எசேக்கியேல் 31

31 ¹பதினொன்றாம் வருடம், மூன்றாம் மாதம், முதலாம் நாளில், எங்கள் பிதாவின் வார்த்தை எனக்கு உண்டாயிற்று:

²“மனுஷகுமாரனே, எகிப்தின் ராஜாவாகிய பார்வோனையும் அவனுடைய திரளான ஜனங்களையும் நோக்கிச் சொல்: உன் மகத்துவத்தில் உனக்கு ஒப்பானவன் யார்? ³அசீரியா லீபனோனிலே ஒரு கேதுரு மரமாயிருந்தது; அழகான கிளைகளோடும் காட்டு நிழலோடும், உயரத்தில் ஓங்கி, அதின் நுனி மேகங்களுக்குள் நின்றது. ⁴தண்ணீர்கள் அதைப் பெருகப்பண்ணின, ஆழம் அதை உயரமாய் வளரப்பண்ணிற்று; அது நடப்பட்ட இடத்தைச் சுற்றிலும் அதின் ஆறுகள் ஓடி, தன் கால்வாய்களை வெளியின் சகல மரங்களுக்கும் அனுப்பிற்று. ⁵அப்படியே அதின் உயரம் வெளியின் சகல மரங்களுக்கும் மேலாய் ஓங்கியிருந்தது; ஏராளமான தண்ணீர்களினால் அது பரவினபோது அதின் கொப்புகள் பெருகி, அதின் கிளைகள் நீளமாய் வளர்ந்தன. ⁶ஆகாயத்துப் பறவைகள் எல்லாம் அதின் கொப்புகளில் கூடுகட்டின, வெளியின் மிருகங்கள் எல்லாம் அதின் கிளைகளின் கீழே குட்டிபோட்டன, பெரிய ஜாதிகள் எல்லாம் அதின் நிழலிலே குடியிருந்தன. ⁷அதின் வேர்கள் ஏராளமான தண்ணீர்கள்வரைக்கும் இறங்கியிருந்தபடியால், அது தன் மகத்துவத்திலே தன் நீண்ட கிளைகளோடு அழகாயிருந்தது. ⁸எங்கள் பிதாவின் தோட்டத்திலிருந்த கேதுரு மரங்களும் அதற்கு ஒப்பாகக்கூடாதிருந்தன; தேவதாரு மரங்கள் அதின் கொப்புகளுக்குச் சமமாகாமலும், அர்மோன் மரங்கள் அதின் கிளைகளுக்கு நிகராகாமலும் இருந்தன. எங்கள் பிதாவின் தோட்டத்திலுள்ள எந்த மரமும் அழகில் அதைப்போலிருந்ததில்லை. ⁹அதின் திரளான கிளைகளால் நான் அதை அழகாக்கினேன், எங்கள் பிதாவின் தோட்டத்திலிருந்த ஏதேனின் சகல மரங்களும் அதின்மேல் பொறாமைகொண்டன.’

¹⁰ஆகையால் ஆண்டவராகிய பிதா சொல்லுகிறதாவது: “அது உயரமாய் ஓங்கி, தன் நுனியை மேகங்களுக்குள் வைத்து, தன் உயரத்தினால் அதின் இருதயம் அகந்தைகொண்டபடியினால், ¹¹‘நான் அதை ஜாதிகளில் வல்லவனுடைய கையில் ஒப்புக்கொடுத்தேன்; அவன் அதற்குரியபடி செய்தான்; அதின் அக்கிரமத்தினிமித்தம் நான் அதைத் துரத்திவிட்டேன். ¹²ஜாதிகளில் மகா கொடூரமான அந்நியர் அதை வெட்டிப்போட்டு விட்டுவிட்டார்கள். அதின் கிளைகள் மலைகளின்மேலும் எல்லாப் பள்ளத்தாக்குகளிலும் விழுந்தன, அதின் கொப்புகள் தேசத்தின் எல்லா ஓடைகளிலும் முறிந்துகிடந்தன, பூமியின் சகல ஜனங்களும் அதின் நிழலைவிட்டு அதைக் கைவிட்டார்கள். ¹³அதின் விழுந்த அடிமரத்தின்மேல் ஆகாயத்துப் பறவைகள் எல்லாம் தங்கின, அதின் கிளைகளின் நடுவே வெளியின் மிருகங்கள் எல்லாம் தங்கின, ¹⁴இப்படியே நல்ல தண்ணீர் பாய்ச்சப்படும் மரங்கள் ஒன்றும் உயரமாய் ஓங்காமலும், தங்கள் நுனிகளை மேகங்களுக்குள் வைக்காமலும், தண்ணீர் குடிக்கிற எதுவும் அவ்வளவு உயரமாய் எழும்பாமலும் இருப்பதற்குத்தான். ஏனெனில் எல்லாம் மரணத்துக்கும், பூமியின் ஆழங்களுக்கும், மனுஷர் நடுவிலே குழியில் இறங்குகிறவர்களோடே ஒப்புக்கொடுக்கப்பட்டிருக்கிறது.’

¹⁵ஆண்டவராகிய பிதா சொல்லுகிறதாவது: “அது பாதாளத்தில் இறங்கின நாளிலே நான் ஆழத்தைத் துக்கிக்கப்பண்ணி, அந்த மரத்துக்காக அதை மூடினேன்; அதின் ஆறுகளை நான் அடக்கினேன், ஏராளமான தண்ணீர்கள் தடுக்கப்பட்டன. அதின்மேல் நான் லீபனோனைக் காரிருளாக்கினேன், அதினிமித்தம் வெளியின் சகல மரங்களும் வாடிப்போயின. ¹⁶நான் அதைக் குழியில் இறங்குகிறவர்களோடே பாதாளத்தில் தள்ளிப்போட்டபோது, அதின் விழுகையின் இரைச்சலால் ஜாதிகளை நடுங்கப்பண்ணினேன். அப்பொழுது பூமியின் ஆழங்களில், ஏதேனின் சகல மரங்களும், லீபனோனில் சிறந்த உத்தமமானவைகளும், தண்ணீர் குடிக்கிற யாவும், ஆறுதலடைந்தன. ¹⁷அதின் பலமாயிருந்து ஜாதிகள் நடுவில் அதின் நிழலிலே குடியிருந்தவர்களாகிய அவர்களும் அதனோடேகூடப் பட்டயத்தால் கொல்லப்பட்டவர்களிடமாய்ப் பாதாளத்தில் இறங்கிப்போனார்கள்.’

¹⁸“மகிமையிலும் மகத்துவத்திலும் ஏதேனின் மரங்களில் எது உனக்கு ஒப்பானது? ஆயினும் நீ ஏதேனின் மரங்களோடேகூடப் பூமியின் ஆழங்களுக்குக் கீழே தள்ளப்படுவாய்; விருத்தசேதனமில்லாதவர்களின் நடுவிலே, பட்டயத்தால் கொல்லப்பட்டவர்களோடே கிடப்பாய். இதுவே பார்வோனும் அவனுடைய எல்லாத் திரளான ஜனங்களும், என்று ஆண்டவராகிய பிதா சொல்லுகிறார்.”””