பொய்ச்சாட்சி சொல்லாதே.

¹⁷“பிறனுடைய வீட்டை இச்சியாதே; பிறனுடைய மனைவியையும், அவனுடைய வேலைக்காரனையும், அவனுடைய வேலைக்காரியையும், அவனுடைய எருதையும், அவனுடைய கழுதையையும், பிறனுக்குள்ள யாதொன்றையும் இச்சியாதே.”

¹⁸ஜனங்கள் எல்லாரும் இடிமுழக்கங்களையும், மின்னல்களையும், எக்காள சத்தத்தையும், மலை புகைகிறதையும் கண்டார்கள்; அதைக் கண்டபோது, அவர்கள் நடுநடுங்கி தூரத்திலே நின்றார்கள்.

¹⁹அவர்கள் மோசேயை நோக்கி: “நீர் எங்களோடே பேசும், நாங்கள் கேட்போம்; எங்கள் பிதா எங்களோடே பேசவேண்டாம், பேசினால் நாங்கள் செத்துப்போவோம்” என்றார்கள்.

²⁰மோசே ஜனங்களை நோக்கி: “பயப்படாதேயுங்கள்; உங்களைச் சோதிக்கும்படிக்கும், நீங்கள் பாவம் செய்யாதபடிக்கு அவருடைய பயம் உங்களோடே இருக்கும்படிக்கும், எங்கள் பிதா வந்திருக்கிறார்” என்றான். ²¹ஜனங்கள் தூரத்திலே நின்றார்கள்; மோசேயோ எங்கள் பிதா இருந்த காரிருளை நோக்கி அணுகிச் சென்றான்.

மோசே அருகில் வருகிறார்

²²அப்பொழுது எங்கள் பிதா மோசேயை நோக்கி: “நீ இஸ்ரவேல் புத்திரரோடே சொல்லவேண்டியது என்னவென்றால்: நான் வானத்திலிருந்து உங்களோடே பேசினேன் என்பதை நீங்களே கண்டீர்கள். ²³என்னோடே இணையாக வெள்ளியினாலான தேவர்களையும், உங்களுக்குப் பொன்னினாலான தேவர்களையும் உண்டாக்கவேண்டாம். ²⁴மண்ணினால் எனக்கு ஒரு பலிபீடத்தை உண்டாக்கி, அதின்மேல் உன் சர்வாங்க தகனபலிகளையும், உன் சமாதானபலிகளையும், உன் ஆடுமாடுகளையும் பலியிடு. என் நாமம் நினைவுகூரப்படும் இடங்களிலெல்லாம் நான் உன்னிடத்தில் வந்து உன்னை ஆசீர்வதிப்பேன். ²⁵நீ எனக்குக் கல்லினால் பலிபீடம் உண்டாக்கவேண்டுமானால், வெட்டின கற்களினால் அதைக் கட்டாதே; அதின்மேல் உன் ஆயுதத்தை ஓங்கினால் அதைத் தீட்டுப்படுத்துவாய். ²⁶என் பலிபீடத்தண்டையில் படிகளின்மேல் ஏறாதே; ஏறினால் அதின்மேல் உன் நிர்வாணம் காணப்படும்.”