மீகா 4

4 ¹கடைசி நாட்களில், எங்கள் பிதாவின் ஆலயம் நிற்கும் மலை மலைகளுக்கெல்லாம் உயர்ந்ததாய் உறுதியாய் ஸ்தாபிக்கப்பட்டு, குன்றுகளுக்கு மேலாய் உயர்த்தப்படும்; ஜனங்கள் அதற்கு ஓடிவருவார்கள். ²அநேக ஜாதிகள் வந்து: “வாருங்கள், நாம் எங்கள் பிதாவின் மலைக்கும், யாக்கோபின் தேவனுடைய ஆலயத்துக்கும் ஏறிப்போவோம்; அவர் தமது வழிகளை நமக்குப் போதிப்பார், நாம் அவருடைய பாதைகளில் நடப்போம்” என்பார்கள். ஏனெனில் சீயோனிலிருந்து வேதமும், எருசலேமிலிருந்து எங்கள் பிதாவின் வார்த்தையும் வெளிப்படும். ³அவர் அநேக ஜனங்களுக்குள் நியாயந்தீர்த்து, தூரத்திலுள்ள பலமான ஜாதிகளின் வழக்குகளைத் தீர்ப்பார். அவர்கள் தங்கள் பட்டயங்களை மண்வெட்டிகளாகவும், தங்கள் ஈட்டிகளை அரிவாள்களாகவும் அடித்துப்போடுவார்கள்; ஜாதிக்கு விரோதமாய் ஜாதி பட்டயம் எடுப்பதில்லை, இனி அவர்கள் யுத்தத்தைக் கற்பதுமில்லை. ⁴அவனவன் தன்தன் திராட்சச்செடியின் கீழும், தன்தன் அத்திமரத்தின் கீழும் உட்காருவான்; அவர்களைப் பயப்படுத்துவார் ஒருவரும் இல்லை; பரலோக சேனைகளின் பிதா தாமே இதைச் சொன்னார். ⁵ஏனெனில் எல்லா ஜனங்களும் தங்கள் தங்கள் தெய்வத்தின் நாமத்தில் நடக்கிறார்கள்; நாமோ எங்கள் பிதாவின் நாமத்தில் என்றென்றைக்கும் சதாகாலமும் நடப்போம்.

எங்கள் பிதா சிதறடிக்கப்பட்ட தமது பிள்ளைகளைச் சேர்க்கிறார்

⁶அந்நாளிலே நான் நொண்டியானவர்களைச் சேர்த்து, தள்ளுண்டவர்களையும், நான் உபத்திரவப்படுத்தினவர்களையும் கூட்டிக்கொள்ளுவேன் என்று எங்கள் பிதா சொல்லுகிறார். ⁷நான் நொண்டியானவர்களை மீதியாக்கி, தூரமாய்த் துரத்தப்பட்டவர்களைப் பலத்த ஜாதியாக்குவேன்; எங்கள் பிதா சீயோன் மலையிலே இதுமுதற்கொண்டு என்றென்றைக்கும் அவர்களை அரசாளுவார்.

⁸மந்தையின் கோபுரமே, சீயோன் குமாரத்தியின் மலையே, அது உன்னிடத்தில் வரும்—முந்தின ஆளுகை திரும்பிவரும், எருசலேம் குமாரத்தியின் ராஜ்யம் உனக்கு உண்டாகும்.

⁹இப்பொழுது நீ ஏன் உரத்த சத்தமிட்டு அழுகிறாய்? உன்னில் ராஜா இல்லையா? பிரசவவேதனைப்படுகிற ஸ்திரீயைப்போல வேதனை உன்னைப் பிடிக்கத்தக்கதாக உன் ஆலோசனைக்காரன் அழிந்துபோனானா? ¹⁰சீயோன் குமாரத்தியே, பிரசவிக்கிற ஸ்திரீயைப்போல வேதனைப்பட்டு முனகு; ஏனெனில் இப்பொழுது நீ நகரத்தைவிட்டுப் புறப்பட்டு, வெளியான வயல்வெளியில் தங்குவாய்; பாபிலோன்மட்டும் போவாய். அங்கே நீ விடுவிக்கப்படுவாய்; அங்கே எங்கள் பிதா உன் சத்துருக்களின் கைக்கு உன்னை நீங்கலாக்கி மீட்பார்.

¹¹இப்பொழுது அநேக ஜாதிகள் உனக்கு விரோதமாய்க் கூடி: “அவள் தீட்டுப்படட்டும், சீயோனை நம்முடைய கண்கள் பார்த்துக் களிக்கட்டும்” என்கிறார்கள். ¹²ஆனாலும் அவர்கள் எங்கள் பிதாவின் நினைவுகளை அறியார்கள்; அவருடைய ஆலோசனையை உணரார்கள்; அவர் அவர்களை அரிக்கட்டுகளைப்போல் போரடிக்கும் களத்தில் சேர்த்திருக்கிறார். ¹³சீயோன் குமாரத்தியே, எழுந்து போரடி; ஏனெனில் நான் உன் கொம்பை இரும்பும், உன் குளம்புகளை வெண்கலமுமாக்குவேன்; நீ அநேக ஜனங்களை நொறுக்கிப்போடுவாய்; அவர்களுடைய ஆதாயத்தை எங்கள் பிதாவுக்கும், அவர்களுடைய ஆஸ்தியைச் சர்வபூமியின் ஆண்டவருக்கும் நேர்ந்துகொடுப்பாய்.