யாத்திராகமம் 27

27 ¹"சீத்திம் மரத்தினால் பலிபீடத்தைச் செய்: ஏழரை அடி நீளமும், ஏழரை அடி அகலமும், சதுரமாகவும், நான்கரை அடி உயரமாகவும் இருக்கக்கடவது. ²அதின் நான்கு மூலைகளிலும் கொம்புகளைச் செய்; அந்தக் கொம்புகள் அதனோடு ஒரே துண்டாய் இருக்கக்கடவது; அதை வெண்கலத்தால் மூடு. ³அதின் சாம்பலை அள்ளுவதற்குப் பானைகளையும், சாம்பல்முகவைகளையும், கலங்களையும், முள்துறடுகளையும், நெருப்புச்சட்டிகளையும் செய்; அதின் பணிமுட்டுகள் யாவையும் வெண்கலத்தால் செய். ⁴அதற்கு வலைப்பின்னல் போன்ற ஒரு வெண்கல ஜல்லடியைச் செய்; அந்த வலையின் நான்கு மூலைகளிலும் நான்கு வெண்கல வளையங்களைச் செய். ⁵அதைப் பலிபீடத்தின் சட்டத்திற்குக் கீழே வை; அப்படி அந்த வலை பலிபீடத்தின் பாதி உயரம்வரை எட்டும்படி இருக்கக்கடவது. ⁶பலிபீடத்திற்குத் தண்டுகளைச் செய்; சீத்திம் மரத்தினால் அந்தத் தண்டுகளைச் செய்து, அவைகளை வெண்கலத்தால் மூடு. ⁷பலிபீடத்தைச் சுமப்பதற்கு அதின் இரண்டு பக்கங்களிலும் இருக்கிற வளையங்களில் அந்தத் தண்டுகளைப் பாய்ச்சு. ⁸மலையில் உனக்குக் காண்பிக்கப்பட்டபடியே அதைப் பலகைகளால் உள்வெளியாகச் செய்; அப்படியே அதைச் செய்யக்கடவர்கள்.

பிராகாரம்

⁹"வாசஸ்தலத்தின் பிராகாரத்தைச் செய்: தென்பக்கத்திற்குத் திரித்த மெல்லிய பஞ்சுநூல் தொங்குதிரைகள்; அந்தப் பக்கத்திற்கு ஏறக்குறைய நூற்றைம்பது அடி நீளமாய் இருக்கக்கடவது. ¹⁰இருபது தூண்களும், அவைகளுக்கு இருபது வெண்கலப் பாதங்களும்; தூண்களின் கொக்கிகளும் பூண்களும் வெள்ளியினால் செய்யப்படக்கடவது. ¹¹வடபக்கத்திலும் நூற்றைம்பது அடி நீளமான தொங்குதிரைகளும், அவற்றிற்கு இருபது தூண்களும், இருபது வெண்கலப் பாதங்களும், தூண்களுக்கு வெள்ளிக் கொக்கிகளும் பூண்களும் இருக்கக்கடவது. ¹²பிராகாரத்தின் மேற்பக்க அகலத்திற்கு: எழுபத்தைந்து அடி நீளமான தொங்குதிரைகளும், பத்துத் தூண்களும், பத்துப் பாதங்களும் இருக்கக்கடவது. ¹³கிழக்குப் பக்கத்தில், சூரியன் உதிக்கும் திசையை நோக்கிய பிராகாரத்தின் அகலம் ஏறக்குறைய எழுபத்தைந்து அடியாய் இருக்கக்கடவது. ¹⁴வாசலின் ஒரு பக்கத்திற்கு ஏறக்குறைய இருபத்திரண்டரை அடி தொங்குதிரைகளும், மூன்று தூண்களும், மூன்று பாதங்களும் இருக்கக்கடவது. ¹⁵மறுபக்கத்தில் இருபத்திரண்டரை அடி தொங்குதிரைகளும், மூன்று தூண்களும், மூன்று பாதங்களும் இருக்கக்கடவது. ¹⁶பிராகாரத்தின் வாசற்திரை: முப்பது அடி; இளநீலநூலும், இரத்தாம்பரநூலும், சிவப்புநூலும், திரித்த மெல்லிய பஞ்சுநூலும் கொண்டு சித்திரத் தையலாய்த் தைக்கப்பட்டதாகவும், நான்கு தூண்களும், நான்கு பாதங்களும் உள்ளதாகவும் இருக்கக்கடவது. ¹⁷பிராகாரத்தைச் சுற்றிலும் இருக்கிற எல்லாத் தூண்களும் வெள்ளிப் பூண்களால் பூணப்பட்டு, கொக்கிகள் வெள்ளியினாலும், பாதங்கள் வெண்கலத்தினாலும் இருக்கக்கடவது. ¹⁸பிராகாரம்: ஏறக்குறைய நூற்றைம்பது அடி நீளமும், எங்கும் எழுபத்தைந்து அடி அகலமும், ஏழரை அடி உயரமும் உள்ளதாய், திரித்த மெல்லிய பஞ்சுநூலாலும், வெண்கலப் பாதங்களாலும் இருக்கக்கடவது. ¹⁹வாசஸ்தலத்தின் எல்லாப் பணிமுட்டுகளும், எந்த வேலைக்கு உபயோகிக்கப்பட்டாலும், அதின் எல்லா முளைகளும், பிராகாரத்தின் முளைகளும் யாவும் வெண்கலத்தால் செய்யப்படக்கடவது.

இடைவிடாத விளக்கிற்கான எண்ணெய்

²⁰"விளக்கு எப்போதும் எரிந்துகொண்டிருக்கும்படி, வெளிச்சத்திற்காக இடித்துப் பிழிந்த சுத்தமான ஒலிவ எண்ணெயை உன்னிடத்தில் கொண்டுவரும்படி இஸ்ரவேல் புத்திரருக்குக் கட்டளையிடு. ²¹ஆசரிப்புக் கூடாரத்தில், சாட்சிப் பெட்டிக்கு முன்பாக இருக்கிற திரைக்கு வெளிப்புறமாக, ஆரோனும் அவன் குமாரரும் அதை எங்கள் பிதாவுக்கு முன்பாக மாலைதொடங்கிக் காலைவரைக்கும் ஒழுங்குபடுத்தக்கடவர்கள்; இது இஸ்ரவேல் புத்திரர் சார்பாய், அவர்களுடைய தலைமுறைதோறும் நித்திய நியமமாய் இருக்கக்கடவது." ^a a v21 'சாட்சி' என்பது உடன்படிக்கைப் பெட்டிக்குள் வைக்கப்பட்டிருந்த நியாயப்பிரமாணத்தின் கற்பலகைகளைக் குறிக்கிறது.