ஏசாயா 18

18 ¹ஆ, இறகுகள் ஒலிக்கும் தேசமே, கூஷ் நதிகளுக்கு அப்பாலிருக்கும் தேசமே, ²கடல்வழியாய், தண்ணீர்களின்மேல் நாணல் படகுகளில் தூதர்களை அனுப்புகிறவளே. வேகமான தூதர்களே, போங்கள்; நெடிதுயர்ந்த, மென்மையான தோலுடைய தேசத்திற்கும், அருகிலும் தூரத்திலும் அஞ்சப்படுகிற ஜனத்திற்கும், வல்லமையுள்ள, மிதித்துத் தள்ளுகிற, நதிகள் நிலத்தைப் பிரிக்கிற தேசத்திற்கும் போங்கள். ³பூலோகக் குடிகளே, பூமியில் வாசம்பண்ணுகிற அனைவரே: மலைகளின்மேல் கொடி ஏற்றப்படும்போது, பாருங்கள்! எக்காளம் முழங்கும்போது, கேளுங்கள்!

⁴எங்கள் பிதா என்னிடம் சொன்னது இதுவே: நான் அமைதியாயிருந்து, சூரிய ஒளியில் தெளிந்த வெப்பத்தைப்போலவும், அறுவடையின் வெக்கையில் பனிமேகத்தைப்போலவும், என் வாசஸ்தலத்திலிருந்து நோக்கிப்பார்ப்பேன்.

⁵அறுவடைக்குமுன், பூப்பு முடிந்து, மொட்டு பழுக்கும் திராட்சையாக மாறும்போது, எங்கள் பிதா கிளைகளைக் கத்திகளால் அறுத்து, படர்ந்த கொடிகளை எடுத்து வெட்டிப்போடுவார். ⁶அவைகள் யாவும் மலைகளின் இரைகொள்ளும் பறவைகளுக்கும், பூமியின் மிருகங்களுக்கும் விடப்படும். இரைகொள்ளும் பறவைகள் அவற்றின்மேல் கோடைகாலம் தங்கும், பூமியின் மிருகங்கள் யாவும் அவற்றின்மேல் மாரிகாலம் தங்கும். ⁷அக்காலத்தில், நெடிதுயர்ந்த, மென்மையான தோலுடைய ஜனத்திடமிருந்தும், அருகிலும் தூரத்திலும் அஞ்சப்படுகிற ஜனத்திடமிருந்தும், வல்லமையுள்ள, மிதித்துத் தள்ளுகிற, நதிகள் நிலத்தைப் பிரிக்கிற தேசத்திடமிருந்தும் பரலோக சேனைகளின் பிதாவுக்குக் காணிக்கைகள் கொண்டுவரப்படும்—பரலோக சேனைகளின் பிதாவின் நாமம் தங்கும் இடமாகிய சீயோன் மலைக்குக் கொண்டுவரப்படும்.