மத்தேயு 4

4 ¹பின்பு பரிசுத்த ஆவியானவர் இயேசுவைப் பிசாசினால் சோதிக்கப்படும்படி வனாந்தரத்திற்கு நடத்திச் சென்றார். ²அவர் நாற்பது பகலும் நாற்பது இரவும் உபவாசமிருந்தபின் பசியாயிருந்தார். ³அப்பொழுது சோதனைக்காரன் அவரிடத்தில் வந்து, “நீ தேவகுமாரனாயிருந்தால், இந்தக் கற்கள் அப்பங்களாகும்படி சொல்” என்றான்.

⁴அதற்கு அவர், “‘மனிதன் அப்பத்தினால் மாத்திரம் அல்ல, எங்கள் பிதாவின் வாயிலிருந்து புறப்படுகிற ஒவ்வொரு வார்த்தையினாலும் பிழைப்பான்’ என்று எழுதியிருக்கிறது” என்றார்.

⁵அப்பொழுது பிசாசு அவரைப் பரிசுத்த நகரத்திற்குக் கொண்டுபோய், தேவாலயத்தின் உச்சிமீது அவரை நிறுத்தி, ⁶“நீ தேவகுமாரனாயிருந்தால், கீழே குதி; ஏனெனில், ‘அவர் உன்னைக் குறித்துத் தம்முடைய தூதர்களுக்குக் கட்டளையிடுவார்; உன் பாதம் கல்லில் இடறாதபடிக்கு அவர்கள் உன்னைத் தங்கள் கைகளில் ஏந்திக்கொள்வார்கள்’ என்று வேதவாக்கியத்தில் எழுதியிருக்கிறதே” என்று சொன்னான்.

⁷இயேசு அவனை நோக்கி, “‘உன் பிதாவைச் சோதித்துப் பாராதிருப்பாயாக’ என்றும் எழுதியிருக்கிறது” என்றார்.

⁸மறுபடியும் பிசாசு அவரை மிகவும் உயர்ந்த ஒரு மலையின்மேல் கொண்டுபோய், உலகத்தின் சகல ராஜ்யங்களையும் அவைகளின் மகிமையையும் அவருக்குக் காண்பித்து, ⁹“நீ சாஷ்டாங்கமாய் விழுந்து என்னைப் பணிந்துகொண்டால், இவைகளையெல்லாம் உனக்குத் தருவேன்” என்று அவரிடத்தில் சொன்னான்.

¹⁰அப்பொழுது இயேசு அவனை நோக்கி, “அப்பாலே போ, சாத்தானே! ‘உன் பிதாவைப் பணிந்துகொண்டு, அவர் ஒருவருக்கே ஆராதனை செய்வாயாக’ என்று எழுதியிருக்கிறதே” என்றார்.

¹¹அப்பொழுது பிசாசு அவரைவிட்டு விலகிப்போனான்; உடனே தூதர்கள் வந்து அவருக்குப் பணிவிடை செய்தார்கள்.

கலிலேயாவில் ஒளி உதிக்கிறது

¹²யோவான் காவலில் வைக்கப்பட்டதை இயேசு கேள்விப்பட்டபோது, அவர் கலிலேயாவுக்குத் திரும்பிச் சென்றார். ¹³அவர் நாசரேத்தை விட்டு, செபுலோன், நப்தலி நாட்டு எல்லைகளிலுள்ள கடலோரமான கப்பர்நகூமுக்கு வந்து குடியிருந்தார்; ¹⁴தீர்க்கதரிசியாகிய ஏசாயாவினால் சொல்லப்பட்டது நிறைவேறும்படி இப்படி நடந்தது: ¹⁵“செபுலோன் நாடும் நப்தலி நாடும், கடல் வழியும், யோர்தானுக்கு அப்புறமும், புறஜாதிகளின் கலிலேயாவும், ¹⁶இருளில் தங்கியிருந்த ஜனங்கள் பேரொளியைக் கண்டார்கள்; மரண இருளின் நிழலான தேசத்தில் தங்கியிருந்தவர்கள்மேல் ஒளி உதித்தது.”

¹⁷அதுமுதல் இயேசு, “மனந்திரும்புங்கள், எங்கள் பிதாவின் ராஜ்யம் சமீபமாயிருக்கிறது” என்று பிரசங்கிக்கத் தொடங்கினார்.

இயேசு தமது முதல் சீஷர்களை அழைக்கிறார்

¹⁸இயேசு கலிலேயாக் கடலோரமாய் நடந்துபோகையில், பேதுரு என்னப்பட்ட சீமோனும் அவன் சகோதரனாகிய அந்திரேயாவும் ஆகிய இரண்டு சகோதரர் கடலில் வலை வீசிக்கொண்டிருந்ததைக் கண்டார்; அவர்கள் மீன்பிடிக்கிறவர்களாயிருந்தார்கள்.

¹⁹அவர் அவர்களை நோக்கி, “என் பின்னே வாருங்கள், உங்களை மனுஷரைப் பிடிக்கிறவர்களாக்குவேன்” என்றார்.

²⁰உடனே அவர்கள் தங்கள் வலைகளை விட்டு, அவருக்குப் பின்சென்றார்கள். ²¹அவர் அவ்விடம் விட்டுப் போகையில், வேறு இரண்டு சகோதரராகிய செபெதேயுவின் குமாரன் யாக்கோபும் அவன் சகோதரன் யோவானும் தங்கள் தகப்பன் செபெதேயுவுடனே படகில் தங்கள் வலைகளைப் பழுதுபார்த்துக்கொண்டிருந்ததைக் கண்டு, அவர்களை அழைத்தார். ²²உடனே அவர்கள் படகையும் தங்கள் தகப்பனையும் விட்டு, அவருக்குப் பின்சென்றார்கள்.

பிதா தமது குமாரன் மூலமாய் குணமாக்குகிறார்

²³பின்பு இயேசு கலிலேயா முழுவதிலும் சுற்றி நடந்து, அவர்களுடைய ஜெப ஆலயங்களில் உபதேசித்து, ராஜ்யத்தின் நற்செய்தியைப் பிரசங்கித்து, ஜனங்களிலுள்ள சகல வியாதிகளையும் சகல நோய்களையும் குணமாக்கினார். ²⁴அவரைப்பற்றிய செய்தி சீரியா தேசம் முழுவதும் பரவிற்று; பலவித வியாதிகளாலும் வேதனைகளாலும் வருந்தினவர்கள், பிசாசு பிடித்தவர்கள், வலிப்பு நோயாளிகள், திமிர்வாதக்காரர் ஆகிய நோயுற்ற யாவரையும் அவரிடத்தில் கொண்டுவந்தார்கள்; அவர் அவர்களைக் குணமாக்கினார். ²⁵கலிலேயாவிலிருந்தும், தெக்கப்போலியிலிருந்தும், எருசலேமிலிருந்தும், யூதேயாவிலிருந்தும், யோர்தானுக்கு அப்புறத்திலிருந்தும் திரளான ஜனங்கள் அவருக்குப் பின்சென்றார்கள். ^a a v25 தெக்கப்போலி என்பது கலிலேயாக் கடலுக்குக் கிழக்கிலும் தென்கிழக்கிலும் இருந்த, பெரும்பாலும் புறஜாதியாருடைய பத்து நகரங்களின் தொகுப்பாகும்.