யோவான் 15

15 ¹“நான் மெய்யான திராட்சச்செடி, என் பிதா தோட்டக்காரர். ²என்னில் கனிகொடாத ஒவ்வொரு கிளையையும் அவர் அகற்றிவிடுகிறார்; கனிகொடுக்கும் ஒவ்வொன்றையும், அது அதிக கனிகொடுக்கும்படி, கழித்துச் சுத்திகரிக்கிறார். ³நான் உங்களுக்குச் சொன்ன வார்த்தையினிமித்தம் நீங்கள் இப்பொழுதே சுத்தமாயிருக்கிறீர்கள். ⁴என்னில் நிலைத்திருங்கள், நானும் உங்களில் நிலைத்திருப்பேன். கிளையானது திராட்சச்செடியில் நிலைத்திராவிட்டால் தானாய்க் கனிகொடுக்கக்கூடாததுபோல, நீங்களும் என்னில் நிலைத்திராவிட்டால் கனிகொடுக்கமாட்டீர்கள். ⁵நான் திராட்சச்செடி, நீங்கள் கிளைகள். ஒருவன் என்னிலும் நான் அவனிலும் நிலைத்திருந்தால், அவன் மிகுந்த கனிகொடுக்கிறான்; என்னைவிட்டுப் பிரிந்து நீங்கள் ஒன்றும் செய்யக்கூடாது. ⁶ஒருவன் என்னில் நிலைத்திராவிட்டால், அவன் கிளையைப்போல வெளியே எறியப்பட்டு உலர்ந்துபோகிறான்; அப்படிப்பட்ட கிளைகளைச் சேர்த்து, நெருப்பிலே போட்டு எரித்துவிடுகிறார்கள். ⁷நீங்கள் என்னிலும் என் வார்த்தைகள் உங்களிலும் நிலைத்திருந்தால், நீங்கள் விரும்புகிறது எதுவானாலும் கேளுங்கள், அது உங்களுக்கு நடக்கும். ⁸நீங்கள் மிகுந்த கனிகொடுத்து, என் சீஷர்களென்று விளங்குவதினாலே என் பிதா மகிமைப்படுகிறார்.

⁹“பிதாவானவர் என்னில் அன்புகூர்ந்ததுபோல, நானும் உங்களில் அன்புகூர்ந்தேன்; என் அன்பில் நிலைத்திருங்கள். ¹⁰நான் என் பிதாவின் கற்பனைகளைக் கைக்கொண்டு அவருடைய அன்பில் நிலைத்திருக்கிறதுபோல, நீங்களும் என் கற்பனைகளைக் கைக்கொண்டால் என் அன்பில் நிலைத்திருப்பீர்கள். ¹¹என் சந்தோஷம் உங்களில் இருக்கும்படியும், உங்கள் சந்தோஷம் நிறைவாயிருக்கும்படியும் இவைகளை உங்களுக்குச் சொன்னேன்.

¹²“நான் உங்களில் அன்புகூர்ந்ததுபோல நீங்களும் ஒருவரிலொருவர் அன்புகூரவேண்டும்; இதுவே என் கற்பனை. ¹³ஒருவன் தன் சிநேகிதருக்காகத் தன் ஜீவனைக் கொடுக்கிற அன்பிலும் அதிகமான அன்பு ஒருவரிடத்திலுமில்லை. ¹⁴நான் உங்களுக்குக் கட்டளையிடுகிறவைகளை நீங்கள் செய்தால், என் சிநேகிதராயிருப்பீர்கள். ¹⁵இனி நான் உங்களை ஊழியக்காரரென்று சொல்லுவதில்லை; ஊழியக்காரன் தன் எஜமான் செய்கிறதை அறியான். நான் உங்களைச் சிநேகிதரென்று சொன்னேன்; ஏனெனில் நான் என் பிதாவினிடத்தில் கேட்டவைகளெல்லாவற்றையும் உங்களுக்கு அறிவித்தேன். ^a a v15 இயேசு தம் பிதாவினிடத்திலிருந்து கேட்ட எல்லாவற்றையும் பகிர்ந்துகொள்வதன்மூலம் சீஷர்களை ஊழியக்காரரிலிருந்து சிநேகிதராக மாற்றுகிறார் — குமாரன்மூலம் உண்டாகும் இந்த சிநேகமே ஒவ்வொரு வாசகனுக்கும் பிதாவின் இருதயம் கொண்டிருக்கும் இலக்காகும். ¹⁶நீங்கள் என்னைத் தெரிந்துகொள்ளவில்லை, நானே உங்களைத் தெரிந்துகொண்டேன்; நீங்கள் போய்க் கனிகொடுக்கும்படியும், உங்கள் கனி நிலைத்திருக்கும்படியும் உங்களை ஏற்படுத்தினேன்; அப்படியிருக்க, நீங்கள் என் நாமத்தினாலே பிதாவானவரிடத்தில் கேட்பதெதுவோ, அதை அவர் உங்களுக்குக் கொடுப்பார். ¹⁷நீங்கள் ஒருவரிலொருவர் அன்புகூரவேண்டும் என்பதே நான் உங்களுக்குக் கொடுக்கும் கட்டளை.

உலகம் உங்களைப் பகைக்கும்போது

¹⁸“உலகம் உங்களைப் பகைத்தால், அது உங்களைப் பகைக்குமுன் என்னைப் பகைத்ததென்று அறியுங்கள். ¹⁹நீங்கள் உலகத்தாராயிருந்தால், உலகம் தன்னுடையதைச் சிநேகிக்கும்; ஆனால் நீங்கள் உலகத்தாரல்ல, நான் உங்களை உலகத்திலிருந்து தெரிந்துகொண்டேன்; ஆகையால் உலகம் உங்களைப் பகைக்கிறது. ²⁰ஊழியக்காரன் தன் எஜமானிலும் பெரியவனல்ல என்று நான் உங்களுக்குச் சொன்னதை நினைத்துக்கொள்ளுங்கள். அவர்கள் என்னைத் துன்பப்படுத்தினால் உங்களையும் துன்பப்படுத்துவார்கள்; அவர்கள் என் வார்த்தையைக் கைக்கொண்டால் உங்கள் வார்த்தையையும் கைக்கொள்வார்கள். ²¹ஆனால் என்னை அனுப்பினவரை அவர்கள் அறியாதபடியால், என் நாமத்தினிமித்தம் இவைகளையெல்லாம் உங்களுக்குச் செய்வார்கள். ²²நான் வந்து அவர்களுடன் பேசாதிருந்தால், அவர்களுக்குப் பாவமிராது; இப்பொழுதோ தங்கள் பாவத்திற்குப் போக்குச்சொல்ல அவர்களுக்கு இடமில்லை. ²³என்னைப் பகைக்கிறவன் என் பிதாவையும் பகைக்கிறான். ²⁴வேறொருவரும் செய்யாத கிரியைகளை நான் அவர்கள் நடுவில் செய்யாதிருந்தால், அவர்களுக்குப் பாவமிராது; இப்பொழுதோ அவர்கள் என்னையும் என் பிதாவையும் கண்டும் பகைத்தார்கள். ²⁵‘காரணமில்லாமல் என்னைப் பகைத்தார்கள்’ என்று அவர்களுடைய நியாயப்பிரமாணத்தில் எழுதியிருக்கிறது நிறைவேறும்படி இப்படி நடந்தது.

²⁶“பிதாவினிடத்திலிருந்து நான் உங்களுக்கு அனுப்பப்போகிற தேற்றரவாளன், அதாவது பிதாவினிடத்திலிருந்து புறப்படுகிற சத்திய ஆவியானவர் வரும்போது, அவர் என்னைக்குறித்துச் சாட்சிகொடுப்பார். ^b b v26 இயேசு வாக்குப்பண்ணுகிற தேற்றரவாளன் பரிசுத்த ஆவியானவரே — இயேசுவினால் பிதாவினிடத்திலிருந்து அனுப்பப்படுகிறவர்; இயேசு வெளிப்படுத்தின அனைத்திற்குள்ளும் சீஷர்களை நடத்துகிறபடியால் இங்கே ‘சத்திய ஆவியானவர்’ என்று அழைக்கப்படுகிறார்.

²⁷“நீங்களும் ஆதிமுதல் என்னுடனேகூட இருந்தபடியால் சாட்சிகொடுப்பீர்கள்.”