நீதிமொழிகள் 25

25 ¹இவைகளும் சாலொமோனின் நீதிமொழிகள்; யூதாவின் ராஜாவாகிய எசேக்கியாவின் மனுஷர் இவைகளை நகல் எடுத்தார்கள். ²காரியத்தை மறைப்பது எங்கள் பிதாவின் மகிமை; காரியத்தை ஆராய்ந்து அறிவது ராஜாக்களின் மகிமை. ³வானங்கள் உயரமாயும் பூமி ஆழமாயும் இருப்பதுபோல, ராஜாக்களின் இருதயம் ஆராய்ந்தறிய முடியாதது. ⁴வெள்ளியிலிருந்து களிம்பை நீக்கிவிடு, அப்பொழுது தட்டானுக்கு ஒரு பாத்திரம் வெளிவரும். ⁵ராஜாவுக்கு முன்பாக இருந்து துன்மார்க்கனை நீக்கிவிடு, அப்பொழுது அவனுடைய சிங்காசனம் நீதியில் நிலைநிற்கும். ⁶ராஜாவின் சமுகத்தில் உன்னை நீயே மேன்மைப்படுத்திக்கொள்ளாதே, பெரியோர்களின் இடத்திலும் நிற்காதே; ⁷ஏனெனில் உன் கண் கண்ட பிரபுவுக்கு முன்பாக நீ தாழ்த்தப்படுவதைவிட, “இங்கே ஏறிவா” என்று உனக்குச் சொல்லப்படுவது நலம். ⁸வழக்காட அவசரப்படாதே; உன் அயலான் உன்னை வெட்கப்படுத்தும்போது முடிவில் நீ என்ன செய்வாய்? ⁹உன் வழக்கை உன் அயலானோடேயே வழக்காடு, ஆனால் மற்றொருவனுடைய இரகசியத்தை வெளிப்படுத்தாதே, ¹⁰அதைக் கேட்கிறவன் உன்னை வெட்கப்படுத்தாதபடிக்கும், உன் துர்ப்பெயர் ஒருபோதும் நீங்காதபடிக்கும் எச்சரிக்கையாயிரு. ¹¹ஏற்ற சமயத்தில் சொல்லப்பட்ட வார்த்தை, வெள்ளிச் சட்டங்களில் பதித்த பொன் கனிகளுக்கு ஒப்பாயிருக்கும். ¹²கேட்கிற காதுக்கு ஞானமுள்ள கடிந்துகொள்ளுதல், பொன் கடுக்கனுக்கும் பசும்பொன் ஆபரணத்துக்கும் ஒப்பாயிருக்கும். ¹³அறுவடைக் காலத்தில் உறைந்த மழையின் குளிர்ச்சிபோல, உண்மையுள்ள ஸ்தானாபதி தன்னை அனுப்பினவர்களுக்கு இருக்கிறான்; அவன் தன் எஜமான்களின் ஆத்துமாவைக் குளிர்விக்கிறான். ¹⁴கொடுக்காத வெகுமதியைக் குறித்து பெருமைபாராட்டுகிறவன், மழையில்லாத மேகங்களுக்கும் காற்றுக்கும் ஒப்பாயிருக்கிறான். ¹⁵நீடிய பொறுமையால் அதிபதி சம்மதிக்கப்படுவான், மெதுவான நாவு எலும்பையும் முறிக்கும். ¹⁶தேனைக் கண்டால், போதுமான அளவே சாப்பிடு; இல்லாவிட்டால் மிதமிஞ்சி வாந்திபண்ணுவாய். ¹⁷உன் அயலான் வீட்டுக்கு அடிக்கடி போகாதே; இல்லாவிட்டால் அவன் உன்னைக் குறித்து சலித்து உன்னை வெறுப்பான். ¹⁸தன் அயலானுக்கு விரோதமாய் பொய்ச்சாட்சி சொல்லுகிறவன், தண்டாயுதத்துக்கும் பட்டயத்துக்கும் கூர்மையான அம்புக்கும் ஒப்பாயிருக்கிறான். ¹⁹கஷ்டகாலத்தில் உண்மையில்லாதவன் மேலுள்ள நம்பிக்கை, உடைந்த பல்லுக்கும் மொழுக்குப்போன காலுக்கும் ஒப்பாயிருக்கும். ²⁰துக்கமான இருதயத்துக்குப் பாட்டுகளைப் பாடுகிறவன், குளிர்நாளில் வஸ்திரத்தைக் கழற்றிப்போடுகிறவனுக்கும், சவர்க்காரத்தின்மேல் வார்க்கப்பட்ட காடிக்கும் ஒப்பாயிருக்கிறான். ²¹உன் சத்துரு பசியாயிருந்தால், அவனுக்கு உண்ண அப்பம் கொடு; அவன் தாகமாயிருந்தால், அவனுக்குக் குடிக்கத் தண்ணீர் கொடு; ²²ஏனெனில் நீ அவனுடைய தலையின்மேல் எரிகிற தழலைக் குவிப்பாய், எங்கள் பிதா உனக்குப் பலனளிப்பார். ²³வடகாற்று மழையைப் பிறப்பிக்கும், புறங்கூறும் நாவோ கோபமுள்ள முகங்களைப் பிறப்பிக்கும். ²⁴சண்டைக்காரியான மனைவியோடே ஒரு பெரிய வீட்டில் குடியிருப்பதைவிட, வீட்டின்மேல் ஒரு மூலையில் தங்கியிருப்பது நலம். ²⁵விடாய்த்த ஆத்துமாவுக்குக் குளிர்ந்த ஜலம் எப்படியிருக்கிறதோ, அப்படியே தூரதேசத்திலிருந்து வரும் நற்செய்தி இருக்கிறது. ²⁶துன்மார்க்கனுக்கு முன்பாக இடங்கொடுக்கிற நீதிமான், கலங்கின நீரூற்றுக்கும் கெட்டுப்போன துரவுக்கும் ஒப்பாயிருக்கிறான். ²⁷தேனை மிகுதியாய் சாப்பிடுவது நல்லதல்ல; தன் சுய மகிமையைத் தேடுவதும் நல்லதல்ல. ²⁸தன் ஆவியை அடக்காதவன், மதிலிடிக்கப்பட்டு அரணற்றுப்போன பட்டணத்துக்கு ஒப்பாயிருக்கிறான்.