யோபு 20

20 ¹அப்பொழுது நாகமாத்தியனாகிய சோப்பார் மறுமொழியாக: ²"என் உள்ளத்தின் கலக்கத்தினால், என் அமைதியற்ற எண்ணங்கள் எனக்கு மறுமொழி சொல்லும்படி என்னைத் தூண்டுகின்றன. ³என்னைக் கனவீனப்படுத்தும் கடிந்துகொள்ளுதலை நான் கேட்கிறேன், என் அறிவினின்று ஒரு ஆவி எனக்கு மறுமொழி சொல்லும்படித் தூண்டுகிறது. ⁴பூமியில் மனுஷன் வைக்கப்பட்ட நாள்முதல், பூர்வகாலமுதல் அது எப்படியிருந்தது என்பதை நீ நிச்சயமாய் அறிந்திருக்கிறாய்: ⁵துன்மார்க்கனுடைய வெற்றி குறுகியது, தேவபக்தியில்லாதவனுடைய சந்தோஷம் ஒரு நொடிப்பொழுதே நிலைக்கும். ⁶அவனுடைய பெருமை வானங்கள்வரைக்கும் எட்டி, அவன் தலை மேகங்களைத் தொட்டாலும், ⁷தன் சொந்த மலம்போல் அவன் என்றென்றைக்கும் அழிந்துபோவான்; அவனைக் கண்டவர்கள், ‘அவன் எங்கே?’ என்று கேட்பார்கள். ⁸அவன் ஒரு கனவைப்போல் பறந்துபோய், காணப்படாதிருப்பான்; இராக்காலத்துத் தரிசனம்போல் துரத்திவிடப்படுவான். ⁹அவனைக் கண்ட கண் அவனை இனிக் காணாது; அவன் இருந்த இடம் இனி அவனைப் பாராது. ¹⁰அவன் பிள்ளைகள் ஏழைகளிடத்தில் பிச்சை கேட்பார்கள்; அவன் சொந்தக் கைகளே அவன் ஐசுவரியத்தைத் திரும்பக் கொடுக்கவேண்டும். ¹¹அவன் எலும்புகளை நிரப்பிய வாலிபபெலன் அவனோடேகூடத் தூளிலே படுத்துக்கொள்ளும். ¹²தீமை அவன் வாய்க்கு இனிதாயிருந்து, அதை அவன் தன் நாவின்கீழ் மறைத்துவைத்தாலும், ¹³அதை விட்டுவிட மனதில்லாமல், அதைத் தன் வாயில் வைத்துக்கொண்டிருந்தாலும், ¹⁴அவன் ஆகாரம் அவன் வயிற்றில் புளித்துப்போம்; அது அவனுக்குள்ளே விரியன் பாம்பின் விஷமாய்மாறும். ¹⁵அவன் ஐசுவரியத்தை விழுங்கினாலும் அதைக் கக்கிப்போடுவான்; தேவன் அதை அவன் வயிற்றிலிருந்து துரத்திவிடுவார். ¹⁶அவன் விரியன் பாம்புகளின் விஷத்தை உறிஞ்சுவான்; சர்ப்பத்தின் நாக்கு அவனைக் கொல்லும். ¹⁷தேனும் தயிரும் ஓடிவரும் ஆறுகளையும், நதிகளையும் அவன் ஒருபோதும் பார்க்கமாட்டான். ¹⁸தான் பிரயாசப்பட்டுச் சம்பாதித்ததை விழுங்காமல் திரும்பக் கொடுக்கவேண்டும்; தன் வர்த்தகத்தின் லாபத்தை அவன் அநுபவிக்கமாட்டான். ¹⁹ஏனெனில் அவன் ஏழைகளை ஒடுக்கிக் கைவிட்டான்; தான் கட்டாத வீட்டைப் பறித்துக்கொண்டான். ²⁰அவன் வயிற்றுக்கு அமைதி இல்லாதிருந்தபடியால், தான் ஆசைப்பட்டவைகளோடே அவன் தப்பிப்போகமாட்டான். ²¹அவன் விழுங்குகிறதற்கு ஒன்றும் மீதியாயிருக்கவில்லை; ஆகையால் அவன் செல்வம் நிலைநிற்காது. ²²அவன் நிறைவின் மிகுதியிலே, துன்பம் அவனைத் தொடர்ந்து பிடிக்கும்; உபத்திரவத்தின் முழுப்பாரமும் அவன்மேல் வரும். ²³அவன் தன் வயிற்றை நிரப்பும்போது, தேவன் தமது கடுங்கோபத்தை அவன்மேல் அவிழ்த்துவிட்டு, அதை அவன் ஆகாரமாக அவன்மேல் வருஷிக்கப்பண்ணுவார். ²⁴இரும்பு ஆயுதத்துக்கு அவன் தப்பியோடினாலும், வெண்கல அம்பு அவனை ஊடுருவிப் பாயும். ²⁵அவன் அதை உருவி இழுக்கிறான், அது அவன் உடலிலிருந்து வெளிவருகிறது; மின்னும் அதன் முனை அவன் பித்தப்பையிலிருந்து வெளிப்படுகிறது. திகில்கள் அவன்மேல் விழுகின்றன. ²⁶அவன் பொக்கிஷங்களுக்குக் காரிருள் பதிவிருக்கிறது; ஒருவரும் மூட்டாத அக்கினி அவனைப் பட்சித்து, அவன் கூடாரத்தில் மீதியாயிருக்கிறதையும் விழுங்கிப்போடும். ²⁷வானங்கள் அவன் அக்கிரமத்தை வெளிப்படுத்தும், பூமி அவனுக்கு விரோதமாய் எழும்பும். ²⁸அவன் வீட்டின் செல்வமெல்லாம் அள்ளிக்கொண்டுபோகப்படும், தேவனுடைய கோபாக்கினையின் நாளிலே அடித்துக்கொண்டுபோகப்படும். ²⁹இதுவே துன்மார்க்கனுக்குத் தேவனால் வரும் பங்கு; தேவனால் அவனுக்கு நியமிக்கப்பட்ட சுதந்தரம் இதுவே."