எரேமியா 34

34 ¹பாபிலோன் ராஜாவாகிய நேபுகாத்நேச்சாரும், அவனுடைய சர்வ சேனையும், அவன் ஆண்ட எல்லா ராஜ்யங்களும், எல்லா ஜனங்களும் எருசலேமுக்கும் அதின் எல்லாப் பட்டணங்களுக்கும் விரோதமாக யுத்தம் பண்ணிக்கொண்டிருந்தபோது, எங்கள் பிதாவிடமிருந்து எரேமியாவுக்கு உண்டான வார்த்தை:

²இஸ்ரவேலின் எங்கள் பிதா சொல்லுகிறார்: நீ போய், யூதாவின் ராஜாவாகிய சிதேக்கியாவோடே பேசி, அவனுக்குச் சொல்லவேண்டியது: எங்கள் பிதா சொல்லுகிறார்: இதோ, இந்தப் பட்டணத்தை நான் பாபிலோன் ராஜாவின் கையில் ஒப்புக்கொடுக்கிறேன்; அவன் அதை அக்கினியால் சுட்டெரிப்பான். ³நீ அவன் கைக்குத் தப்பிப்போகாமல், நிச்சயமாய்ப் பிடிக்கப்பட்டு, அவன் கையில் ஒப்புக்கொடுக்கப்படுவாய். உன் கண்கள் பாபிலோன் ராஜாவின் கண்களைக் காணும், அவன் வாய் உன் வாயோடே பேசும், நீ பாபிலோனுக்குப் போவாய்.

⁴ஆகிலும், யூதாவின் ராஜாவாகிய சிதேக்கியாவே, உன் பிதாவின் வார்த்தையைக் கேள்: நீ பட்டயத்தால் சாகமாட்டாய் என்று எங்கள் பிதா சொல்லுகிறார்.

⁵நீ சமாதானத்தோடே மரிப்பாய். உனக்கு முன்னிருந்த ராஜாக்களாகிய உன் பிதாக்களுக்குச் சுகந்தவர்க்கங்களைச் சுட்டெரித்ததுபோல, உனக்காகவும் சுட்டெரித்து, ‘ஐயோ, ஆண்டவனே!’ என்று உனக்காகப் புலம்புவார்கள்; இதை நான் சொன்னேன் என்று உன் பிதா அறிவிக்கிறார்.

⁶அப்பொழுது தீர்க்கதரிசியாகிய எரேமியா இந்த வார்த்தைகளையெல்லாம் எருசலேமிலே யூதாவின் ராஜாவாகிய சிதேக்கியாவுக்குச் சொன்னான், ⁷பாபிலோன் ராஜாவின் சேனை எருசலேமுக்கும், யூதாவில் மீதியாயிருந்த எல்லாப் பட்டணங்களுக்கும் விரோதமாக யுத்தம் பண்ணிக்கொண்டிருந்தது; அந்த அரணான பட்டணங்களில் லாகீசும் அசெக்காவுமே யூதாவில் மீதியாய் விடப்பட்டிருந்தன.

பிதாவானவர் மீறப்பட்ட உடன்படிக்கையை நியாயந்தீர்க்கிறார்

⁸சிதேக்கியா ராஜா எருசலேமிலுள்ள சகல ஜனங்களோடும் ஒரு உடன்படிக்கைபண்ணி, அவர்களுக்கு விடுதலையைக் கூறினபின்பு, எங்கள் பிதாவிடமிருந்து எரேமியாவுக்கு உண்டான வார்த்தை: ⁹அவனவன் தன் எபிரெய வேலைக்காரனையும், தன் எபிரெய வேலைக்காரியையும் விடுதலையாக்கவேண்டும் என்றும், தன் சகோதரனாகிய யூதனை ஒருவனும் அடிமைப்படுத்தலாகாது என்றும் கூறினான். ¹⁰உடன்படிக்கைக்கு உட்பட்ட எல்லாப் பிரபுக்களும் ஜனங்களும், அவனவன் தன் வேலைக்காரனையும் தன் வேலைக்காரியையும் இனி அடிமைப்படுத்தாதபடிக்கு விடுதலையாக்கவேண்டும் என்பதற்குக் கீழ்ப்படிந்து, அவர்களை விடுதலையாக்கினார்கள். ¹¹அதற்குப்பின்பு அவர்கள் மாறி, தாங்கள் விடுதலையாக்கின வேலைக்காரரையும் வேலைக்காரிகளையும் திரும்ப அழைத்து, அவர்களைப் பலவந்தமாய் மறுபடியும் அடிமைகளாக்கினார்கள்.

¹²ஆகையால் எங்கள் பிதாவின் வார்த்தை எரேமியாவுக்கு உண்டாகி, அவர் சொன்னது:

¹³இஸ்ரவேலின் எங்கள் பிதா சொல்லுகிறது என்னவென்றால்: “நான் உங்கள் பிதாக்களை எகிப்து தேசத்திலிருந்தும், அடிமை வீட்டிலிருந்தும் புறப்படப்பண்ணின நாளிலே, நானே அவர்களோடே ஒரு உடன்படிக்கைபண்ணிச் சொன்னது என்னவென்றால்: ¹⁴ஏழு வருஷத்தின் முடிவிலே, உங்களுக்கு விற்கப்பட்டு ஆறு வருஷம் ஊழியஞ்செய்த தன் எபிரெய சகோதரனை அவனவன் விடுதலையாக்கவேண்டும்; அவனை நீ விடுதலையாக்குவாயாக என்றேன். ஆனாலும் உங்கள் பிதாக்கள் எனக்குச் செவிகொடாமலும், தங்கள் காதைச் சாய்க்காமலும் போனார்கள். ¹⁵இப்பொழுது நீங்கள் மனந்திரும்பி, அவனவன் தன் அயலானுக்கு விடுதலையைக் கூறி, என் பார்வைக்குச் செம்மையானதைச் செய்து, என் நாமம் தரிக்கப்பட்ட ஆலயத்திலே எனக்கு முன்பாக ஒரு உடன்படிக்கைபண்ணினீர்கள். ¹⁶ஆனாலும் நீங்கள் மறுபடியும் மாறி, என் நாமத்தைப் பரிசுத்தக்குலைச்சலாக்கி, அவனவன் தன் இஷ்டப்படி போகும்படி விடுதலையாக்கின வேலைக்காரரையும் வேலைக்காரிகளையும் திரும்ப அழைத்து, அவர்களை மறுபடியும் அடிமைகளாக்கினீர்கள்.”

¹⁷ஆகையால் எங்கள் பிதா சொல்லுகிறார்: “அவனவன் தன் சகோதரனுக்கும் தன் அயலானுக்கும் விடுதலையைக் கூறவேண்டுமென்கிற என் சொல்லைக் கேளாமற்போனீர்கள்; ஆதலால், இதோ, நான் உங்களுக்குப் பட்டயத்துக்கும், கொள்ளைநோய்க்கும், பஞ்சத்துக்கும் விடுதலையைக் கூறுகிறேன் என்று உன் பிதா அறிவிக்கிறார்; பூமியின் சகல ராஜ்யங்களுக்கும் உங்களைத் திகிலாக்குவேன். ¹⁸என் உடன்படிக்கையை மீறி, எனக்கு முன்பாகப் பண்ணின உடன்படிக்கையின் வார்த்தைகளை நிறைவேற்றாதிருந்த மனுஷரை, அவர்கள் இரண்டாகத் துண்டித்து அதின் துண்டுகளின் நடுவே கடந்துபோன கன்றுக்குட்டியைப்போல் ஆக்குவேன். ^a a v18 பூர்வகால உடன்படிக்கை சடங்குகளில், உடன்படிக்கைபண்ணுகிறவர்கள் வெட்டப்பட்ட மிருகத்தின் துண்டுகளுக்கு நடுவே நடந்து, தாங்கள் அந்த உடன்படிக்கையை மீறினால் தங்களுக்கும் அதே கதி வரக்கடவது என்று சூளுரைத்தார்கள். ¹⁹யூதாவின் பிரபுக்களும், எருசலேமின் பிரபுக்களும், பிரதானிகளும், ஆசாரியர்களும், கன்றுக்குட்டியின் துண்டுகளின் நடுவே கடந்துபோன தேசத்தினுடைய சகல ஜனங்களுமாகிய அவர்களை, ²⁰அவர்களுடைய பகைஞர் கையிலும், அவர்கள் பிராணனை வாங்கத்தேடுகிறவர்களின் கையிலும் ஒப்புக்கொடுப்பேன்; அவர்களுடைய பிணங்கள் ஆகாயத்துப் பறவைகளுக்கும் பூமியின் மிருகங்களுக்கும் இரையாகும். ²¹யூதாவின் ராஜாவாகிய சிதேக்கியாவையும், அவனுடைய பிரபுக்களையும், அவர்கள் பகைஞர் கையிலும், அவர்கள் பிராணனை வாங்கத்தேடுகிறவர்களின் கையிலும், உங்களைவிட்டுத் திரும்பிப்போன பாபிலோன் ராஜாவின் சேனையின் கையிலும் ஒப்புக்கொடுப்பேன். ²²இதோ, நான் கட்டளையிட்டு, அவர்களை இந்தப் பட்டணத்துக்குத் திரும்பிவரப்பண்ணுவேன் என்று உன் பிதா அறிவிக்கிறார்; அவர்கள் அதற்கு விரோதமாக யுத்தம்பண்ணி, அதைப் பிடித்து, அக்கினியால் சுட்டெரிப்பார்கள்; யூதாவின் பட்டணங்களை நான் குடியில்லாத பாழ்நிலமாக்குவேன்.”